كـلـه كـــلام .. المدونة الرئيسية

يوميات عاطل - أنا ليه عاطل

2011-06-02T18:10:00.002+02:00

سؤال كثيرا ما يتبادر لذهني ... (انا ليه عاطل) وبالتأكيد أنا أسأل نفسي بالعاميه فبكل تأكيد أقول كلمة ( عاطل ) باللفظ العامي ( عواطلي ) اللفظ الذي كلما تذكرته تذكرت معه المثل ( الايد البطاله - نجسه )

نعود للسؤال ( انا ليه عواطلي )

بسبب الثورة ... ثورة مصر ؟؟؟ ... بالطبع لا ولكنها أحد الأسباب المؤخره

انا كنت في ليبيا لا بيا ولا عليا فجأه قامت ثورة مصر ... واحتراما لفئة كبيرة من المجتمع انا حاليا منهم فنسميها أحداث يناير التي تطورت لتهدم نظام الدوله الحاكم بمشتملاته ... وفي فئه اخرى يسمونها وكسة مصر

المهم بردو مش دا موضوعنا انا ليه عواطلي هو دا موضوعنا

ارجع واقول الثوره ... ثورة ليبيا ... ماهو انا كنت في ليبيا ... وبدأ الضرب خدت ما تبقى وما يمكن حمله ورجعت على ام الدنيا ... اللي طول عمرها مطلعه عين ام الواحد بره وجوه

ورجعت بقى على كلام ان البلد اتغيرت ... والشعب تطور ... تطور يا نهار ابيض ... يعني مبيرميش زباله في الشارع

لا لا خالص

ولكن ما رأيته يبقى الحال على ما هو عليه ؟؟

ما علينا ... هو انا ليه عواطلي

اصل انا دورت على شغل في بلدنا ... قوم كل انتر فيو يقولي احنا عايزين حديث تخرج

طب والعالم الخبره اللي زيي يروحوا فين

اصل حديث التخرج بياخد راتب اقل

اما الخبره بياخد راتب اعلى

وعليه انا عواطلي

رغم استمرارية البحث عن عمل إلا اني لازلت عواطلي لاني حتى لو رضيت براتب حديث التخرج مش معايا عربيه ... اصلهم بقوا بيكونوا عايزين الموظفين كمان بعربياتهم

المهم النتيجه في النهايه واحده اني عواطلي

يوميات عاطل

2011-06-01T20:51:00.002+02:00

أجلس وحدي ... رغم وجود العالم أجمع حول عيوني

أتأمل وجه الاصوات واسترق السمع لحديث عيون الناس ... اعرف ان جنوني قد عد العدة لقتلي فأخرج سكينا حادا وبدأ في غرس سكينه في عقلي

دقات الساعة في رأسي تهوى كمطارق من صلب ... فتحطم كل هدوء النفس .. وتثير الملل الكامن في نفسي فيهيج كموج البحر بصدري ... يسحب سفن الراحة من شطآني ... يلقيها في عرض البحر المظلم

ويجف الحلق من الظمأ

فأوقن أني لن أحتمل

وأعلم أني الآن ابدأ في نقش الاسم على شاهد قبري

مجرد مقدمه لحملة 30 يوم تدوين

بنو جهل

2010-07-09T21:30:00.005+03:00

بصراحة عندي حالة امتناع عن التدوين في المدونة دي .. ليه مش عارف ربنا يفرجها من عنده

سبب التدوين سبب واحد بس .... التقليعه الجديدة اللي طلعت مع قناة القاهره والناس وهي تسمية رمضان بالسنة الميلاديه الموافقه لقدومه ... يكتب رمضان 2009 ورمضان 2010 مش عارف دا جهل منهم ولا عمد ... ان كان جهل يبقى هما بنو جهل لان رمضان شهر عربي مش ميلادي وان كان عمد فهم قوم جهل بردو لان ابو جهل كان يعلم الحق ويعانده

وكأن الفكرة فكرة محو أي هويه اسلاميه مربوطة بالعالم العربي ناس هتقولي انت بتمسك في الحاجات الصغيره دي ليه .... المصيبة ان الضرب بييجي في الحاجات الصغيره الاول

فاجتماع اهل العداء للاسلام على رأي كان على أن هدم الاسلام يبدأ من هدم السنن فإذا انتهت لم يبقى الا الفرائض والتي يسهل الاجهاز عليها وحدها هايطلع يقولي ودي من السنن ... هاقوله اه من السنن الرسول حدد لنا اننا نتبعه ونتبع اصحابه من بعده واول من اطلق التقويم الهجري سيدنا عمر بن الخطاب رضي الله عنه ... ما وضعه عمر رضي الله عنه اكيد افضل مما يقوله بنو جهل

لو في حد مهتم بأمر دينه متفرطش في صغائر الامور ... ومتقولش الدين بيهتم بالجوهر الدين كله جوهر ظاهره وباطنه متكونش يد تساعد على الهدم

رمضان اسمه شهر رمضان لعام 1431 او رمضان لعام 1430 او رمضان لعام 1432 مش رمضان عام 2010

سنة تانيه تدوين - الشهيد ميكي ماوس

2010-06-03T23:17:00.008+03:00

في الليلة التي أصل فيها لعامين كاملين من التدوين لم أجد أن الاحتفال بمثل هذه المناسبة قد يكون مرضيا لي أو لغيري بل أشعر أنني حتى لو ذكرت أنه من حقي أن ابتسم رضاءا بأني لازلت مستمرا في التدوين لعامين متتاليين أكون قد أصبحت معتوها بين أشخاص من الله عليهم بالعقل فضاقت صدورهم بما يروا ويسمعون اليوم

كنت دوما انا و أبي - أطال الله لنا في عمره - قديما ما ادخل معه في نقاش دائم ومستمر حول الأولويات في حياة الانسان وكنت دوما اجادل اجادل لأثبت صحة حديثي وكانت أولوياتي دوما مختلفة وبعيده عن الدين إلى أن اقتنعت يوما بكلام أبي وأن الأولويه المطلقه لما أمرنا الله به وم خلقنا من أجله وهو العبادة ... وكل ما يكون خارج نطاق العبادة واعمار الارض و ماليس لوجه الله فهو هباء منثورا

واقتنعت تماما بهذا الكلام وبكل ما يدعمه من قرآن وسنة وكنت أظن انني الوحيد في هذه الدنيا الذي كان يوما شارد العقل يخالف هذا الكلام ولكن ومع تفشي مرض الانترنت والذي اصبح بين يدي كل من هب ودب وكل مغفل وعاقل وسطحي وملحد ومتدين ومتشدد وعبيط وسفيه رأيت مالا يخطر ببال ( وعلى راي المثل شيء لا يسدكه عكل )

فبينما اكتب الان كان قبلها بساعات قليله حرب دائره على احدى صفحات الفيس بوك حول عمرو موسى والذي مات منتحرا بشنق نفسه من فوق كوبري قصر النيل لانه لا يستطيع الحياة بدون من احب فقد حوله بعض الناس إلى شهيد وأطلقوا عليه شهيد الحب

وكان أول رد لي قبل أن اسمع بقصة شهيد الحب تلك ( يبعث المرء على ما مات عليه ... هيبعث وهو منتحر عشان مش قادر يعيش الدنيا من غيرها ... لا حول ولا قوة الا بالله ... الواحد مبيسمعش في البلد دي عن واحد مات في سبيل الله ... بنسمع بس عن اللي مات في سبيل النسوان )

وإذا بمن تهاجم وتتهم بأني حكمت عليه بالكفر وأنني من متحجري العقول بينما هو من وجهة نظرها شهيد الحب وشهيد الظروف وأن هذا الشاب قد منحها أمل في الحياة لان هناك من لا يزال يموت من أجل الحب وبدأت في حوار وكانني أحادث نزار قباني وهو يدافع عن ابياته ياولدي قد مات شهيدا من مات فداءا للمحبوب

وتحول المنتحر في نظر وعين الناس إلى شهيد بينما الله سبحانه وتعالى في سورة النساء ينهانا عن قتل انفسنا فهو بنا رحيما ويخلق مع قضاءه رحمة بل ويتوعد من يفعل ذلك عدوانا وظلما بأن يصليه نارا

انا لا أكفر ذلك الشخص فهو بين يدي الله سبحانه وتعالى ولكن لا يصل بنا الأمر أن نسميه شهيدا

هل ذلك الرجل مثل من استشهدوا على سفينة اسطول الحرية وهم يحاولون أن يصلوا بالغذاء والدواء لمسلمون محاصرون منذ 4 اعوام

هل ذلك الرجل يمكن مقارنته بمن استشهدوا في سبيل الله في حرب 73 او ما قبلها من حروب

هل أصبح ذلك الرجل مثله مثل من استشهدوا في الفتوحات الاسلاميه مثل فتح الاندلس ؟؟؟

اذا كان هذا الرجل شهيدا فنلصنع له تمثالا وميدان يوازي ميدان مصطفى كامل او ميدان عبد المنعم رياض ونسميه ميدان العشق والهوى ونشغل فيه اغنية الهوى هوايا طوال اليوم

ليس هو فقط بل ايضا يصبح ميكي ماوس شهيدا ولنصنع له تمثالا في حديقة الطفل لانه مات وهو يحارب دنجل الشرير من اجل طفولة غير مشردة

واهو كله كلام

الأخسرين أعمالا

2010-05-25T11:23:00.008+03:00

يقول الله تعالى فى كتابه الكريم في سورة الكهف الآيه رقم 103

(قُلْ هَلْ نُنَبِّئُكُمْ بِالأَخْسَرِينَ أَعْمَالاً * الَّذِينَ ضَلَّ سَعْيُهُمْ فِي الْحَيَاةِ الدُّنْيَا وَهُمْ يَحْسَبُونَ أَنَّهُمْ يُحْسِنُونَ صُنْعًا )

لم أجد خيرا من هذه الآية الكريمة حتى أبدأ بها ما يجول في خاطري بعدما قرأت خبرا في جريدة اليوم السابع وهي تأخذ برأي بعض ممن قالوا عنهم علماء في ما يدور حول قناة الرحمة من محاولات الإغلاق

فقد أخذت برأي مبروك عطية وسعاد صالح ... وكلاهما للأسف الشديد ينتسبون للأزهر الشريف ولكن مما نرى عليهم لا نجد إلا أنهم يقعون تحت حديث سيد ولد آدم صلوات الله عليه سيدنا ونبينا محمد

فعن أبي ذر { قلت يا رسول الله أي شيء أخوف على أمتك من المسيح الدجال قال : الأئمة المضلين } رواه أحمد من رواية ابن لهيعة

فهم عند كثير من الناس أئمة ولكنهم مضلين

ولكن المدعو مبروك عطية الذي تراه دوما على قنوات دريم بئس الأئمة الذي يتراقص في كلماته ويدعو كل أنثى تهاتفه أو حتى المذيعه التي تجلس أمامه بكامل زينتها ( يا حبيبة قلبي ... ويا ستو أنا ... وياروح بابا ... الست البسكوتايه) أعلن فرحته وسعادته لإغلاق قناة الرحمة التي تبث روح العداء ضد اليهود من وجهة نظره

مبروك عطية صاحب فقه التواطوء والمداهنه والاستكانه والاستسلام الذي يرى أنه لا يجوز سب اليهود رغم كل ما يفعلونه في المسلمين فهو يتحدث بالدين في كل شيء ولكن عندما تأتي سيرة اليهود يتحول الأمر من وجهة نظره القميئة إلى مصريين وفلسطنين وينسى تماما أن هؤلاء الفلسطنين بهم مسلمون موحدون بالله يقولون أن لا إله إلا الله وأن ما من قوم آذوا الرسول صلوات الله عليه مثلما آذاه اليهود

عند تلك النقطه لابد أن نتحول إلى السماحه ... مبروك عطية الذي لا يرى غضاضة في أن يقدم برامج دينية في قناة مزيكا حقا أنت مقامك قناة مزيكا مع راقصين الكلمات بينما القنوات الدينية لم ترقى حتى أن تكون مجرد معد برامج بها فحتى قناة أزهري والتي ما يرى فيها الكثير تهاونا وتيسيرا غير مرغوب لم ترقى لأن تكون بها حتى معد برامج ليس لأنك ارقى لا سمح الله ... بل لأنك لا ترقى لأن تكون بأي من تلك القنوات

أما سعاد صالح فحدث ولا حرج .. سعاد صالح التي تشمئز من النقاب ولا حتى تحترم الخلاف الفقهي القائم حوله بل وتعتبر أن مرتدية النقاب جاهله ومتخلفة

سعاد صالح التي على خلاف كل أهل العلم ضعفت حديث النامصة والمتنمصة لأنه لا يأتي على هوى حواجبها

سعاد صالح التي تشيد بأداء يسرا العظيمة على حد قولها في مسلسلاتها وأفلامها سعيدة بإغلاق قناة الرحمة بل وتطالب بإغلاق قناة الناس

سعاد صالح التي تفتي بأن من حق الرجل إغتصاب زوجته مخالفة حديث الرسول صلوات الله عليه بأن لا يحط أحدكم على زوجته حط البهائم وكأن ما أمر به الرسول لا يصلح لديننا اليوم

سعاد صالح التي أفتت بخروج المرأة المتوفى عنها زوجها في عدتها في أي حال لها مخالفة أحاديث الرسول

سعاد صالح التي تريد أن يتم سن قانون يمنع سفر الزوج إلا بإذن كتابي من زوجته

سعاد صالح التي تبيح التصدق بالمال لترقيع غشاء البكارة ( ودا تحت أي بند من بنود الصدقة يا دكتورة ؟؟ )

سعاد صالح التي تدعو لإخصاء الشواذ جنسيا ... وكأن حدود الله كلها اختفت وبقيت لنا حدود سعاد صالح

هذه السيدة لا تعجبها قناة الرحمة ولا قناة الناس لانها تفتي بما ليس على هواها بل وتعرب عن بالغ سعادتها لاغلاقهم

كل ما كتبت ما كتبته إلا فقط للتعريف بمن لا تعجبهم قناة الرحمة والقنوات التي على منهجها وللأسف الشديد فهم يقولون أنهم دعاة

وأهو كله كلام

تحديث : تم حذف الجملة الذي نبهني لها اكثر من شخص .... اللهم اجعلنا ممن يستمعون للقول فيتبعون أحسنه

باقين رغم أنف الحاقدين والغافلين

2010-05-20T19:23:00.004+03:00

نعتذر عن التغيب ولنا أسبابنا

والسبب الرئيسي للكتابه هو نشر تردد قناة الرحمة الجديد بعد أن تكالب اليهود وغير اليهود على كل من يقول لا إله إلا الله

ولكننا باقين رغم أنف الحاقدين الذين يكيدون لديننا

وباقين رغم أنف الغافلين الذين يحملون في هوياتهم ديانة مسلم وهم لا يعرفون من الإسلام إلا اسمه اللهم لا تجعلنا منهم

