عالم وعالمه

صحيت من النوم الصبح وبعد حركات كل يوم المعتاده بفتح موقع خاص بالاخبار لاقيت خبر في وش الصفحة كده معمول حواليه فرح وهيصة وزمباليطة بيقولوا فيه ان الرئيس أوباما الواد الاسمراني الحليوة الطويل دا ..... اختار الدكتور أحمد زويل كأحد علماء المجلس الاستشاري الخاص بالعلم والتكنولوجيا له أو للبيت الأبيض عموما والخبر مصحوب بالزغاريد والناس بتوع فرقة المولد اللي بيقعدوا يطبلوا دول شغالين على جنب فرحانين زي ما فرحوا بداليا مجاهد اللي قالت بالفم المليان متأملوش في إني هاقدر اغير حاجه من مكاني

طبعا الفخر كل الفخر بالدكتور أحمد زويل الرجل المصري الخلوق العالم المهذب الذي اقترن فيه علم العالم وعقل العاقل ولمن لا يعرف الدكتور أحمد زويل يمكنه الضغط على أسم ذلك الرجل ليعرف تاريخه وكم شرف المصريون

المشكلة بقى مش في أحمد زويل أو غيره من العلماء الأجلاء وانما المشكله والتي أيضا قتلوها بحثا لماذا لا نجد هؤلاء العلماء في بلادنا رغم أنهم عربا ومصريين ونجدهم في بلاد أخرى لا يدينون بدينهم ولا يتحدثون بلغتهم

وقعدت أفكر لحد ما وصلت ان الاهتمام بالعلم عندنا له شكل تاني فعندنا في مصر حكومتنا المصون وبدون الدخول في السياسة بتهتم بالعالمة أكتر ما بتهتم بالعالم .... دايما الاهتمام باي حاجه تحمل تاء التأنيث أكتر ليه ماعرفش

والعالمة عندنا لها مقام رفيع متظبط زي مقام الدكتورة دينا ولا الست لوسي اللي بتقول انها هاترقص لحد اخر يوم في عمرها ربنا يقصف عمرها .... تحسوا كده ان مقام الناس دي مصبوب صب على قالب ... بيهتموا هم بمقامهم اهتماما كبيرا لدرجة انه بياخد جل اهتمامهم لانه هو دا العلم اللي بتقدمه للاجيال اللي جايه واللي هايهز العالم

ونظرا لأهمية العلم اللي بتقدمه كل عالمة من دول بدأت مدارسنا الخاصة والتي في الغالب أنشئت برأس مال أجنبي بتقديم فقرات خاصة ليهم في المدارس دي عشان الشباب يفرح وينبسط وعشان ميبقاش زي شباب التعليم المجاني المحروم من كل عالمة في مصر ومبيسمعش عنها غير في التلفزيون ابو واصلة ولا على الموبايل وهي بتمارس مهام العلم بتاعها مع حسام ابو الفتوح أو غيره من رجال الاعمال

وطبعا انتوا عارفين أن العلم (ومش أي علم دا علم فيفي ودينا ولوسي) أن العلم والاعمال الاتنين متفقين في حاجات كتير فكل عالمة من دول لازم تعمل عمل للراجل عشان تربطة .... في سلسلة وتجره لكل مكان ويصرف عليها

وحتى في البلاد العربية فنحن في الهم شركاء فلو أحببنا أن نضع قائمة بأسماء العلماء العرب في مشارق الأرض ومغاربها لوجدنا من كل جنسية عربية من رفع شأنها وعلا باسم بلاده ومن فوق اسم بلاده اسم الاسلام والعرب ولكن

يبدو ان الدول العربية ان لم تهتم بالعالم تهتم بالعالمة ولو ماهتمتش بالعالمة بتهتم بحاجات تانيه وكله بيندرج بردو تحت بند الاهتمام بالعالمة والعوالم ... العوالم الراقصة وليس العوالم الاخرى ... لربما حد يعتقد اني باتكلم في علوم الفضاء

أول ما فاز أحمد زويل بجائزة نوبل عام 1999 وللعلم هو العالم الفيزيائي الوحيد اللي بيفوز بجائزة نوبل متفردا كعالم فيزياء فكل من سبقوه كانوا مجموعات عمل وليسوا أفراد

أول ما فاز بجائزة نوبل خرجت وزارة التعليم العالي عندنا وقالت سيتم انشاء جامعه علمية بإسم الدكتور أحمد زويل .... قولنا خير ....