باقين باقين باقين

التردد الجديد لقناة الرحمة 10873 رأسي ... ومعدل الترميز هو 27500

ونعتذر عن إغلاق الردود في هذه التدوينة

اللهم انصر الاسلام وأعز المسلمين وأرزقنا شهادة في سبيلك ترضيك عنا

آخر الأخبار: مصنع أم زينهم

2010-04-14T20:53:00.006+02:00

تمكن مصنع ام زينهم من اطلاق اولى الطائرات الورق والتي تعتمد في تصميمها على شكل مثلث ومصنوعه من ورق الكراريس و خشب الغاب اللي بيطرح رباني على تورعة بلد الشاب زينهم والذي اخترع الطائرة وسجل براءة الاختراع برقم زيرو صفرين صفر 3 أصفار .. وقد قررت السيدة أم زينهم سيدة الأعمال الفاضلة من إنشاء المصنع لإبنها بدل الفضا والفراغ اللي هو فيه وأهو أي حاجه يتسلى فيها الواد

كما ان المصنع لضمان الجودة لزق ورق الطائرة في خشب الغاب بالنشا وذلك توفيرا للكولة ودعما لحملة خلوا بالكم من عيالكم حتى لا تساهم في انتشار ضرب الكولة بين صبيان المصنع اللي طول الليل يلزقوا

كما انها طرحت باكورة انتاجها في الاسواق منذ 10 ايام الا انها وجدت ان الكمية قد نفذت تماما في اليوم الثاني فقررت مضاعفة الكمية المنتجة الامر الذي ادى الى سحب كل النشا من السوق وحدوث ازمة في المعروض من النشا فتكاتفت غرفة الصناعه وقررت منح كل الصلاحيات لمصانع النشا لمضاعفة إنتاجها وقد قامت وزارة الصناعه بإستيراد كميات كبيرة من الذرة العويجة لتغطية كم الانتاج للنشا حتى يتثنى لمصنع ام زينهم انتاج الطيارة الورق والتي تقرر تصديرها لكل دول المنطقة عشان عيالهم يطيروا طيارتهم ويلعبوا

ولكن الدوله الاجنبية الموردة للذرة العويجة قررت رفع سعر الذرة العويجة بحجة انها بتأكله للبهايم عندهم وانها بتعمل منه الفشار وهذا حقدا منهم على عدم تمكنهم من الوصول لذلك الاختراع الجبار الذي قام بانتاجه مصنع ام زينهم على ايد ننوس عين امه زينهم

فقررت المصانع البحث عن دولة اخرى لتوريد الذرة العويجة وقد وقع الاختيار غالبا على الصين .. او الهند

وقد قوبل اقتراح السيد مواطن غلبان بالرفض التام من قبل السيد كرش العز حينما اقترح زرع الذرة العويجة في مصر حيث انه فاح من اقتراحه رائحة خبيثة وقام بالرد عليه السيد كرش العز بقوله :

هما دول اللي عايزين يعطلوا مسيرة الانتاج في بلدنا ... لو استنينا لما الدرة يتزرع هنستنى 6 شهور كاملين الامر اللي ممكن يضر بمصالح مصنع ام زينهم وكمان ممكن يخلي دولة تانيه تسبقنا في تصنيع الطيارة الورق وكمان الدرة العويجة عيدانها طويلة وممكن يستخبى فيها الحرامية فاحنا نستوردها اسهل واهو منه نشغل مكتب زناتي للإستيراد والتصدير وللعلم زناتي دا أخو زينهم عشان الشعب يعرف اننا بندعم الاسر المنتجة

وبهذا تصبح مصر هي الدولة الاولى التي تنتج الطيارة الورق في العالم وهو سبق صناعي لم يحدث من قبل ولن يحدث لإن مافيش دولة هاتقدر تنتج الطيارة الورق

حتى اسألوا الست ام زينهم

يعني ايه كلمة وطن ؟

2010-03-30T22:04:00.004+02:00

كلما وجهت هذا السؤال لشخص ما وجدت اجابته اما ان تكون (حالة من الشجن) أو (اسأل محمد فؤاد) صاحب أغنية يعني ايه كلمة وطن أو ربما تكون الاجابة كما أجاب أخي ( انا وطني مخلص وبطنطن وباغني في حبك يا وطنطن ) فعرفت أن الاجابة حقا معقدة وأن الوصول لجواب شافي قد يستلزم دهرا

ما الدافع لأن أحب بلادي ؟؟ وحتى لا يظن أحدا اني أحض على كره الوطن انا فقط أتساءل ما الدافع لدي أو لدى من يقرأ لأن يحب بلاده ظللت أبحث عن الدوافع كل الدوافع التي قد تجعلني أقول لهذه الأسباب أحب بلادي ... فوجدت أن حالة الحب هذه هي حالة مرضية مثلها مثل حالة ابن ولاد الذوات الذي أحب راقصة من ملهى ليلي وترك من أجلها كل الدنيا ... مع فارق التشبيه بالتأكيد فالراقصة لديها الدوافع التي من أجلها ترقص بينما بلادي ليس لديها دوافع لقهر وظلم ابناء بلادها وتمييز آخرين على حساب آخرين

حاولت كثيرا أن أفهم ماذا تعني كلمة وطن لشخص يحيا منذ أن فتيت سواعده في بلاد أخرى يعمل ويرزق من رزق الله في بلاد ليست بلاده ويعود ليجد بلاده ليست كبلاده

وحاولت كثيرا أن أفهم كلمة وطن وأنا وكثيرا غيري كل يوم نبحث عن عمل ونستجدي كل الابواب فلا نجد فيها ما نشعر به أننا نحيا في بلادنا

وحاولت أن أفهم معنى الوطن لشخص يموت بيد شخص من نفس بلاده ويضيع حقه بيد أبناء بلاده فتصبح بلاده ليست كبلاده

حاولت أن أتوقف عند كلمة وطن وانا مجند في جيش بلادي لأحمي بلادي ووجدت كل من هم مخولين بقيادة هذا الجيش يعاملون كل مجند بمبدأ أنه عبد سخره فكيف لهم أن يحبون الوطن

وتوقفت كثيرا كثيرا عند كلمة وطن وحاولت أن اقنع نفسي مثلما تعلمت منذ زمن أن ( كل بلاد الدنيا جميلة لكن أجمل من بلدي لا لا لا لا لا )عندما رأيت ابن عمي الذي ولد في بلاد أخرى يصر ان البلاد الاخرى بلاده وأنها أجمل بلاد الدنيا

صدمت كثيرا عندما رأيت أن كل فئات المجتمع إذا قالت لا للظلم تحولوا بجرة قلم إلى خونه وعملاء ضد الوطن

لماذا تحول الوطن فقط لحالة من الشجن ولم يعد حالة من الفرح هل نشع الرطوبة في الجدار تميز الوطن ام انها تؤدي لوقوع الجدار على من يحتمون خلفه ؟؟

وماذا سيحدث لو كنا نحن واهلنا نحيا خارج الوطن ؟؟؟ هل سيظل وطن ؟؟؟

عفوا يا وطن إن أزعجتك كلماتي ولكن ماذا تعني لي وأبسط حقوقي كأنسان لا أجدها بين طيات كلمة وطن

وأهو كله كلام

تحرش جماعي

2010-03-27T21:55:00.003+02:00

ربما يظن الجميع أني سأتحدث عن حالة تحرش جماعي جديده وقعت أو أني قد أتحدث عما كنت أتحدث عنه في موضوعين سابقين بدعوى السخرية من أمور شتى قد تحدث في المستقبل ولكن لا هذا ولا ذاك فحالة التحرش الجماعي التي سنتحدث عنها هي حالة تحرش تحدث منذ ما يقرب من ثلاثين عاما وربما لا يروق موضوعي للكثيرين ولكنه حقا يروق لي .. نعود لضحيتنا في حالة التحرش الجماعي

والضحية المستديمة الغير متغيره المستسلمة هي المواطن المصري بمعظم فئاته مع القليل من الاستثناءات من فئات الشعب الذين نالوا درجة مصري بشرطة أو شرطتين

فكان التحرش في بادئ الامر فردي من نوعية الاستماع إلى اخبار من نوعية المرأة الحديديه التي فرت أو الريان أو السعد فكلهم كانوا حالات فردية لا يتوقف عندها المواطن المصري كثيرا ولا يلتفت فهؤلاء مجرد قلة قليله تسرق وتجري (هذا باعتبار أنهم كانوا لصوص رغم ان الكثير يقال بأنهم ابرياء) حتى بدأت حالات التحرش الجماعي بالمواطن المصري حتى أصبح الوضع كأحداث تحرش العيد في وسط المدينة فتاة في وسط عدد من الشباب وكل منهم يود أن يصل إلى ما قد تطوله يداه فلا يكون منها إلا أن تفكر في أعز ما تملك لتحميه من أيدي العابثين

والمواطن المصري الذي وقع فريسة التحرش الجماعي من الشرطة والصحة والكهرباء والاسعار والبطالة والعنوسة للجنسين وجد أن كل منهم يود أن ينال منه ما ينال فلا يكون من المواطن المصري إلا أن يبحث عن أعز ما يملك ليحميه فلا يجد إلا قوت يومه الذي يعينه على أن يحيا يوما جديدا تحت يدي التحرش الجماعي وكأنه أصبح مستمتعا بحالة التحرش به

فالمصري يستمع كل يوم عن عجز الموازنه وعجز الميزانيه وأنواع عديده من العجز كأنها إجابات منطقية عن تردي وانعدام كل شيء في بلاده ولكن حين وقف النائب أشرف بدر الدين عضو مجلس الشعب ليتساءل عن مصير 1272 مليار جنيه والرقم صحيح بناءا على رواية السادة أعضاء مجلس الشعب كان الصمت الرهيب هو الجواب للنائب

فأثار الصمت حفيظة الدكتور حمدي حسن النائب أيضا فقام ليسأل عن مصير الألف مليار الطايرة في الهوا والتي لم تدرج أساسا في خطة الموازنه فرد عليه خنزير الماليه ( اتكلم براحتك ... محدش هايرد عليك ) لك كل الحق يا سيادة الخنزير ... فقد سببت الدين ولم يثر أي شخص لدينه .... وبالتأكيد لن يتحرك دكر في بلاد خالية من صنف الدكر من أجل 1000 مليار او ما يزيد

والمواطن المصري الذي بات مستمتعا بالتحرش به لدرجة أنه رفع يده حتى عن أعز ما يملك لتنال منه أيدي المتحرشين لا يتساءل اطلاقا أو يوجه اي تساؤل عن الرعاية الطبية التي بسبب نقصها يموت سنويا 70 الف حالة سرطان و40 الف حالة بسبب فيروسات الكبد بالإضافة إلى ضياع 250 مليون جنية سنويا بدعوى العلاج على نفقة الدولة وهم فقط أعضاء مجلس الشعب بينما فر رئيس جمهوريتنا المصون إلى بلاد المكن لاستئصال مرارته وتبعه ابنه ليخرج علينا بفريدته ( حد فاكر قصة شيريهان بتاعة الفوازير ؟ )

والمواطن المصري الذي يظن أن حدود الدولة التي ينتمي إليها تقع تماما في نطاق بيته وعمله فقط مرورا بالشوارع التي يثير فيها سيرا على الاقدام او انحشارا في اتوبيس النقل العام لا يعلم شيئا عن أراضي تباع بملاليم ليعاد بيعها بملايين والقائمة طويلة من عينة حسين سالم والذي ذكر اسمه في كتاب الحجاب للصحفي الأكثر شهرة في العالم بوب ادوارد والذي يعتمد في كتابه على تقارير من المخابرات المركزية الامريكيه .. وحسين سالم وحده يعد لغز من ألغاز بلدنا ولكنه ليس من عينة الشعب الذي يتم التحرش به بل هو وحده يقوم بالتحرش ب 80 مليون مصري (ربنا يديله الصحه) والقائمة لا تقف عليه

فالقائمة تضم اسماءا واسماء من كل الجهات الحكومية والغير حكومية ولكن لا يتعدى عددهم 100 شخص ومن ضمنهم نجيب ساويرس الذي يحيا دور المضطهد هو وعائلته

كلهم يحصلون على أراض بأسعار لا يتعدى فيها سعر المتر لثمن علبة سجائر من النوع المصري ... ليباع نفس المتر بعد عدة أشهر بأسعار غريبة يصل فيها سعر المتر لأرقام تحوي ثلاثة أصفار محترمة ذات قيمة أكثر من قيمة المواطن المصري

بدأ التحرش فردي فصمت المواطن المصري ثم تطور إلى جماعي فحاول المواطن حماية موضع كرامته ولكنه فشل

فطبق القاعده إذا وقعت فريسة التحرش ولم تستطع الصراخ فحاول أن تستمتع

واهو كله كلام

جمهورية الحريم

2010-03-19T03:10:00.010+02:00

اللي عايز يعرف أصل القصة يقرا موضوع مايحكمش

قرار رئيسة الجمهورية بتعديل المادة 8 لدستور جمهورية الحريم (دستور يااسيادنا) ليصبح على النحو التالي

" يتم صرف عدد 1 رجل لكل فتاه تعدت الخامسة والعشرين من عمرها دون زواج على ألا يتم صرف نفس الرجل لأكثر من 4 فتيات على أن تعمل الدولة على توفير الشباب اللازم لهذه المهمة القومية ويعد إلزاما على كل شاب وصل لسن 21 أن يقدم أوراقه لمكتب التزويج "

توقيع رئيسة الجمهورية حسنية مبروك

عانس 1 : اشطة يا بنات هايصرفولنا رجالة للجواز بدل العنوسة اللي خللنا فيها دي

عانس 2: طيب ودا ياختي نصرفه من الجمعية ولا منين بالظبط

عانس 1: لا عملوا هيئة جديدة اسمها الهيئة القومية للقضاء على العنوسة هاتي انتي بس شهادة الميلاد وجواب من السجل المدني انك مش متجوزة وليا واحده قريبتي في مكتب التزويج هاتظبطنا .... لا وايه هاتخلينا ننقي كمان

عانس 3: ليه هو مافيش نقاوة ولا ايه ... هانشيل عمياني كده افرضي طلع حاحا يبقى لازمته ايه الجواز

عانس 2: ياختي بلا نيلة نقاوة ايه ... هو احنا لاقيين بس هو يطلع حاحا وانا اهريه فيجوريكس

عانس 3: بس انا عايزه واحد بالكتير قوي مايكونش متجوز اكتر من واحده قبلي

عانس 1: ياحبيبتي خلصي ورقك انتي وانا اخليها تشوفلك واحد ماتجوزش خالص بس هايبقى اصغر منك حبتين

عانس 3: اه اه انا عايزة واحد صغنن وسنفور كده واهو اخد انا وش القفص

بعد القرار بشهر

موظفة مكتب التزوبج خلف شباك تلقي الطلبات : كل واحده تقف في الطابور لو سمحتي والستات اللي داخله في طابور الرجالة عيب كده كل طابور لوحده

طابور الرجال به 10 رجال ... وطابور النساء يصل ل 40

عانس 1 ( عانس جديده غير عانس 1 الاولى ): صباح الخير يا مدام

الموظفه : آنسه يا حبيبتي وربنا يكرم اهي البشاير هلت وهنختار اامري ؟؟

عانس 1: انا جايه اقدم ورقي بس انتي شايفة الطابور عامل ازاي والتوزيع شكله بالبركة فلو تاخدي الورق بتاعي انا وزميلتي وتخلصيه براحتك تبقي تشكري واحنا عنينا ليكي

الموظفة : الطلب ب 500 جنية دا عشان خاطركم انتوا بس

عانس 2: عينينا ليكي يا حبيبتي وكمان صاحبتنا ممكن نجيبهملك بس عايزين رجاله كده نقاوة حاجه من بتاعة زمان مش العيال اللي بتطلع بوكسراتها بره دي

الموظفه : ياختي بس هو ييجي بتاع البوكسر بره واحنا نخليه على طول جوه .... عيزاكي انتي وصاحبتك بس تقعدي تملي ورق الرغبات وتجيبيه ... يعني عيزاه بيشتغل ايه ومنين

عانس 1: ياحبيبتي بس هو ييجي من غير شغل واحنا هاندلعه

مانشيت جريدة الاهرام

مع أول ظهور إعلامي للسيد زناتي مبروك زوج رئيسة الجمهورية بعد نجاحها في الانتخابات النزيهه الحره امام منافساتها الشرسه .. امينه نور وحمديه البرادعي

" نحن نعمل من أجل حياة أفضل للرجل ... لا للتحرش بالرجال ... لا لقهرهم ... قانون حماية الرجل على وشك الظهور إلى النور في خلال الايام القادمة "

إعلان جريدة الاهرام

"مكتب نصيبك عندنا للتزويج ... اختاري عريسك من بين 1000 عريس ... لدينا رجال عائلات محترمين ... ضمان خمس سنوات"

وأهو كله كلام

ما يحكمش

2010-03-07T20:42:00.003+02:00

من فترة ليست بالقصيرة بدأ العديد من النساء حالة من الفرح بأن تعدادهم بدا يتزايد الامر اللذي أعطاهم شعور بأن ربنا أكرمهم وان زمن النساء قادم لا محالة وأن الرجل ذلك الوحش الكاسر عديم القلب قد ولى عهده وحان وقت عصر النساء للإنتقام وصراحة سيصبح عصرهم عصر ذو رائحة اجمل من روايح جنينة الازبكية ساعة العصاري وسيطير قلب الرجل من الفرحه حين يهم بركوب اي ومواصلة عامة فسيشعر أنه هارون الرشيد في زمانه فمع بداية ركوبه ستهل عليه نسائم من ماركة كريستيان ديور مخلوط بشانيل وينافسهم فيرست وايفسان لورا أو جوتشي

ولكن كلما حاولت أن أتخيل ماهي الكلمة التي يمكن أن نوجهها لعصر النساء لم أجد إلا كلمة واحده ... مايحكمش

فمع ازدياد النساء وبداية انقراض مخلوق الرجل سيصبح أمر معتاد جدا أن نجد دعوى تحرش قام برفعها كريم على المدعوة سنية الحرشة والتي لم تراعي حياء ذلك الشاب المسكين وهو يسير في احد شوارع وسط المدينة

او نجد احد الشباب في وهو واقفا في إحدى المواصلات العامة وإذ فجأة يستدير للفتاة التي تقف خلفه ويرفع يده في الهواء ليصفعها وهو يصرخ والدموع في عينه ( يا قليلة الادب ) وتجد مجموع النساء قد حاوطوا ذلك الرجل يحاولون تهدئته وهناك من قد تتملكها الشهامة فتقف وتطلب من الشاب أن يجلس بدلا من أن يكون عرضة للذئبات البشرية

وقد نجد إعلان كبير في إحدى الجرائد القومية لشركة تديرها احدى سيدات الاعمال من عينة حميده عز وهي تطلب سكرتير حسن المظهر وخبرة 5 سنوات في أعمال السكرتاريه

بل وسيصبح هناك شركات تتفاخر بأن كل من بها من موظفين رجال

ونجد عربات الفول مكتوب عليها ام سعاد والفول للعباد ... او عربة كشري مكتوب عليها بوسي بتقولكم العبوا على ادكم

عندما يأتي عصر النساء فلن يحمل رجل هم شبكه ولا هم مهر ولا هم شقة زوجية ولا هم عفش ... فالنساء ستتكفل بكل هذا

وربما يصل الامر لان نجد سوسن وهي في صالون منزل عمرو وهي تجلس مع والده لتقول له

عمي انا يشرفني اني اطلب ايد الاستاذ عمرو ابنك ... فما يكون من الأب إلا أن يقول لها ... بس عمرو متجوز اتنين يابنتي ... وماله يا عمي الشرع محلل لعمرو 4 وانا هاهنيه واسعده ومش هاخليه محتاج اي حاجه ... ومش عايزاه غير بشنطة هدومه وانا متكفلة بكل شيء

فما يكون من أبو عمرو إلا أن يقول ... بصراحه يا بنتي لازم اسأله الاول وحينما يتوجه لعمرو ليسأله يجد عمرو مطاطئ رأسه في الارض ليقول له إلي تشوفه يا بابا

وأهو كله كلام

هنا القاهره

2010-02-12T16:04:00.008+02:00

قد تستيقظ في صباح مبكر في يوم من أيام القاهره على صوت إرتطام مقدمة سيارة بمؤخرة السيارة التي أمامها فتسمع صوت صاحب السيارة الأمامية وهو يصرخ في صاحب السيارة الخلفية : يخرب بيت اللي جابوك يا شيخ مش تفتح يابن ال..... انت اتعميت عالصبح فلا يكون هناك رد من صاحب السيارة الخلفية إلا أن يقول لصاحب السيارة الأمامية : انت اللي حمار وابن ..... في حد يقف مرة واحده كده ... ايه ماشي في عزبة امك ??

فلا يسعك إلا أن تفتح نافذتك لتخرج برأسك وتقول : الله يخرب بيوتكم في ناس نايمة يا ولاد ال.... يا بهايم

أو تكون عائدا من عملك في ساعة متأخرة جدا من الليل بعد يوم عمل مضني وشاق تبحث عن الفراش بعيونك التي تكاد تسقط على بعضهما وأنت تخلع ملابسك لتخلد إلى النوم وما أن تدخل إلى فراشك وتبدأ عيونك في إغلاق أبوابها إيذانا ببدء نوم عميق حتى تسمع صوت مجموعة من الشباب الضاله من نفس نوعية الكلاب الضاله تسير في الشارع أو تقف أسفل نافذتك يضحكون بصوت عال جدا ويكتشف أحدهم بأن صديقهم (كيشو) قد تخلف عنهم فتجد أحدهم قد رفع قعيرته يقول : كيشو انت فين يابن ...... ما تنجز ياعم الزفت

وتجد كيشو يبادله الرد : استنى يا حيلة امك بجيب سجاير من الكشك

ويطير النوم من عينك بسبب صوت كيشو وحماره عفوا كيشو وصديقه

أو تحاول النوم مبكرا لأن غدا ينتظرك يوم شاق من العمل فتجد إنسيا لا تستطيع أن تصنفه من أي نوع هو (فلا هناك رجالا بهذه النعومه ولا هناك نساءا تنبت لهم لحيه) تجده يقف أسفل نافذتك فاتحا ابواب سيارته ليصدر منها أعلى صوت ممكن لأغنية مطرب الجير (هي دي طيـــــــــــــــبة قلبك) حتى تسمعها صاحبة الطيـــــــــــــــــبة التي تسكن في النافذة التي تعلو نافذتك ويمكنك حينها أن تفتح نافذتك لتقول له ( أمك على أم طيبة قلبها )

أو تكون أحد سكان الدور ثاني والذي يبدأ من عنده مصعد البناية التي تسكن فيها فتجد أحدهم عائدا في وقت متأخر هو وزوجته التي نغصت عليه عيشته فلا يكون منه إلا أن ينغص عليك عيشتك أنت أيضا بصوته وهو يقول لها : يا ولية انتي مبتبطليش زن عايزة كل حاجه في نفس الوقت انهدي يخرب بيتك... أما هي تلك الملاك البريء فما يكون ردها إلا أن تقول له بنعومتها المعهوده له يخرب بيتك انت راجل معندكش دم كان يوم اسود

ولن يلومك أحدا إذا قمت بفتح باب شقتك لتقول لهم الله يخرب بيوتكم انتوا الاتنين صوتكم صحى البيت كله

أو تركب إحدى المواصلات العامه وتجلس في مقعد منفصل من تلك المقاعد الاحاديه حتى لا يلتحم بك شخص عديم الاحساس بخصوصيات الاجساد ... فتجد من هو خلفك قد صرخ هاتفه بأغنية عبد الباسط حمودة ( أنا مش عارفني انا توت مني) فيجيب بلهفه وصراخ وفمه يلتصق بأذنيك .. أيوه يا حاج عزمي والله واحشني انت فين يا حاج .. عباس ؟؟ دا عيل ناقص يا حاج .... لا لا انا روحت له وهو اللي مجاش

فلا يسعك إلا أن تلتفت له لتقول له ( أبوك لأبو الحاج عزمي في ساعه واحده)

أو يحدث لك كل هذا في يوم واحد فلا تفعل إلا أن تحزم حقائبك بحثا عن مهرب من القاهره إلى أي مكان آخر في جمهورية مصر العربية

بالنسبة لي ... سأفر إلى الزقازيق

سعادة جناب البيه السلك

2010-01-29T06:35:00.009+02:00

كنت متخيل ان السلك عند الحكومة بيستخدم استخدامين 2 يضربوا بيه الناس او يوصلوه بالكهربا وطرف منه على اللسان والطرف التاني انتوا عارفين ويخر المتهم بكل حاجه

لكن طلع السلك دا جبار اوي يا جدعان دا عشان جنابه انطس وائل عباس 6 شهور و 500 جنيه غرامه وياريته سلك عادي لا دا سلك نت كمان

طب مش مهم 6 شهور وائل هايعتبرها نزهه وانا متاكد انه بدماغه الحلوة هايعمل حلقات تتذاع في الجزيرة من قلب السجن لكن 500 جنيه عشان السلك ... ليه ... بركاتك ياعم سلك .... الاقيش حد انا يقطع مني حته ويديني 500 جنيه

اللي محدش واخد باله منه انهم قالوا في القضية وفي الخبر انه سلك نت ... يعني مش سلك تليفون .. نفسي اعرف المحامي اللي كان بيدافع عن وائل عباس مطلعوش براءه من اول جلسة ازاي

اولا الحكومة جرمت توصيل شبكات النت في الشوارع واعتبرت ان التوصيل دا اضرار بالشركة المصرية للاتصالات بالاخص وبباقي شركات النت عموما وعليه فإن تهمة توصيل سلك نت من بيت لبيت حتى لو داخل عمارة واحده فهي جريمة تستوجب 6 شهور سجن وغرامة تصل ل 10000 جنية

مش بقولكم الحاج سلك دا طلع جبار ... يقوم الواد اخو الظابط يقدم بلاغ في وائل يقول دا قطع سلك النت (اللي هو توصيله مجرمة قانونا) تقوم المحكمة تنظر في اتلاف ما هو مجرم قانونا لا وتدي اللي اتلفه 6 شهور حبس وغرامة 500 جنيه

على رأي اخوانا الاسكندرانيه احيــــــــه ... احيه يابو سوسو ... يعني ممكن واحد بكره يقدم بلاغ في واحد انه حرق الحشيش بتاعه ولا ايه والتاني يتحكم عليه بايه 25 سنة بتهمة انه كيف الجو ومنجهه وخلاه اخر انسطال

وعلى ذكر كبيرنا الحاج سلك ... سلك النت مش اي سلك اللي بقى تحت ايد كل من هب ودب وبقى الطرطر نت للجميع ... بالصدفه البحته عرفت موقع بمجرد ما تكتب له اسم الموقع يجيب لك ترتيبه عالميا كام وترتيبه في دولته رقم كام وتقدر كمان تشوف اكثر 100 موقع زيارة في دولتك ايه

كانت تنشل قبل ما افكر افتح الصفحة بتاعة مصر ... لكن ماتشلتش وفتحت الصفحة ... ويارتني ما فتحت الصفحة

اكثر 100 موقع زيارة في مصر مافيهمش ولا موقع ديني الا موقع عمرو خالد باعتباره موقع ديني عند بعض الناس وقناعتهم بيه يعني بعون الله غالبية النتيته طلعوا عالم معندهمش دين

طيب بلاش في ناس هاتقولي لا نثق في مواقع النت وانا احيانا بأؤيد الكلام دا

اكثر 100 موقع زيارة فيهم 12موقع اباحي... و27 موقع افلام واغاني ... غير اليوتيوب والياهو والهوت ميل وجوجل وفيس توك اللي واخد الترتيب رقم 2 في اهتمامات نتيتة مصر ورقم واحد جوجل عشان يدوروا فيه على المواقع الاباحيه

6 مواقع كورة غير 9 مواقع الداون لود زي رابيد شير وما شابه

المواقع الاخباريه كانت بتبدا بالمصري اليوم وكان ترتيبه رقم 27 .. واليوم السابع ...وبعد كده الاهرام والجمهورية ومصراوي باعتبار انه موقع يحوي اخبار

مواقع الدردشة ماقولكمش عيش ولا تقوليش ييجي 12 موقع

انا راضي ضميركم مش حاجه تكسف ؟؟

واللي شوفته عند باقي الدول العربيه نفس النوعيه تقريبا مع اختلاف وتفاوت النسب باختلاف التعداد يعني مالوش دعوة بثقافات الدول العربيه كلها اللي شوفت صفحاتها على الموقع دا ... المواقع الاباحيه اللي بيزوروها من بلادهم بالزوفه

طيب المفاجأه ... الصين ... والله ما في ولا موقع اباحي في اكثر 100 موقع زيارة في الصين ... مع ان الصين دول كفره بيعبدوا تمثال بوذا ابو ضفيرتين دا ... مش كده ولا ايه يا مولانا ( مولانا عارف نفسه )

نشوف مصيبة كمان .... اسرائيل في قائمة اكثر 100 موقع زيارة لا تحتوي الا على موقعين اباحيين 2 فقط مقارنة بأن اول 10 مواقع بعد جوجل مواقع اخباريه كلها

باحكي لصديق ليا بيقولي ياعم الصينين واليهود عالم مش محرومة احنا محرومين .... يعني كمان عايز تيجي على الغلابة اللي مش لاقين جواز وتحرمهم من الفرجه ( الصديق اللي قال غير الصديق بتاع كل مرة ) سيبهم يتفرجوا يمكن ميطولوش من الحياه غير الفرجة وبس

وأهو كله كلام

إضافة بسيطة وتوضيح لسؤال اتنشر في مدونة صديقه ... المدونه هي الشعب لابد له من حكومة تشكمه ... الأخت الفاضلة بتسأل ليه حكومتنا هبت وقامت وقعدت تشتم في الجزائر أيام ماتش السودان واحداث السودان

وليه النهاردة مصر تتبع سياسة أطبطب وأدلع إلى أخر مقولة الحاجه نانسي ام عجرم

ليه الدولة خدت سكة الهجوم التام ايام السودان وواخده سكة حبيبي يابو أشرف حاليا

والسبب بسيط جدا ان الحكومة وقتها كانت عايزه تلهي الشعب على ما تعرف تظبط موضوع الجدار يا شيما ودوروا في المواقع الاخباريه الاجنبيه امتى بدأ بناء الجدار هتلاقوا الخبرا الامريكان وصلوا مصر يوم 19 / 11 / 2009 ظهرا وكنا احنا في التلفزيون بنتطمن يا ولداه على عيالنا اللي تايهين في السودان ... وكل القنوات شغاله يا ترى انت فين يا مرزووووق

وعلى ما اصبح الجدار امر واقع خلصت الليله ويالا بقى ناخد الجزاير في حضننا

خيبة الأمل اللي راكبه جمل 2

2009-12-31T08:27:00.004+02:00

لم أشأ أن أقوم بالرد على من تفضلوا مشكورين بالرد على كلامي المتواضع في خانة الردود فلربما لا يلتفت اليها كل من علق فأردت أن أعلق في موضوع منفصل حتى يرى كل من علق ردي على كل ما كتب

ونبدأ بالاستاذ أحمد شريف والذي شعرت معه أنه يتحدث عن المدينة الفاضلة فقد بدأ بان مصر كانت محاصرة من البنك الدولي حتى وقت قريب ولا ادري اي حصار هذا هل هو مثل الحصار الاقتصادي الذي ظلت تحته دولة كليبيا حتى عام 2002 او السودان حتى عام 2003 او حصار اقتصادي كماذا

هل هو الحصار الذي اجبرنا على بيع الغاز لاسرائيل ام الذي اجبرنا على اتفاقية الكويز ام هو حصار أجبرنا على صنع جدار فولاذي لمنع دخول الغذاء لأهل غزة ؟؟؟

أم انه حصار كالذي تقع تحت منه غزة ؟؟؟ اي حصار

ثم اعتبرت المقارنة بالصين ظالمه لان الصين لم تقع تحت كل ما وقعت تحته مصر ثم ذكرت انه اذا ذهبنا للصين فلن نجد نظاما افضل من لدينا بل نظامنا افضل ؟؟؟؟!!!!!!!!