طلع علينا أمير الكويت وقتها وقال سيتم تمويل الجامعه من قبل حكومة الكويت على أن يكون نصف طلابها عرب والنصف الآخر مصريين قولنا خير اكتر

طلع ملك السعودية يقول كل علوم الذرة هاتكون على حساب المملكة العربية السعودية شريطة ان يشرف على تلك الجامعه الدكتور أحمد زويل بذات نفسه .... تمام الدكتور أحمد زويل عمره ما اتاخر عن عرب أو مسلمين والراجل كان له مقال شهري علمي لمدة 5 سنوات من قبل حصوله على جائزة نوبل في مجلة مصرية واستمر بعد فوزه لمدة 4 سنوات حتى انقطعت عنها في المتابعه .... يعني هذا الرجل لا يواري أو يداري علمه عن أحد

وبعد شهرين بعد ما خلصت الزغاريد والزمر والطبل خلص نامت جامعة أحمد زويل واختفى المشروع ولا الحكومة المصرية أنشأت ولا الحكومة الكويتيه انفقت ولا الحكومة السعودية اشترت

وزغردي ياللي مانتيش غرمانه أهو كان كلام في الهوا أو كله كلام زي كلام الواد أحمد عاطف اللي لا بيودي ولا يجيب

ولكن بعدها سمعنا عن فيفي اللي بتعمل موائد الرحمن اللي راحت تحج وسمعنا عن قضية حسام ودينا وقعدنا نسأل هما متجوزين ولا مش متجوزين ودينا يا حرام اتفضحت .... ولا دكتور السنان الشراني دا اللي بدل ما يخلع الضرس كان بيخلع حاجات تانيه

وضاع الضفدع في الضباب على رأي ناس أعرفهم والناس اللي بتحب العلم ونفسها تتعلم تاهوا في زحمة الناس اللي بتحب العوالم وفلوسهم

وأهو كله كلام

من كل فيلم أغنية

سلام عليكم أخباركم ايه ؟؟

وصلني رد في الردود اللي على المدونة على موضوع قناة الحظيرة 

 أعرض الرد بالكامل وبعدين أستأذنكم في الرد عليه وعندنا كلام تاني كتير

(قناة الجزيرة من اكثر قنوات العالم عرضا لحقيقة الاخبار عكس كتير من القنوات المصرية والعربية التى تعتمد فى الغالب على الكذب والنفاق قارن بين قناة الجزيرة وشهرتها عالميا وما تعرضت له من حروب وتخريب فى بنيتها فى البلاد التى تعرضت الى الاستعمار وكم شهيدا سقط منها وكم وكم والكثير

 

ولا يسعنى ان اشكر دولة قطر على هذه القناة لما تقدمة للمشاهد من اخبار نثق فيها عكس قنواتنا الكاذبة

معلومة :قناة الجزيرة بتجيب فضائح واخبار ومعلومات عن اسرائيل وامريكا اكثر مما تقول على مصر)

الأخ الفاضل أو الأخت الكريمة اللي تفضلت بالرد أولا شرفت المدونة بدخولك وأتمنى تتكرر الزيارة والمرة الجاية يكون في تعريف صغير لك بعد كلامك ودا بعد أذنك 

ثانيا نتفق على مبدأ الاختلاف في الرأي لا يفسد للود قضية قبل أن أبدأ كلامي وفي الغالب أنا لا اتفق اطلاقا مع كلامك وهانسوق أدلة كتير ولكن ما أود أن أبدأ به هو أن عرض الحقائق من زاوية واحده لا يعد عرضا للحقيقة 

نفترض مثلا أننا قرأنا خبرا كالتالي ... (مقتل رجل على يد أحد جيرانه ) نفترض ان الخبر اكتفى بذلك فقط ووقف عند ذلك الحد تعالوا نفسر الخبر وكل واحد يفسر على مزاجه 

اقولكم التفسيرات بناءا على اختلاف الشخصيات 

شخص 1 :  حتى الجيران معادش ليهم امان ؟ 

شخص 2 : تلاقيه كان عايز يسرقه 

شخص 3 : ياعم تلاقيه عاكس مراته  

أدي 3 آراء كل رأي مختلف عن الآخر فقط لان الموضوع لم يعرض بكامل حقيقته او لم يعرض بكامل صورته هنا الحقيقة ناقصة وهذا ما تفعله قناة الحظيرة واسف لان اسم الجزيرة تقيل على لساني والحظيرة عندي افضل 

فمثلا في عرضها لاتفاقية السلام لم تتحدث قناة الحظيرة على ان احتياطي الغذاء الخاص بالجيش المصري في اثناء الحرب قد بدأ مرحلة النفاذ في يوم 19 اكتوبر تقريبا وان القوات المسلحة لو كانت استمرت في الحرب شهرا اخر لمات الجنود جوعا وليس برصاص العدو 