هل أنت مقتنع بما تقول ... ان كان النظام ليس أفضل مما لدينا فلماذا لم نصل إلى ما وصلت إليه الصين من حجم الانتاج ... او حتى ما يتناسب مع التعداد ... واذا كان النظام ليس بأفضل فلماذا نلقى اللوم على الظروف التي مررنا بها فأجلت تطور أوضاعنا الاقتصادية والتي جعلت دول كدولة الصين تسبقنا .... اقرأ في تاريخ الصين وسترى حجم المشاكل الاقتصاديه التي عاصرتها الصين قبل عام 1978 وكيف انهار اقتصادها كلية حتى بدأت بالانفتاح الاقتصادي وبدأت تقاوم حالة الركود الاقتصادي لديها ... ولترى لماذا حاربت الصين في كل المحافل الدولية لضم هونج كونج

يا اخي العزيز ان لم نجلد ذاتنا اليوم للخروج مما نحن فيه فمتى سنجلدها ؟؟؟

تحياتي لك ولمرورك

أما الأخ العزيز أحمد رضوان فثقوا أنه يتحدث من نابع بيئته الأصيلة والمتأصله والتي تدعو للاعتزاز بالنفس ولكن ألا ترى معي يا أخي أن من محاسن الامور النظر للسوء فينا وإصلاحه ثم انا هنا اتحدث في امر عام وليس في صفة فردية لنذكر ان كل يرى بعين طبعه

ثم من قال لك أني لا أرمي لهدف ... هل السعي خلف مجتمع عقلاني يفكر وينمو وينتج اليس هذا هدفا ... ان انتمائي فقط هو ما دفعني لأن أتحدث عن المصري اليوم الذي لا يمت بصلة لمصري الأمس فمصري الأمس عندما غلا عليه الخبز خرج في مظاهره وأجبر حكومة كاملة على التراجع عن قرارات رفع الدعم

اما مصري اليوم فأنت وانا نعرفه ضاع وسط دوامات عديده ولا أعرف سر ذكر جملة جميلة بوحريد في الأمر ولكن كل ما أعرفه أن الله سبحانه وتعالى أمرنا ألا نصمت حين نرى سوءا

فالله إذا أراد أن يهلك قرية أمر مترفيها ففسقوا فيها ولماذا يهلك الله تلك القرية .... لأنها صمتت عن الحق فأشاعت الفساد وتركت الفساد يستشري بينهم ........ أولا ترى أن مترفيها يفسدون فيها ؟؟؟

تحياتي لك ولجميلة بوحريد

الاخت norahaty

قوميتنا العربية ليست لها علاقة بفشلنا اطلاقا ان فشلنا مربوط بعقولنا وان كان هناك من ضيع حقوقنا بين العرب قديما فهناك من حافظ علينا ولكن هناك من ضيع حقوقنا وهيبتنا وادميتنا واستسلمنا له

تحياتي لكِ

عصفور طل من الشباك هي ليست مشاعر حمقاء بل هي حماقة شعوب وحماقات الشعب المصري ليست في المباراه فقط فهناك العديد والعديد من الحماقات يمكن ذكرها كقراءة للفترة الاخيرة فقط ... فحماقات الشعب المصري بدات تظهر واضحة جلية بداية من نهاية الثمانينات بعد ان بدات المحرقة الكبرى للشعب المصري

تحياتي لكِ

الاخ الكريم المدونة الاسلامية الذي شرفني بزيارته وأيد كلامي ولذا فأنا فقط قدمت له صورتين ليرى حقيقة ما وصلنا إليه

الاخ mhmdwahab انا لا أؤيد كلامك فقط بل لدي شهود عيان مصريين مقيمين في الخرطوم اقسموا بالله ان كل ما اذيع ما هو الا كذب وافتراء

أي اننا تقريبا قاطعنا دولة وتمخض كل فرد منا وانا منهم بالدفاع عن وطنه بناءا على كذب حكومته

تحياتي لك

صديقي مهندس مصري

هيا بنا نردد شعار الرئيس المنتظر .... توزيع غير عادل للثروة خير من توزيع عادل للبؤس ... هذا تبرير الرئيس المنتظر عن تقارير البنك الدولي

تحياتي

الاخ العزيز شاب فقري

هاكلمك بالبلدي اديني امارة ان البلد دي احسن من غيرها بوضعها الراهن ... وبوضع شعبها الراهن

وسيبك من كلمة انها بقالها 7000 سنة بتتسرق دي لانها ايام الفراعنه مكانتش بتتسرق ... وايام الفتح الاسلامي مكانتش بتتسرق

وايام الملك فؤاد مكانتش بتتسرق .. وايام الملك فاروق نفسه مكانتش بتتسرق وراجع وضع مصر الاقتصادي في الفترات دي وانت تعرف

اديني امارة ان احنا كمصريين النهاردة وباتكلم وااكد على اني باتكلم عن المصري بتاع اخر 30 سنة مش المصري اللي كان قبل كده اديني اماره انه احسن من غيره ... احسن من مين واحسن منه ليه وفي ايه في مستوى التعليم ؟؟ يبقى بنكدب على روحنا لان تعليمنا ولله الامر من قبل ومن بعد طين لا مؤاخذه في اللفظ ... في مستوى الدخل يبقى احنا كدابين ونستاهل الحرق ... في مستوى المعيشة .. دا احنا مبنلاقيش العيش الحاف ... طب احسن من مين في ايه .... الامارات العربية المتحده اللي كانت صحراء لحد سنة 79 كانت مجرد صحراء بقت من افضل دول المنطقة في كل حاجه واهي كدولة معندهاش غير البترول بس ... واحنا عندنا بترول وغاز وثروة بشرية وزراعيه وصناعية وسياحه .. طب بيروحوا فين ... احنا احسن من مين قولي يمكن اصدق ؟؟

تحياتي لك

الاخت ولاء تحياتي لمرورك ونحن فعلا نعام ندفن رؤوسنا في الرمل

شرشر اجدادنا فعلا بنوا الاهرامات بس احنا بنلعب في الطينه

...

الاستاذ العزيز فشكول انا هاعتبر حضرتك شاهد على عصرين ... وشاهد على جيلين من نفس الشعب .... ارجوك قل لهم كيف كان المصري بالامس ... وكيف مصري اليوم .. اما موضوع العجبه فدا فعلا احنا مصورين نفسنا كشعب اسطوري لا يجوز القرب من سيرته الا بكل فخر

فهو الشعب اللي دهن الهوا دوكو وعبا الشمس في قزايز

ليس مصطفى كامل فقط اضف له محمد ثروت صاحب اغنية كل بلاد الدنيا جميلة لكن اجمل من بلدي لا .... وخد لا لحد اخر السطر

تحياتي للجميع

خيبة الأمل اللي راكبة جمل

2009-12-20T06:51:00.007+02:00

بعد أحداث عديدة بدأت حملة نظمها مجموعة شباب على الفيس بوك تحمل اسم ( أنا مصري ... انت مين؟؟ ) كنوع من الفخر الكاذب ومحاولة التقليل من شأن من اعتدوا على المصريين في الخرطوم

وبدات الرسالة تصل لي بمعدل 5 مرات في اليوم الواحد من 5 أفراد مختلفين إلى أن وصلت لي بعدد 96 مرة أي أقل من عدد من هم متواجدون لدي بجزء بسيط

والرسالة بالتأكيد يعرفها من يقرأ كل هذا الموضوع فهي تبدأ ب (أنا جائزة نوبل في الادب .. انت مين ؟؟ ) ومضاف عليها نجيب محفوظ

والصور تباعا تباعا مرورا بجمال عبد الناصر والسادات ثم صورة مبارك كقائد حكيم ... انت مين ؟

فبين عشية وضحاها أصبح الرئيس من وجهة نظر 96 فرد داخل قائمة عشوائية مكونة من 103 فرد قائد حكيم بينما لم يكن رأي المصريين كذلك قبلها بأيام وليس هذا محل حديثنا

ولكن هل نحن حقا مصريون اليوم نصنع المعجزات ؟؟؟؟ هل نحن حقا نختلف عن الشعوب الأخرى ومتميزون التميز القاطع

انا لا اتحدث عن الفراعنة فأنا لست أحمس ... ولا أتحدث عن من طاردوا التتار فلا أعرف لي فيهم جدا ولم اكن متواجدا ... ولا أتحدث عن من ذهبوا للجزائر لمناصرة المقاومة فلم تلدني أمي في ذلك الوقت ... ولا أتحدث عن من حاربوا في 73 فلست أنا عمي الذي حارب ضمن من حاربوا

انا أتحدث عن نفسي اليوم أو عن مصريين اليوم ... هل حقا نحن المصريين ( مجبتناش ولادة ولا في زينا ... واحنا اللي دهنا الهوا دوكو )؟؟

لكي نعرف قدر أنفسنا وحجم تضارباتنا العقلية اليوم قبل أن نتحدث كأننا أتينا بما لم يؤتى علينا أن نرى ماذا فعلنا نحن المصريون في العشرة أعوام الماضية فإنتهاءا بجائزة نوبل التي حصل عليها العالم الأمريكي ( المصري الأصل ) أحمد زويل لم نرى شيئا يستحق حصلت عليه مصر كدولة بها 85 مليون نسمة

سوى أننا نهلل ونكبر لإنجازات رياضيه لا يستفيد منها الشعب في شيء سوى أن يزداد فقرا ... يفوز المنتخب بكاس الامم الافريقية فيحصل اللاعبين على أرقام مليونية المسمى كجائزة لهم بينما لا يحصل الشعب إلا على نبحة صوته وهو يجلس أمام المباراة ويصرخ ( شووت بقى يحرق ....)

ولم نرى تقدما في قطاعا اقتصاديا واحدا سوى تقدم الأسعار إلى الأمام

والمجتمع ... حدث ولا حرج فقد أصبح المجتمع المصري من المجتمعات الغير متوازنه ثقافيا أو اجتماعيا ... وتحول التفكير الاجتماعي والثقافي للمجتمع دوما إلى نظرية المؤامرة

غير أن المجتمع المصري دوليا أصبح مجتمعا غير مرغوب فيه ودعونا من فكرة ( عشان نضفناهم وعلمناهم ) فنحن (منضفناش حد ) لوجه الله تعالى هذا لو كنا فعلنا ذلك فعلا كما أن من ساعد في بناء وتطوير أي مجتمع عربي هو ليس نحن مصريون اليوم

فمن فعلوا ذلك فعلوه بناءا على دوافع وعقائد وأفكار تخص وقتهم هم ولا يجوز ان ننسب الفضل لأنفسنا اليوم ونحن لم نفعل شيء بل نحن نسعى دوما لأن نشوه صورتنا بأساليبنا الملتوية التي تندرج تحت بند الفهلوة المصرية يوما بعد يوم

كل هذا يرجعه كثير من الاشخاص إلى زيادة حجم السكان ( شماعة التضخم السكاني) فهذه الحجة لا تعد حجة مقنعة بكل المقاييس فبعقد مقارنة بسيطة جدا جدا بين مصر والصين نجد التالي

الصين كتعداد سكاني أكبر من مصر بمقدار 15 ونصف مرة اي أن تعداد سكان الصين يساوي تعداد مصر 15 مرة بينما المساحة الكلية للصين اكبر من مساحة مصر بمقدار 9 مرات فقط اي أن مساحة الصين تساوي مساحة مصر 9 مرات فقط

الصين تحولت إلى جمهورية في عام 1949 أي قبل مصر بثلاثة أعوام فقط بينما المسافة الفاصلة بين مصر والصين اليوم تقدر ب 50 سنة ضوئية هذا مع النظر بعين الرحمة للشعب المصري الغلبان

منذ أن قامت الثورة الشيوعية في الصين لم يحدث وأن تغير فكر الصينين سوى فقط في عمليات الانفتاح الاقتصادي عام 1978 بل مستمرين على خطى الشيوعيه (المتخلفة) ولكنهم حولوا هذا الفكر إلى فكر ناجح بستشهد به حتى يومنا هذا رغم انهيار دولة الرعاه الرسميين للشيوعيه

بينما المصريون يمر عليهم كل اسبوع فكر جديد (طحن) فتبدأ بالشيوعيه او القناع المغلف لها الاشتراكية ثم الراسمالية ثم الرأسماليه العمياء ثم نظام الاقتصاد الحلمنتيشي ( اللي ماشي ببركة دعا الوالدين )

الصينيون رغم أنها دولة ذات تاريخ عريق مثل تاريخ الفراعنة فلم نر صيني يقول (جدي اللي بنا السور) بينما نحن ليل نهار نغني ( احنا اللي بنينا الاهرامات) ويبدوا أننا لم نبني سواها رغم أن كلمة ( احنا ) تعنى أبناء هذا الجيل الذين لا يستطيعون بناء أكتر من عمارة 10 أدوار منهم 5 أدوار مخالفة لتنهار على رأس سكانها

وحتى لا نتطرق إلى مقارنة أكبر تصيب كل من يقرأ باليأس والإحباط وخيبة الامل (اللي راكبه جمل) سنتوقف عن المقارنة مؤقتا

ونعود للشعب المصري أساس المشكلة في ( خيبة الأمل اللي راكبة جمل ) الذي لا يعترف إطلاقا بما أصابه من عطب إجتماعي قوي

بل يستمر ليل نهار في السخرية من كل ما يحيط به من دول العالم الآخر على اعتقاد أنه أفضل منهم وأنه هو المصري وكأنه سيدخل الجنة لمجرد أنه مصري .

فتجد مثلا مصري يسخر من رئيس دوله كرئيس الجماهيريه العظمى ويدعي أنه رجل مصاب بخلل عقلي وأن بلاده منهاره وهذا يدل على الجهل التام

فمعدل التنميه في ليبيا وصل لرقم 7.9% بينما هو في مصر 5.8% رغم أن ليبيا كدولة تعتمد في غذائها على الواردات وهي دولة مستوردة حتى للأيدي العاملة في مجالات عديدة ليس لنقص الخبرة لديها بل لنقص التعداد اللازم لهذه المجالات ورغم ذلك فمعدل التنمية لديها أعلى من مصر

وعندما أطل اعلامنا على السودان في الفترة الأخيره لم نجد إعلاما يتحدث بمصداقية بل تحدث بكامل عنجهية

معدل التنمية في السودان 7.5% أي أنه أعلى من معدل التنمية في مصر رغم كل ما فيه من مشاكل سياسية وأبسط دليل أن الجنيه السوداني يوازي 2.5 من نظيره المصري ( وكلامي هنا مكرر)

ولكن المصري بكى بكاء النساء في حادث عبارة السلام ولم يسخر من حكامه ولم يقوى على المطالبة بحقه

والمصري لم يطالب بأي شيء حين اختفى من بين يديه سلعته الاساسيه الخبز

المصري ظل مكتوف الأيدي عندما انهارت صخرة الدويقة وقتلت من قتلتهم

المصري رضي بأكياس الدم الملوثة ولم يحرك ساكن

المصري أكل القمح الفاسد وقال (اديني كمان)

المصري يقرأ بمعدل نصف كتاب في العام

المصري الذي يفهم في الميكانيكا والنقاشة والطب والطبيخ والغسيل والنجاره نسبة العاطلين في بلاده 12% هذا غير البطالة المقنعة

المصري يوهم نفسه أن امريكا نفسها بها بطالة ... بينما نسبة البطالة في الولايات المتحده لا تتعدى 5.8% وهي تسمى بطالة اجبارية وتستعين بها الحكومة في أوقات معينة

هذا هو المصري اليوم ليس له حول ولا قوة ولا يعرف سوى التحرش والمخدرات وقناة ميلودي والحديث عن الكرة والجنس

المصري اليوم هو أسوء نسخة من المصريين ظهرت على مر العصور ... فهو خانع خاضع قانع بالذل لا يحرك ساكن

ثم يبدأ بعد ذلك بقول انا مصري ... انت مين ؟؟؟

لو ظلمت الحكومة المصرية الشعب المصري قيراط ... فالشعب المصري يظلم نفسه كل يوم 24 قيراط

إن الله لا يغير ما بقوم حتى يغيروا ما بأنفسهم

حياه أخرى أجمل (قصة)

2009-12-14T14:00:00.007+02:00

عندما تتوه خطوات الإنسان بين كل الدروب .. وحدها هي لحظات الأمل والحلم التي تصنع له احساسا بالنشوه مثلما يفعل تماما مخدر الأفيون في عقل الانسان

بين لحظات الأمل وعذابات الألم تتوه خطواته وتتعثر في الطريق فلا يعرف أين يمضي ولا كيف أتى لتلك النقطة فكل ما مضى يمر أمام عينيه كحلم ثقيل طويل رغم أنه مر بسرعة خاطفه وهو يجلس خلف شاشة لا تتغير أبعادها في أعين كل المحيطين به ولكنها أمام عينيه العالم بأثره فبها كل من يعرفهم ... ومن لا يعرفهم

يتهمونه بالجنون أحيانا ويسمع عبارات تنطلق من أفواههم ككرة عنتر يحي التي لم يتمكن الحضري من التصدي لها ولكنه استبدل الحضري من عقله وبنى بدلا منه حائطا من الرصاص يمنع مرور العبارات المقذوفه إلى مرمى عقله بل ولا ينتبه احيانا لما يقولون رغم أن جل أحاديثهم موجه إليه

ربما من المستحيل أن تحيا منفردا في هذا العالم ولكن من المؤكد أنه يمكنك أن تنفرد بذاتك إلى حد التوحد مع نفسك ونسيان كل ما يحيط بك ليس لأنك تكرههم ولكن لأن كثير من الأمور تحتاج أن تتخذ فيها قرار ... وقد طال صمته ولم يصل إلى قرار

هناك دوما من ينتظر منه قرارا وهذا ما يؤرق عقله فهي تنتظر منه أن يقرر مصير حياة كاملة في لحظات أو ايام بينما تحفظاته قد ازدادت في فترات وجيزه

اختيار حبيبه قد يختلف تماما عن اختيار زوجة فكلا الاختيارين مرير وأمر منهما ان تقرر الانفصال عن من تحب حتى وان رأيت كل ما هو يشير إلى عدم امكانية اتمام العلاقة

ربما لم يدرك ذلك حينما أعلن انه أحبها ... أو لم يدرك ذلك عندما همس أنه يريد أن يكمل عمره معها ... أو ربما أدرك بعد فوات الأوان

بالتأكيد لم يخدعها ولم يحاول هي أعترفت بذلك .. ولكنها لم تعترف بعد بأنها هي من وضعته في توحده ولكنها تنتظر قرار

ولن تجد قرار .. لأنه أصبح عاجزا على اتخاذ قرار

(2)

(يتورط الإنسان في كثيرين ... ويتورط فيه كثيرون لتبدأ متاهه تحتاج لخريطة أو لمعجزة للخروج منها )

أتت هذه العبارة في وقتها تماما ربما كانت كعلامة أو اشارة له بأن الأمر معقد وان علاقته بها ليست كاي علاقة فهي حقا تختلف عن الأخريات

وهي حقا لن تصلح له في يوم من الأيام لأمور تتعلق بها

وهي أيضا لا تنتظر قرار ... لأنها لم تصرح بأنها تريده ولكنها تعشق فرارها منه ... وتعاود الاقتراب كلما وجدته قرر العدول عن ملاحقتها ... لم يعدل ابدا عن اللحاق بها ولكنه ربما لا يعرف كيف يصل إليها

يلعب بعقله حلقات دخان سيجارته ... وهي راقدة بجواره ... السيجارة ... فقد اعتاد ألا يرقد بجواره أحد ... يتركها يتجول بعيدا يقف أمام شاشة أخرى لا تختلف كثيرا عن الأولى إلا في عدم قدرته في التحكم في سريان أمورها

يتركها ... يعود لشاشته الأولى ... يذهب لفراشه ... يرقد ... ينتفض من رقدته

أيام تلو أيام ... ولا يذكر متى استقر خلف الشاشه .. او متى تركها

ولكنها تسكن خلف شاشته فيعود ليجدها تنتظره هي قالت له أنها ستنتظره ... هل هناك من تنتظر حقا ؟؟؟

هل تنتظره هو حقا ؟؟

هل هناك ما ينتظره ؟؟

نعم الفراش ينتظره فعليه أن يذهب إلى هناك فهناك دوما حياه أخرى أجمل

ملحوظة : الجملة بين الأقواس من كتاب عمر طاهر ( جر ناعم )

تهييس الفضا

2009-11-26T19:16:00.004+02:00

كنت أنوي أن أكتب موضوعا أشعرأنه ذات أهميه بإسم أهل وادي النيل ولظروف خاصة قررت أن أؤجل هذا الموضوع إلى أن يشاء الله

لكن اللي جه على دماغي بقى اني بقالي فترة باشتغل نفسي ... فعلا باشتغل نفسي

بدأت الاشتغالة لما أوهمت نفسي وخليتها مقتنعه تماما ان الشغل اللي كنت فيه أصبح غير ملائم ليا .... هو من البداية غير ملائم إشمعنى في اليومين اللي أوهمت نفسي بدا سبت نفسي للاقتناع بالفكرة دي

مش عارف ... بس انا ويمكن لأول مرة في حياتي بأقر وأعترف إني كنت غبي ... وبقولها لأول مرة بالفم المليان فعلا كنت غبي

ساعة مرت عليا وانا قاعد بين كلمة غبي اللي في السطر اللي فات وبين السطر اللي انا فيه دا راجعت فيه كل تاريخي الوظيفي من أول ما فكرت لأول مرة في حياتي اني اكون عضو منتج في المجتمع

قبل ما اكمل كلام ... الموضوع دا مجرد كلام لا يودي ولا يجيب ... حكاوي يمكن فارغه كمان اللي بيمل بسرعه مايكملش

اول مرة اشتغلت فيها فعليا كان عمري 16 سنة كان مع والدي في شركته ... كان ابويا لسه ماقتنعش تماما اني ممكن أكون نافع له أو لاي حد فبدأ شغلي من المخزن

عربيات التوزيع عايزة تتحمل يا احمد ... حاضر يا بابا

شيل الكراتين عدل يابن ال.....حاضر يا بابا

اجازة الصيف كلها تقريبا عدت بالشكل دا ... ما بين تحميل عربيات التوزيع ... وشتيمة حلوة من ابويا عشان اشيل الكراتين مظبوط

ورجعت للدراسه وجه الصيف ورجعت للشغل وفضل الحال بالشكل دا سنتين لحد ما أبويا وثق فيا وخلاني اكون مندوب وكان عندي 18 سنة وكنت بعد ما خلصت اولى كلية تجارة ...

بجد دي كانت بداية اثبات الذات ... جميع الفئات اللي ممكن تتخيلوها اتعاملت معاها ... من بقال بسيط لحد تاجر ممكن ينصب عليا في اي حاجه ان شالله ربع جنية المهم يحس انه كسبان

خلصت كليه ... مش على طول كده ... الكلية اللي بتخلص في 4 سنين خلصتها في 6 ... ليه بقى ... فاضيين ؟ طب كويس

نقول ليه وانا في 3 كلية كنت لسه مصدوم أول صدمة عاتشيفية ... نظام الوسادة الخالية ... وحبيبي دائما وأي حاجه تتخيلوها كنت عايشها في السنة دي وسقطت

ودخلت قسم اقتصاد وكان املي اني اخلص وادرس بعد منه ادارة اعمال ... وهانحكي دا في الاخر

وسبحان الله اذ فجأة اكتشفت اني باحب الاقتصاد جدا لاقيت نفسي بأبدع في القسم دا .. ان كان في المواد العملية او المواد النظرية .. لا والاحلى كمان اني بدأت ادي دروس وانا في 3 كلية حاجه كده على خفيف

دخلت 4 كلية ومن الترم الاول كان عندي 16 طالب كلهم في سنة اولى .... وانا اللي بشرح لهم ... شغل الاجازة موجود مع ابويا مراحش

ويصادف انه كان عندي دكتور ... الله يسهل له مطرح ماهو قاعد ... ابنه مكانش عارف يحل مسأله في التحليل الكلي وانا اعمل فيها دكتور واقوله تعالى وانا احلهالك واحل المسألة لا والاحلى اني اروح كاتب اسمي في اخر الحل

دا كان في الترم الاول من سنة 4 .... خلاص عرفتم انا سقطت في مادته ليه

بدات الترم التاني وانا املي اني انجح صافي فيزودوا درجات الرأفه على مادة الدكتور دا فانجح ... وكان موضوع الدروس دا فتح معايا وكان ليا واحد صاحبي معيد الله يستره كان بيساعدني في انه يديني ملخصات ليلة الامتحان

وبقى عندي بدل 16 طالب 32 طالب .... بقيت زيي زي المعيدين بالظبط

وهووووووووب عندكم مادة سياسات نقدية ياولاد في الترم التاني كان هيدرسها الدكتور جمعه لكن الدكتور جمعه اعتذر واللي هيدرسها الدكتور عارف ..... تمام كده انا شلت المادة دي كمان

ما علينا عشان منطولش في الجامعه شيلني مادته ومادة دكتورة كمان وعدت السنة

وانا بأعيد السنة بطلت موضوع الدروس دا لاني اشتغلت في مركز دورات كمبيوتر وكنت انا اللي بشرح فيه ويندوز وانترنت ... عجبني موضوع الشرح دا اوي وكنت سبت الشغل مع والدي لظروف كتير

اول ما نجحت في الكلية سبت المركز دا على طول بعد سنة ونص شغل فيه ... سبت الشغل وانا كنت لسه ماستقرتش في شغل تاني بس عشان اعرف ادور بمزاج وانا كنت متخيل ان مافيش جيش ولا هم

واشتغلت في شركة تانيه كانت شركة رايه للانترنت اللي هي فودافون دلوقتي بس كنت في فرع الشرقية ... ودخلت الجيش

وبعد الجيش سنتين في السودان وبعد السودان شركة صغننة انا واخويا وبعد الشركة 3 سنين في ليبيا

الخلاصة اني تقريبا بقالي 15 سنة باشتغل ... مريت على وظايف يمكن ملهاش دعوة ببعض ... الخلاصة 10 سنين خبرة في المبيعات

منقسمين بين المواد الغذائية ومابين الكمبيوتر ومشتقاته ومابين التدريس كمان

ولما سبت الشغل وقررت اني ادور على شغل ماعرفش ايه اللي حصل

اول انترفيو ليا كان مع شركة سعودية عايزة مدير مبيعات خبرة في المبيعات 6 سنين .... ساعه ونص انترفيو ... اللي اعرفه ان الانترفيو الناجح بيعدي مدة النص ساعه ومبيزيدش عن الساعه ... ليه ساعه ونص الله اعلم المهم اني قمت وانا مطمئن اني تقريبا من ضمن اللي هايعملوا الانترفيو التاني

ولا عبروني ... ولا حتى ايميل اعتذار

مكنتش واقف عندهم شركة تانيه عايزة بردو مدير مبيعات وبردو في السعودية .... الانترفيو بالظبط كان 25 دقيقة واللي كانوا قبلي كلهم 10 دقايق ... قالولي هانتصل بيك خلال يومين .... ان حد يتصل ولا عبروني

مش مهم ... انا قريت اعلان عن شركة كمبيوتر في المملكة عايزين مدير مبيعات خبرة في مجال الكمبيوتر 4 سنين ... لا مش ممكن دي شغلانة متفصلة

ابعت ياعم ... الو استاذ احمد ... مع حضرتك اامر ... عندك انتر فيو بكرة الساعه 5 ان شاء الله

انترفيو ساعتين مع صاحب الشركة نفسه ... وصل الامر في الانترفيو لانه سألني عن كل حاجه ممكن يسألوا فيها وممكن ميسألوش

مخلاش ... وقالي انا نازل من السعودية مخصوص عشان اعمل انترفيو مع شخصين ... انت وواحد تاني ... وهاستنى منك تبعت لي تصور عن شكل مخطط المبيعات