قناة الحظيرة لم تتحدث عن الدول العربية التي سحبت طائرتها عشية يوم 5 اكتوبر والتي كان عددهم 30 طائرة فقط لانه تم تبليغهم بموعد الحرب متأخرا 

قناة الحظيرة لم تذكر أسماء أي ممن أبلغوا اسرائيل بموعد الحرب بعد علمهم به لانهم للأسف عرب

قناة الحظيرة لم تذكر أسماء الدول العربية التي لم تحاول حتى مد يد العون ماديا أو حتى معنويا للقوات المسلحة وقت الحرب 

ولكنها فقط تحدثت عن جرم اتفاقية السلام كأنه لزاما علينا استمرارية الحرب من أجل عيون العرب وأن يدفع كل بيت بمصر بأبنائه للحرب وأبناء العرب سكارى حيارى يتنطعون في شوارع وطرقات القارة الأوربية 

هذا على سبيل المثال وليس الحصر وهناك الكثير خدوا عندكم واحد كاتب أهو قناة الحظيرة للأبقار 

بلاش الاولاني عشان مصري زي حالتنا وهانقول متعصب ادي واحد تاني من الكويت كاتب موضوع اسمه فضيحة قناة الحظيرة 

ورجاءا تقروا الردود كمان عليه كل اللي رد شتم في قناة الحظيرة ... كفاية انها قناة الحظيرة واحد خلاها للابقار وانا خليتها للحمير لان الحمار بيشيل وبس 

وإثباتا للقناة التي يعمل بها 500 حمار  انها تبحث فقط عن الدوشة الاعلامية دا موضوع في ملتقى أهل السنة أقروا وانتوا تعرفوا قناة الحظيرة والإساءة للرسول

ومش هارجع اعيد تاني حجم التعاملات بين قطر كدولة واللي وزير خارجيتها يملك قناة الجزيرة وبين اسرائيل كفاية كده على قناة الحظيرة تحياتي لرأيك 

وندخل على الأغنية التانيه من فيلم العته المغولي الذي أصاب مجموعة من شباب العرب بصفة عامة ومجموعة من شباب مصر بصفة خاصة الأمر الذي أدى إلى انحدار مستوى الفكر لأحط درجاته وأنعدم لدرجة أنه لم يعد هناك عقل ليفرق بين القرآن الكريم والأحاديث النبوية 

مرفق صورة مأخوذة من أحد المواقع من أحد ردود واحد يستاهل الحرق والله ... ومش هو بس لا دا هو وأبوه واللي جابوه لانه مش عارف القرآن الكريم من الحديث الشريف آدي الصورة 

أضغط تشوف الصورة

في التعليق اللي في المنتصف اللي في الوش بالظبط  في المربع المحدد بالأحمر تجاهلوا الاخطاء الإملائية التي إن دلت تدل على ان اللي بيكتب طفل في الإبتدائي يجهل الفرق بين الهاء والتاء المربوطة والتاء بصوا لاخر التعليق أولا كاتب الحديث غلط وبعد كده كاتب صدق الله العظيم وكاتب صدق غلط نفسي أعرف علاقة الضاد بالقاف على لوحة المفاتيح مش لاقي أي علاقة بين الاتنين 

طبعا دي كارثة ومش أي كارثة دي مصيبة سودا تدل على أن اللغة العربية مش بس في خطر لا الدين جوا انفسنا اصبح في خطر وخطر كبير جدا 

ربنا يسترها علينا 

الأغنية التالته هي فعلا من موقع أغاني .... موقع ربما يكون صاحبه جاهل أو متخلف أو قاصد الله تعالى أعلم ولكن صاحب الموقع مصنف المغنيين كل مغني في صفحة لوحده المهم يبدو ان الأغاني الدينية كانت كتيرة فأنشأ فئة أخرى وسط المغنيين وسماها محمد رسول الله فتدخل الموقع تدور على مغني ... اي كان فهو طلع ولا نزل مغني وتلاقي اسم اشرف الخلق وسط اسماء ما يعلم بيها الا الله سبحانه وتعالي 

الحل بالتأكيد اننا نبعت رسالة لإدارة الموقع بتغيير الرسم يسميها أغاني دينية ونتعامل معاه بالحسنى ونبدأها بالحسنى ويارب يستجيب

الصورة طبعا مدرجة للتوضيح وهتلاقوا المربع محيط بالعلامة السفيهه اللي عاملها  أضغط تشوف الصورة

ايميل الموقع اللي نبعت عليه contact@nogomi.com