ابعت يا عم احمد ... استنى التليفون يابو حميد

انه يتصل ماتصلش ... قلت لا انا هاتصل ... اسفين والله الشركة اختارت واحد تاني ... عنده خبرة في المملكة ... شكرا

بعد كل المدة دي وكل الانترفيوهات اللي وصلت ل 8 انترفيو في شهرين بمعدل انترفيو كل اسبوع .... اكتشفت اني كنت باشتغل نفسي

وان الموضوع لا ليه دعوة بخبرة ولا ليه دعوة بشهادات ولا ليه دعوة بكورسات معايا شهادتها

الموضوع كله من اوله لآخره رزق ربنا محدده في مكان وزمان معينين وغير كده اونطة ممكن يكون عامل مساعد .... لكن مش هو الاساس

كل سنة وانتوا طيبين واهو كله كلام

قال تاج قال

2009-11-23T21:44:00.005+02:00

وصلني التاج من ياسمين صاحبة مدونة كرسي اعتراف

شكرا لها

اسمك؟

أحمد عاطف مصطفى أحمد

سنك؟

تاريخ ميلادي هو 13/9/1978

احسبوا انتوا بقى

اسم مدونتك ؟

كله كلام

مجال دراستك؟

خريج تجارة قسم اقتصاد

هل فكرت في إغلاق مدونتك؟ والسبب؟

لحظات كتير فكرت في إغلاقها كل لما بلاقي إن مدونتي زيها زي مدونة ناس مايستحقوش حتى يستحموا

بس برجع واقول ان زي ما في ناس نضيفة بتكتب في ناس مالهاش لازمة بتكتب

يبقى لازم الناس النص نص اللي زي حالاتي يكتبوا

ايه رد فعلك لو حد قل ادبه عليك في المدونة ؟

محصلتش ولا مرة ولو حصلت هانشر كلامه ... لا يضير السحاب نبح الكلام

اسوأ مدونة دخلتها؟

مدونة بتاعة واحده اسمها كات باين او قطة الصحراء حاجه زي كده .... اكتشفت ساعتها ان في بلدنا نوع من البنات فعلا فعلا مش تربية رجاله واللي زي دي اما انها تنضرب بالجزم او المستخسر الجزمة ممكن يضربها باي حاجه تانيه بس يحاسب على ايده تتوسخ

هيحصل إيه لإيميلك بعد ماتموت؟

ولا حاجه يعني هو ايميل الوزارة ؟؟

اديت الباسوورد لحد قبل كده؟

ايون

السفر بالنسبة لك إيه ؟

متعة وانطلاق ومعرفة فكر واسلوب حياة شعوب اخرى

المود بتاعك إيه؟

دلوقتي ولا كمان ساعه ..؟؟

بتعمل إيه وقت فراغك؟

بظروفها ملهاش حاجه مترتبة ... ممكن جيمز

ممكن نت

ممكن خروج ودا نادر

مش مترتبة

الأكلات المفضلة؟

مكرونة بالبشاميل

واي اخت مدونة بتعرف تعملها تبعت صينية الله يكرمها

الكلام موجه للمتزوجات من المدونات

الصفات اللي أخدتها عن والدك؟

مش عارف بس كتير ... اهم حاجه العناد والدفاع عن رأيي ... بحاول اكون مثقف زيه او بحجم ثقافته

الصفات اللي أخدتها عن والدتك؟

العصبية

أكتر 6 حاجات بتحبها؟

حاجات ولا أشخاص ؟

عموما لو أشخاص

(أمي وابويا واخواتي ) - ( ناس عارفين نفسهم ) - محمد السيد ( صديق ) - احمد عبد الحميد - احمد رضوان - احمد طه

لو حاجات عامه

باعشق السكون والهدوء - القهوة الامريكي - شغلي - بيتي القديم - التسوق الرجالي - السجاير

أكتر 6 حاجات بتكرهها؟

نعتبرهم صفات

الكدب - الخداع - البامية - القاهره ( كسكن ) - الغرور - الاهمال

شخصيتك نوعها إيه؟

نوعها ذكر

لماذا دخلت عالم التدوين من الأساس؟

دخلته رخامه ... من باب اكتب براحتي اللي انا عايزه من غير كنترول يخنق كتابتي

أهمية التعليقات بالنسبة لك؟

في تعليقات بصراحة تجيب مرض ... وفي تعليقات تفهم الواحد ان اللي بيكتب دا فعلا قرا الموضوع وفهم واستوعب وتفاعل

بس في المجمل بتبين هل فعلا في تجاوب وفي حد بيقرا اللي باكتبه ولا لا

أفضل مدونة قريتها؟

ماينفعش احصر المدونات في مدونة واحده ... اصل اشباع رغبة القراءة زي بالظبط اشباع رغبة الاكل ماينفعش اكل كل يوم نفس الاكلة اللي بحبها

في مدونات كتير لو السؤال عن افضل المدونات ممكن اقول مجموعه لكن السؤال عن مدونة واحده ودا ظلم لمدونات كتير

عموما كل المدونات الصديقة بقراها وبيعجبني اسلوب اللي بيكتبوا فيها واحترامهم لكلمتهم

اهمية الانترنت بالنسبة لك؟

انا بقالي 5 سنين مبقعدش على جهاز كمبيوتر مافيهوش انترنت بالبلدي كده الانترنت اصبح بالنسبة لي زي الموبايل ... تقدر تستغنى عن الموبايل ؟؟

إهداء التاج؟

أهديه لريم صاحبة مدونة رسائل بلا بريد

بس قولولها تقفل الاغنية عشان امي هاتطردني من البيت بتهمة الفسق

يحكى أن

2009-11-20T03:46:00.004+02:00

يحكى أن ... كان في رئيس ... راجل بصحيح ... في يوم من الأيام قالوا له ليك راجل انضرب عالحدود .... ماسكتش في يوم وليلة ضرب الحدود

ضرب 12 طيارة للي ضربوا الراجل اللي من بلده .... ضرب قواعد عسكرية للبلد اللي منها الناس اللي ضربوا واحد من بلده ... كل العرب قاطعوه قالوا عليه خاين وعميل

لكن مافيش بلد منهم عرفت تهين واحد مصري ... لانهم عارفين ان المصري مسنود ... ولو أهانوه ممكن بلده تقوم الدنيا متقعدهاش ... لكن الريس بقى شهيد

وجالنا راجل شريد ... مالوش غير انه يرفع ايده ويقول باي .... وبدأت مرحلة التلطيش .... مرة قطر ... قطر يا عالم اللي شعبها ميجيش جحر في شبرا ولا ليها اسم في العالم ... اتطاولت علينا

وبعدها الكويت .... اللي اول ما انضربوا من العراق جريوا يعيطوا في بلدنا .... لكن العرب معروف عنهم انهم قذارة ... بدأوا في قلة الأدب .. مع اننا قولنالهم مصر زي بلدكم ... و دا أول ما امريكا قالت هنساعدكم

واول ما راحوا بلدهم صلوا وسجدوا لامريكا مش لله ... اما مصر فهم شحاتين من وجهة نظرهم ... رغم ان جزمة المصري تساوي 24 عربي وتساوي كل بلدهم

فين ريسكم ... ريس مين ... ريسكم حارسكم ... هو احنا لينا رئيس ؟؟؟ .... احنا شعب تعيس .... عايش للتلطيش

احنا شعب متهان ... غلبان ... مش لاقي رغيف العيش ... وصامت صمت الحملان

مين العرب دول ... دول عالم رعاع ... غجر ... مكانوش بيميزوا بين الألف من زر البطاطا زمان

ومين اللي علمهم ... المصريين والله .. علموا كل العرب ؟؟

والله كل العرب اتعلموا على ايد المصريين ولسه بيتعلموا لحد النهاردة كمان

وليه المصري متهان

عشان المصري غلبان مالوش حد يحرسه ولا يصونه

وفاكر ان لقمة العيش ذلاه ... مع انه هو اللي بيذلهم بشغله ولو لاقيين غيره كانوا جابوه

لكن هما عارفين قيمة المصري وبيختاروه لانه انضف منهم

لكن نقول ايه ... احنا شعب غلبان

واهو كله كلام

مش ناسيين ... لكن آسفين

2009-11-05T12:46:00.006+02:00

يعيش الشعب المصري حاليا حالة من الترقب والإنتظار ليوم 14 نوفمبر أدت لأن ينسى الشعب المصري تماما إن في مؤتمر في الحزب الوطني اسمه من اجلك انت ( الله اعلم -انت- دي عايده على مين )

يوم 14 نوفمبر نساهم كمان او خلاهم ميخدوش بالهم من ال ..... اللي اسمه احمد عز اللي قال جملة غريبة اوي في المؤتمر وهي تحية لمفجر ثورة التحديث والتطوير

انا فعلا مفهمتش الجملة ... اللي اعرفه ان احمد عز بيتبلى على الشعب المصري وبيقول عليه شعب غني ... لدرجة اني بأفكر ارفع عليه قضية سب وقذف دا بيشتمنا ويقول شعب غني

وبردو مافهمتش هي ثورة التحديث والتطوير دي قامت امتى .. يمكن مقصود بيها ثورة يوليو ماهو الاتنين جمال

يوم 14 نوفمر أنسى المصريون دور ومساهمة الجزائر في حرب 73 كما كتب أحد محرري موقع مصراوي .... أحب أوضح له احنا مش ناسيين

ولكن هل تذكر الجزائر ما فعلته مصر من أجلها

وانا في السودان اتعرفت على واحد كان أحد رجال الرئيس الاسبق الراحل النميري لجمهورية السودان ... وكان الراجل دا مبعوث السودان للقمة الأفريقية المنعقدة في الجزائر وكان ذلك بعد توقيع معاهدة السلام ومقاطعة الكثير من الدول العربية لمصر

المهم ان رئيس دولة نيجيريا ( دولة إسلامية ) وصل الجزائر والسلطات الجزائرية رفضت دخوله للاراضي الجزائرية بدون جواز سفر وملقاش حد في استقباله وقامت الدنيا في المطار لحد ما سمحوا له بالدخول

وراح الراجل للقمة وهو متعصب جدا جدا واتكلم عن استقبال الرئيس السادات له في مصر وان الرئيس السادات بنفسه كان واقف مستنيه

فما كان من رئيس القمة الجزائري الا انه بدا يلعن ويشتم في الرئيس السادات اللي خان الاسلام والعروبة بتوقيع المعاهدة مع المدعوة اسرائيل

في 2 طلبوا الحديث ... رئيس البعثة المصرية واللي طبعا تم تجاهل طلبه ورئيس البعثة السودانية اللي سابوه يقول كلمته

الراجل حكى قصة ظريفة اوي وقال

(وانا صغير كان ابويا بيشتغل في اسكندرية في شركة شحن هناك وكنت انا ايامها طالب في الثانوي باخد مصروفي من ابويا وكنا ناخد المصروف ونحوش منه عشان اخر الاسبوع نروح السينما نتفرج على أفلام عبد الحليم حافظ وكانت التذكرة وقتها بقرش ونص مصري ونجيب بنص قرش لب

وفي يوم رايحين السنيما سمعنا ان تذكرة السينما غليت بقت ب 2 قرش ومبقتش عارف ادخل السينما ولا اجيب اللب ... لكن قررت أسأل ليه خلوا تذكرة السنيما ب 2 قرش فروحت لحد الشباك وسألت الراجل : ليه تذكرة السينما بقت ب 2 قرش رد عليا وقال ان قرش ونص تمن التذكرة والنص قرش لدعم الثورة الجزائرية ... وشكرا )

دي كانت كلمة الراجل ... اللي معناها ان الشعب المصري في يوم قطع من قوته وقوت عياله عشان يدعم الثورة الجزائرية .... فكان مصير الشعب المصري انه يتحرق رمز منتخب بلده وعلم بلده في شوارع الجزائر عشان ماتش كورة

وأهو كله كلام

بلد بتاعة شهادات صحيح

2009-10-11T16:07:00.004+02:00

بجد مفارقة ضاحكة حصلت لي بقدر ماهي حرقت دمي أول ما الكلام أتوجه لي لكن بعدها فعلا ضحكت بشدة من كتر سخرية القدر ولفة الايام على عدم فهم كتير أوي من مجتمعنا لكل الكلام اللي بيقولوه ففي حوار كان أحد أطرافه أنا وأنا بأصب جل غضبي على المسمى سيد بيه أوكي وخاصة في موضوع النقاب .. الطرف التاني والوحيد وجه كلمة ظريفة وقال دا دكتور في أصول الشريعه يعني بيفهم أكتر مننا ... الكلمة حرقت دمي جدا أصل شهادته مش دليل على صحة ما يقول

لكن فكرت شوية لاقيت في كتير في مجتمعنا بيفكروا بنفس الفكر دا راجل ازهري ومعاه دكتوراه ... سبحان الله طيب ما عمرو خالد لا معاه دكتوراه ولا يحزنون ولا دارس اصلا شريعه اسلامية ونفس النوعية من الناس دي لما بتسمعه بيتكلم بتقول لكلامه آمين رغم كم اللغط والأخطاء في كلامه ومحاضراته مع كامل إحترامي له كمجتهد ولكل مجتهد نصيب

جه في عقل بالي طب وهو الشيوخ اللي الواحد بيعتد بيهم دول مش دارسين ؟؟؟ قلت لا لازم أدور وأفتش وأشوف يمكن يكونوا مش دارسين تبقى واقعه سواد ومكنتوش شوفتم الكلام اللي انا باكتبه دا لاني كنت هاتكتم في نفسي واسكت

وبدأت أدور ... ولأني من الناس المتابعين بشدة لقناة الرحمة على وجه الخصوص من مجمل القنوات الدينية ومن المتابعين لكل شيوخها بدأت أدور بالأخص على شيوخ قناة الرحمة اللي أعرفهم وخصوصا ان معظم من يدافعون عن سيد بيه أوكي من المعادين لقناة الرحمة ويشيعوا أن شيوخها مالهمش علاقة بالدين ولا معاهم شهادات وفوق كل دا سلفيين متشددين وحشين كخه

وبدأت بمؤسس القناة نفسه الشيخ الجليل محمد حسان

وجدت أن شيخنا الجليل حاصل على بكالريوس إعلام من جامعة القاهره بتقدير عام جيد جدا ( عارف ان ناس هاتقول مالوش علاقة بالدين )

طيب ندخل على مؤهلاته الاخرى حاصل على الماجيستير من معهد الدراسات الإسلامية التابع للأزهر الشريف بمجملة دون وجود شيخ الأزهر ضمن هذا المجمل

فوق كل دا الراجل كان امام وخطيب مسجد الراجحي بالممملكة العربية السعودية ( هي المملكة العربية السعودية هاتعين أي حد امام مسجد وخطيب )

كان مدرس مادة الحديث الشريف ومناهج المحدثين في كليتي الشريعة وأصول الدين بجامعة الإمام محمد بن سعود الإسلامية فرع القصيم .

أستاذ العقيدة بمعهد إعداد الدعاة بمجمع أنصار السنة المحمدية ( المجمع مجاز من الأزهر الشريف )

ولأني مش هاقضي البوست كله تعريف بمشايخ أجلاء هم في غنى عن اني اعرف بيهم الناس فقلت اجيب اللينك لكل المشايخ واللي عايز يدور على الشيخ اللي يحبه يختار

أضغط على كلمة علماء السنة هتلاقي تصنيف كل عالم حسب اول حرف من اسمه ودراسته الازهرية والغير ازهريه

نيجي بقى لنقطة تانيه وبكامل احترام عشان مانزعلش منا الناس ... شيخ الازهر هل هو أهل للثقة أكثر عند المصريين أم فضيلة الشيخ محمد متولي الشعراوي رحمه الله ؟؟

عارف ان الكل هايقول الشيخ الشعراوي والله عارف من غير ما تقولوا

شيخ الأزهر أحل الغناء تحليلا صريحا بينما الشيخ متولي الشعراوي وهو شيخ أزهري حرمه تحريما صريحا وكان وزيرا للأوقاف ... ولأننا لسنا في صدد مناقشة ايه الحلال وايه الحرام ولاني زي كل اللي هايقرا البوست باسمع اغاني ساعات وانا لا شيخ ولا حاجه دا انا نيلة وايامي سواد وربنا يستر علينا

ولكن ما من فتوى خرجت إلى الشعب المصري من ذلك الرجل الجاثم على منصب شيخ الأزهر إلا وكانت مخالفة تمام المخالفة لما أفتى به كل من كان قبله من أصحاب منصب مفتي الديار المصرية أو حتى منصب شيخ الازهر الذي أصبح بالتعيين من قبل رئيس الجمهورية بعد أن أعلن الشيخ الجليل عبد الحليم محمود رحمه الله العصيان على رجال الثورة لما يفعلوه من مناهب في البلد

شيخ الأزهر مرفوع ضده قضايا من جبهة علماء الأزهر الشريف والذي سيظل شريفا طالما هناك أمثال هؤلاء الذين لا يخافون في الله لومة لائم

شيخ الأزهر حلل ربا البنوك رغم أن مفتي الديار المصريه الأسبق الشيخ الدكتور نصر فريد واصل حرمه تحريما صريحا والدكتور نصر فريد واصل مفتي الديار المصرية دكتور في أصول الشريعه الاسلامية ويحمل درجة الاستاذية أي أن شيخ الأزهر أمام شهادات ذلك الرجل ما هو الا مجرد تلميذ خيبان وفاشل كمان

هذا إذا كان الامر مربوط بالشهادات

ولكن لماذا مجتمعنا المصري الذي يعترف بشهادة الدكتور سيء طنطاوي (الذي حلل الغناء وفوائد البنوك الربوية وأحل التمثيل وحرم النقاب بل وجعله عادة ولا يرقى لمرتبة الفضل حتى ) لا يعترف بشهادة الدكتور جمال البنا رغم أنه أيضا دكتور في أصول الشريعه بل وابن الامام أحمد البنا والأخ الاصغر للامام الشهيد حسن البنا ... رغم ان فتاوى جمال البنا لا تبعد كثيرا عن فتاوى سيء طنطاوي وكلاهما دائما يلعب في نفس المنطقة

إن الأمر لا يتعلق بشهادات أصحاب الفتاوى فلدينا من يحملون الشهادات ولا يفقهون شيئا ... ولدينا من لا يحملون الشهادات وكثير منا يتبعهم ويسمع لهم ويصدق على كلامهم

أيام الرسول صلوات الله عليه حاول أحد يهود بني قينقاع خلع نقاب مرأه مسلمة كانت تشتري حلي من صائغ يهودي فما كان من المرأه المسلمة إلا ان قالت وا إسلاماه فكانت غزوة بني قينقاع لأنه فقط حاول ..... فقط حاول .... فقط حاول خلع نقابها

اما شيخ الازهر خلع نقاب البنت لا وكمان قالها اومال لو كنتي جميلة

المفاجأه الكبرى

في رسالة الدكتوراه لشيخ الأزهر قبل أن يصل لمنصب شيخ الأزهر قبل أن يكون إمعه يضحك عليها القاصي والداني أيام كان شيخا جليلا أقر إقرارا واضحا لا يخفى عن عين عاقل أو مجنون أو حتى عيل صغير لازال في حاجة إلى قصرية بأن النقاب بلفظ القرآن الكريم فرض

ونص قوله في تفسير آية الحجاب أهو

يأيها النبي قل لأزواجك اللائي في عصمتك، وقل لبناتك اللائي هن من نسلك، وقل لنساء المؤمنين كافة، قل لهن : إذا ما خرجن لقضاء حاجتهن، فعليهن أن يسدلن الجلابيب عليهن، حتى يسترن أجسامهن سترا تاما، من رءوسهن إلى أقدامهن، زيادة في التستر والاحتشام، وبعدا عن مكان التهمة والريبة." انتهى كلام الدكتور محمد سيد طنطاوي.

دا كلام الدكتور محمد سيد طنطاوي قبل أن يعتلي منصب شيخ الأزهر فما كان منه حين جلس على الكرسي إلا أن قتل الدكتور وبقي شيخ الحكومة

وأهو كله كلام

سيد بيه أوكي

2009-10-09T16:31:00.005+02:00

إعلان هام

يعلن مكتب سيد بيه أوكي استعداده التام لإصدار أي فتوى طالما سيتم دفع الاوبيج كما تم تقريره في لائحة فتاوى مكتب سيد بيه أوكي ... سيد بيه أوكي لا يتورع ولا يخاف ولا بيهمه حد ... جرب وشوف

سيد بيه أوكي بيفهم في الدين أكتر منك ومن اللي خلفوك وسهل عليه يفبرك أتخن فتوى

سيد بيه أوكي قادر على تحويل الحرام حلال والحلال حرام

سيد بيه أوكي فاجر والحاجه اللي جابته عارفه

سيد بيه أوكي سأل طالب في معهد الازهر انا احسن ولا الشيخ شعراوي

الطالب جاوب وقال انت طبعا يا مولانا ... الشيخ شعراوي كان بيخاف ربنا ... لكن انت فاجر مبتخافش من ربنا

سيد بيه أوكي البالغ من العمر 81 عاما لا يتورع في مغازلة النساء ولو شاف واحده مش حلوة من وجهة نظره القبيحة بيقولها انها مش حلوة ودا ان دل يدل على مصداقية سيد بيه أوكي

سيد بيه أوكي مشهور بطرد كل من حاول الذهاب لمكتبه ... مثل صحفية الاسبوع ومثل الرجل الذي تنصرت ابنته ( عادت للاسلام ولله الحمد بدون مجهودات سيد بيه أوكي )

سيد بيه أوكي صاحب لسان سليط ينعت بأقذر الالفاظ وهذا ان دل يدل على رجولته وشكيمته

سيد بيه أوكي كان بيتفرج على مسلسل العائلة بتاع محمود مرسي وليلى علوي سنة 1993 ايام لما كان مافيش غير الاولى والتانيه والتالته بس ... والمسلسل كان بيتذاع في توقيت صلاة العشاء ودا ان دل يدل على ان سيد بيه اوكي راجل مبيهموش لا صلاة ولا غيره ومش هايقولك صلي ( كان بيقول ليلى علوي مبدعه في هذا المسلسل مع العلم انها كانت قالعه طول المسلسل )

سيد بيه أوكي احل الغناء والرقص وحرم النقاب وجعله عادة ... يعني النقاب بلفظ سيادته زيه زي العاده السرية ماهو الاتنين عاده بس واحده فيهم بتبقى في الدرا

سيد بيه اوكي اعلن ان الجهاد في العراق ليس الذي نضرب فيه الامريكان فالامريكان جاءوا لتطهير البلاد بل يجب ان نجاهد ضد حكام العراق الطغاه وخدوا بالكم حكام العراق بس لكن حكام مصر ناس اشراف

سيد بيه اوكي اباح السلام على قاتل اطفال فلسطين ماهو في معاهدة ما بينا (شيمون بيريز)

سيد بيه اوكي اعلن ان اي حرمه تسافر فرنسا فلازم تقلع الحجاب وتشتغل رقاصة طالما قوانين البلد بتقول كده

سيد بيه اوكي منتظر طلباتكم لاصدار الفتاوى التفصيل والجاهزة

سيد بيه اوكي بيفصل فتاوى سترتش وفتاوى ستومك وبنتاكور وبيفصل فتاوى بكيني كمان

وغطيني وصوتي ياااااااامااااااا

تعرف ايه عن الجيش

2009-10-05T22:10:00.004+02:00

أيام الطفولة ... أيام ما كان مافيش غير القناة الاولى والتانيه كان يوم 6 اكتوبر دا يوم يعد من اروع ايامي .... لعدة أسباب اولهم انه اجازة من المدرسة ... تاني حاجه كنا بنقعد نتفرج على أفلام الحرب واحنا عيال وبعد ما الفيلم يخلص نمثل الفيلم ونقعد نتخانق على مين يبقى من العساكر المصريين

وكنت باحس بفخر شديد ان عمي الله يديله الصحة حارب في 73 وانه بطل وان ابن عم ابويا استشهد هو كمان وبأتفاخر وسط صحاب الشارع ان الحرب دي في من بيتنا ناس شاركوا فيها

وكنت باتمنى اني وانا صغير اطلع ظابط في الجيش .... وتدور الايام وتلف وادخل الجيش بس عسكري ... فترة التجنيد الاجباري

يوم 12 / 7 / 2003 ( اول يوم في الجيش)

وليد : ( ساعة طابور الاستقبال ) واد يا أحمد اليوم دا حر بطريقة بنت ..... هانعمل ايه في الحر ابن ال ...... دا واحنا في المعسكر ابن ال..... دا

العبد لله : ياعم محسسني ان احنا رايحين نحارب دا احنا رايحين نريح اعصابنا سنة وراجعين دا انا شوفت يوم الجمعه عالقناة الاولى البرنامج اللي بيحكوا فيه عن القوات المسلحة تقولش العنابر فنادق 5 نجوم ولا الميس بتاع الاكل عامل زي مطاعم موفنبيك حاجه كده ابوك عمره ما كل فيها

وليد : يابني انت بتصدق الكلام دا ... دا كلام تلفزيون

الصول منصور : جوز العساكر الخ ...... اللي ورا امنع الكلام يا ...... منك ليه ( كان راجل ذوق بصراحة

كل واحد فيكم ينسى الزبالة اللي كان عايش فيها بره هنا جيش يعني انضباط وانسى ياروح امك منك ليه انك هنا خريج جامعه لا الجامعه دي عند امك هناك .... تقعد جنبها والبكالريوس بتاعك تحت ...... وانت بتتفرج عليها وهي بتقور لأبوك المحشي

أحمد فرج : ( كان صاحبنا بس قرد وبيتكلم في سره ) واللي امه مبتعرفش تقور ولا ابوه ميت

الصول منصور : (سمع كلامه ) ابقى خليها تقور ..... يا حيلتها

دلوقتي هاتستلموا المخلة والمخلة دي فيها مهماتك ... اللي لازم تحافظ عليها زي عينك لانها هاتفضل معاك لحد آخر الجيش

دا كان حفل استقبال مركز التدريب بجد كان استقبال مشرف حسيت فعلا بالفخر اني مصري

يوم 10 / 9 / 2003 ( اول يوم في الوحده بعد مركز التدريب )

الناس اتفرقت ومجاش معايا الوحده بتاعتي الا ابراهيم وابراهيم دا كان ممكن يبقى حبيبي لولا انه عمل فيا فصل وكان فاكر بيخدمني

وصلنا احنا والناس من وحدات تدريب تانيه وكان واقف واحد قصير على كتفه نسر ونجمتين يعني عقيد قولت يا سلام هو دا الاستقبال واقف يستقبلك عقيد بنفسه

أنا العقيد أيمن جبريل ( الله يحرقة مطرح ماهو قاعد ) انا عارف ان معظمكم جاي الوحده دي بالوسايط لان ليها سيط في الجيش انها وحده مرتاحه لكن احب اقول لكل عسكري جاي يت ..... هنا ..... انسى هاتلتزم بالانضباط هاتبقى محترم وتنضرب بجزمتي انا بس

مش هاتلتزم اوسخ عسكري هنا هاخليه يعوص جزمتة ..... ويضربك بيها على دماغك

اللي خريج جامعه يرفع ايده

6 رفعوا ايديهم ولسوء الحظ سأل ابراهيم : بتعرف تشتغل عالكمبيوتر ؟؟

ابراهيم الله يسامحه : لا يا فندم بس العسكري احمد عاطف بيعرف يشتغل

وانت مال امك بالعسكري زفت انت تجاوب عن نفسك بس فاهم ولا لا

تمام يا افندم

فين العسكري اللي اسمه احمد عاطف

تمام يافندم

بتشتغل عالكمبيوتر يالا

تمام يافندم

بتكتب بسرعه

تمام يافندم

اطلع للنقيب ماجد خليه يختبرك

تمام يافندم

عارف هايختبرك فين

فين يافندم

في ام عين ياروح امك انت هاتصاحبني يا عسكري انصراف يا .....

تمام يافندم

يلعن ابو اليوم اللي دخلت فيه الجيش ... يحرق ابو دي بلد

ورغم ذلك كثيرا ما شعر الانسان انه يخدم وطنه وبالتأكيد كان هناك رجال شرفاء يحترمون آدمية الجنود ... ولكن جيل ورا جيل من اللي شافه في الجيش بطل يتكلم عن مصر وعن الجيش

حتى بدأ يظهر جيل لا يعرف عن اكتوبر الا فيلم الرصاصة لسه في جيبي ومحى إعلامنا صورة الجنود المحاربين الذين قاتلوا من أجل أرضنا

وتفرغوا تماما لإظهار رجل واحد قاتل وكان راكب توك توك بجناحات وبيقول عليه طيارة

وماتتت سيرة أبطال عظام

سعد الدين الشاذلي

عبد الغني الجمسي

وحتى الجنود الذين حملوا على عاتقهم تلك الامانه فأدوها على اكمل وجه فلم يجدوا الا نكران الجميل ونسب الانتصار لمن لم يحمل سلاحا في وجه العدو

صديق لي له ولد في الرابعة عشر من عمره يقول لي : تصدق الواد ابن الكلب مش عارف بكرة اجازة ليه

بقوله يمكن نسي المناسبة ان بكرة 6 اكتوبر

صديقي : المصيبة انه بيسالني هو 6 اكتوبر دا عيد ميلاد الريس .؟؟

وأهو كله كلام

أيوة كده يا وديع

2009-09-27T13:27:00.005+02:00

رغم حملة هنعيد ونفرفش من غير ما نتحرش اللي طلعت على الفيس بوك واللي أيدها كتير من المدونين أمسكت الشرطة في اول ايام العيد 230 حالة تحرش جنسي ودا إن دل يدل على ان شباب مصر في تطور وشباب مبيقفش عند اي حملة مغرضة ممكن تنغص عليه العيد وان كل بنت تم التحرش بيها في العيد كانت نازلة من بيتهم وهي عارفة ان دا هايحصل لها فأعدت العدة وقصرت الجيب ولو بنطلون ضيقته لدرجة انها تلبسه بلبيسة جزم وفتحت صدر البادي بقدر الامكان بحيث انها تفوز بجائزة التحرش المثالي عشان تعجب ماما سوزان .

وعشان في نفس الوقت تستطيع الترويج للمنتج الجديد المنتشر في صيدليات مصر وهو غشاء البكارة الصيني سهل التركيب واللي من خلاله نقدر نقول لعبد الفتاح القصري ان شرف البنت مبقاش زي عود الكبريت لا خلاص دا كان زمان وجبر دا بقى زي الولاعه البيك بيولع 2000 مرة .

ونقدر نطمن ايناس الدغيدي اوعي تقلقي من الحجاب اللي ربنا ما يكتبه عليكي ابدا ويجعلك من المفضوحين دنيا وآخره يارب زي ما طلبتي لان حتى لو في حجاب خلاص اكبر هم ممكن يشيل همه الشاب النهاردة لقضاء ليلة متظبطة هو 150 جنية ... 80 جنية لزوم غشاء البكارة الصيني و 70 جنية لزوم نص كيلو كباب مشكل من عند حسني وشوية بيبس اما اللي عايز يضرب بيره او يظبط سيجارتين فدا على مسئوليته وفي شباب هايقضيها من غير عشا حسني ويكتفي بالبيبسي بس

ونقدر نقول لطارق نور تقدر في اعلانك تجيب واحده قالعه اكتر من كده لما تيجي تقول ان مصر بقت متطورة لان البت اللي كنت جايبها كانت حشمة اكتر من البنات اللي بيتحرشوا بيهم يا راجل

اما بالنسبة لما تم عرضه خلال رمضان فهو ينطبق عليه قول " ايوة كده يا وديع ... اخيرا فهمت يا وديع " فلم أرى مما رأيت فيما عرض في رمضان سوى شوية نسوان قالعه وشوية رجالة سكرانه وشوية مذيعات دمهم يلطش وكلام ليل ونهار عن الحجاب اللي مجنن ايناس الدغيدي وطوني خليفة أما المذيعة رولا جبريل فرجاءا تلبسي حاجه بكم أو تقولوا للمصور مايدققش قوي فيها لانها يبدو للاسف انها عاملة اضراب عن الاستحمام

ويبدو ان مبدأ ايوة كده يا وديع مطبق عندنا في كل شيء فجريدة الدستور في عدد من اعدادها قررت أن تنشر ملف كامل عن المخابرات المصرية وانتصارتها فقررت أن تجعل صورة العدد مناسبة للملف فأخذت بوستر فيلم أجنبي يسمى ميونخ من باب صور وبيع يا وديع رغم أن نفس الجريدة جاءت في عدد سابق وكتبت صفحة كاملة تتحدث فيها عن الأفلام المقتبسة والتي في الأصل تم انتاج نفس قصتها كأفلام أجنبية وانهالت بالسب واللعن على الممثلين والمؤلفين والمخرجين رغم أن فيلم طير انت والذي قام بتأليفه عمر طاهر قصة مقتبسة من فيلم أجنبي بل وعمر طاهر نفسه يكتب في جريدة الدستور

وثقافة أيوة كده يا وديع والتي تنم على عدم فهم اي حاجه في اي حاجه والمنتشرة بين شباب مصر السيس تظهر وتتضح جليا في تعليقاتهم شفهيه كانت او مكتوبة وتنم عن جهل بحالهم وحال الدول المجاورة

فقبل سفري للسودان كلما ذكرت لصديق أنني ذاهب إلى السودان أجد صيغة الاستغراب تكاد تتهمني بالجنون رغم أن الجنية السوداني اليوم أصبح يوازي 2.5 من نظيره المصري وهذا أقل مؤشر على أن تلك الدولة أصبحت قوية في اقتصادها "وان كان لازال في مرحلة النمو" من سابق عهدها

زاد وغطى واحد بيعلق على موضوع خطاب القذافي في الامم المتحده ويقول " ياعم انتوا لاقيين تاكلوا اصلا " طبعا اخونا دا جاهل جهل الإبل فالأخ لا يعرف أن ليبيا بها بعد قرار التأشيرات 3 مليون مصري يعملون بها وقبل قرار تأشيرات المصريين للعمل بالجماهيريه كان بها 6 مليون مصري أي ما يزيد عن تعداد سكان ليبيا نفسه بمقدار مليون بني آدم وأن الدينار الليبي يعادل 4 لحاليح من اللحاليح المصرية

بينما ينشغل شباب مصر السيس هذه الايام بالخناقة القائمة بين عمرو دياب وتامر حسني بينما هبطت على مصر نكبة جديده وهي سقوط فاروق حسني في انتخابات اليونيسكو

والنكبة ليست في سقوط فاروق حسني بل في انه هايفضل زير الثقافة في حكومة نظيف اللي قرر يبقى نظيف بزيادة في رمضان ويرمي كل الزبالة اللي في بيته في شوارع مصر عشان بيته يفضل نظيف

وأهو كله كلام

لاقتني كبرت فجأه

2009-09-14T21:07:00.002+02:00

بالتأكيد لن أكتب أغنية المغني الشعبي عبد الباسط حمودة والذي نظر في مرآته فوجد نفسه كبر فجأه باكيا على عمره اللذي مضى وإن كنت أعيش نفس حالته بالنظر في المرآه لرؤية ما خلفه عام مضى من عمري فبالأمس كان قد مر عام آخر على عمري وأصبح عمري 31 عاما وإن كنت لم أجد كثيرا من الإختلاف سوى أنه على الرغم من كل ما يمر به الإنسان من أحداث إلا أن الحالة النفسية افضل والشعور بالصحة الوافرة أعلى من نفس الشعور الذي صاحبني في نفس اليوم منذ عام

وفي وسط التهنئة بذلك اليوم قالت لي صديقة عزيزة " عمرك بيجري يابو حميد وانت لسه ماتجوزتش " لن نعيد تكرار كلمات الام المعتادة التي طالما نشرتها على المدونة والتي تقرأها أختي على مسامع أمي فتظن أمي إني " بجرسها على النت بدل ما اتكلم في مشكلة فرفور أو حاجه تنفع الناس - تقصد مشكلة دارفور "

وعندما سألتني صديقتي لماذا عزفت عن الزواج حتى يومنا هذا رغم أنني أتحدث دوما على أن الزواج فيه الكثير من صلاح المجتمع وأن كلمة زواج ترددت في مدونتي أكثر مما تردد اسمي شخصيا

وللحظات وجدت نفسي قد تجاهلت الحوار الكتابي الدائر بيني وبين الصديقة العزيزة وفكرت قليلا لماذا لم أتزوج ؟؟؟

سمعت في أحد الحوارات الساخرة جملة لشخص " يعني انا اشتغل واتعب واجيب شقة واجهزها وادور على عروسة واجيب شبكة واعمل فرح عشان في الاخر أتجوز واحده ماتسمعش كلامي وتطلع عيني .... بيعه خسرانة ياعم "

بالتأكيد ليست هذه فكرتي عن الزواج وإلا ما كنت أقدمت على محاولات ربما بائت بالفشل ولكنها أدرجت في سجل حياتي بمحاولات زواج .... ولكن هل مشاركة الأحلام أمر هين ؟؟

ربما يظن الكثير من الرجال أن الزواج عبارة عن أنثى مهمتها في الحياة أن تعتني به وبأولاده وببيته وأن تقوم بمهمة الفرفشة عن رجل هذا البيت

ومن وجهة نظر الأنثى العديد من وجهات النظر ربما حتى تكون قد تزوجت واحد افضل من الشاب السيس التي تزوجته سالي بنت عمها أو حتى لا تسمع كلمات التحسر على شبابها من أمها أو ربما حتى لا ترى نظرات الشماته المغلفة بمصمصة الشفايف زوجة عمها نوال المصحوبة بكلمتي " كبدي عليكي يا بنتي دا انتي زي القمر هما الرجالة اتعموا"

أو ربما تتزوج كواجب اجتماعي يسمح لها بالحصول على لقب مدام في عصر أصبح فيه لقب آنسه عبارة عن خنجر قاتل لفتاة تعدت الثلاثين من عمرها ولم تتزوج بعد

ولكن لم أرى حتى يومنا هذا من تريد الزواج من أجل أن يكون هناك من يشاركها الأحلام كسبب رئيسي للزواج - ربما أكون أعمى - فالزواج بعد الأسباب الدينية البحته لابد أن يكون له سبب آخر في نفس كل من هو مقبل على تلك الشراكة

فمن وجهة نظري المتواضعه أن شراكة الزواج والتي لازلت متمسك بأن الرجل له في هذه الشراكة نصيب أكثر من 51% ليحق له الإدارة عبارة عن جمع أحلام الطرفين ووضعهم بشكل رأسي ثم البدء بتقسيمهم طوليا فيصبح مع كل منهم نصف حلم الآخر ليكمله مع شخص الآخر وعلى كلا الطرفين السعي دوما لجعل تلك الشراكة ناجحه نجاح منقطع النظير

بينما ما يحدث في معظم ما نسمع عنه من حالات زواج أن الزوج بعد الزواج أصبح أكثر عصبية وأصبح مثل عطية السباك في تعاملاته والزوجة أصبحت غير اللي التي سعى لها الزوج فبدلا من أن تكون مثل الملاك الرقيق الذي سعى إليها وجدها مثل الست نعيمة بائعة الكرشة في سوق السبت في بلاد الأرياف وممكن تغزه بمطواه لو صدر منه كلمة ليست كما تهوى

Buzz

هذا الصوت كثيرا ما أزعج كل من هو سارح أثناء الحوار الكتابي

الصديقة العزيزة : " انت روحت فين يا عم"

أكيد لم أذهب لمكان ولازلت جالس أمام صفحة الحوار الكتابي أفكر لماذا لم أتزوج حتى الآن حتى خلصت لنتيجة هامة خيال الإنسان قد يكون سبب توقف جزء من حياته وإصابتها بالعطب والتعطل فلن أجد من أحلم بها ولا أنا كما تحلم أي فتاه

وأهو كله كلام

ماذا بعد ذلك (3) ... لما الحمار ينهق

2009-09-06T00:23:00.003+02:00

تابع قبل القراءة

ماذا بعد ذلك 1

ماذا بعد ذلك 2

النهاردة مش هاتكلم باللغة العربية .... لأن الحديث اليوم هايكون عن حمار كبير أوي لا وحمار حصاوي كمان .... ربنا شال ديله واداله بدل منها مناخير اكبر من راس الحمار ( خلقتك شريفة يارب ) والنوعية القذرة اللي زي دا ماينفعش الحديث عنها بلغة نضيفة دا احنا لازم نجيب من قاع اللغة ونتكلم

حديثنا النهاردة عن الحمار الكبير مفيد فوزي ... ومفيد فوزي يعد من أكثر مذيعي وصحفيي مصر شهرة بالوساخة والتعصب الغير شريف والتسلق والتملق والنفاق ... ليس من اليوم ولكن من زمان من أيام ما ادعى انه هو من أطلق على الراحل عبد الحليم حافظ لقب العندليب الأسمر

مفيد فوزي الجاهل التافه العبيط الذي من فرط سفاهته وسذاجته يعتقد أن المصريين بيحبوه ( عبيط والله ) له ملف أسود من الآراء المختلفة عن أي راي يظهر في الدنيا ويتعمد دائما أن يدخل الدين في كل أحاديثه وهذا إن دل يدل على عنصريته ضد الإسلام ولازم نوضح جزء من سفاهات التافه ابن التافه مفيد فوزي

فعند غرق العبارة السلام 98 كان مفيد فوزي أول من أجرى حوارا عنها ليس مع أهالي ضحايا العبارة لكن مع صاحب العبارة نفسه وصوره شهيد وضحية

مفيد فوزي الذي لا يفقه في دينه أكتر من مشاكل الطلاق نتيجة لوقوع ابنته في مشكلة طلاق يتحدث عن الحجاب ويقول عنه أنه غطاء للرأس والعقل ماذا بقي بعد ذلك عندما يتحدث مفيد فوزي عن الاسلام ( الله يحرقك مطرح ما انت قاعد )

مفيد فوزي الذي دافع باستماته عن قاتل وطالب الأطباء بأن يعتبرونه مختل عقليا لمجرد أن القاتل مسيحي الديانه فاعتبر الامر مؤامرة على الأخوه المسيحيين

مفيد فوزي بكل بساطة انت حمار بتنهق وأحيانا في حمير بتنهق ويكون صوت نهيقها عذب لكن انت نهيقك منفر ويا سلام لما الحمار تستضيفه معزة زي الولية بنت التيــــــــــــــت اللي اسمها ايناس الدغيدي

تبقى باظت

اللقاء الجبار لقاء ال ..... والحمار ( هي مرات الاسد اسمها ايه )

في هذا اللقاء الساخن سخونة الشوربة ساعة الفطار نهق الحمار وقال أنه لابد من إلغاء نسبة ال 50% بتاعة العمال والفلاحين من مجلس الشعب ( انا فاهم هو بينهق لأيه ) وكمان لازم نشيل ال 88 بتوع الاخوان من المجلس لانهم دخلوا بطريقة غير شرعية وفوق كل دا نلغي خانة الديانة من البطاقة

نقطة نقطة كده ياعم الحمار نشوف انت بتقول ايه ... ال 50% نلغيهم بمناسبة ايه دا المفروض نسبة العمال والفلاحين تزيد لتصب إلى 75% ولا هو انت مابتشوفش الشعب فئاته بقت ازاي مش كفاية انك حمار ؟؟؟

ثانيا الاخوان المسلمين اللي تاعبين لك أعصابك واللي انت بتقول انهم هايرجعونا 50 سنة ورا ممكن تفهم السادة اسيادك المستمعين نجحوا ازاي بطريقة غير شرعيه ؟؟؟ هما لو نجحوا بطريقة غير شرعيه فعدم شرعية نجاحهم تدل على ان اللي زيك بيطل علينا بصورة غير شرعيه انت اللي زيك مكانه الزريبة

ثالثا : خانة الديانة التي تريد أن تلغيها من البطاقة تتحدث بالنيابة عن مين ... إذا كان المسيحين نفسهم مش عايزين خانة الديانة تتلغي من البطاقة ... ولا انت عايزها ظيطة وسداح مداح

بالتأكيد لما حمار زيك يتكلم وفي حضرة واحدة زي ايناس الدغيدي أكيد هايكون لقاء زرايبي

مفيد فوزي بقولهالك تاني انت حمار كبير

ماذا بقي بعد ذلك (2)

2009-09-04T22:28:00.001+02:00

لازلنا مع العدد الأسبوعي لجريدة الدستور والتي كنت يوما ما أظن أنها حقا تتحدث بلسان حال الشعب ولكن صدمتي بها كصدمة من رأى أمه قاعدة بتشيش في كافيه

وهذه المرة أيضا سأتحدث باللغة العربية حفاظا مني على تعليقاتي التي تفلت مني دون قصد عندما أتحدث بالعامية فأظن أحيانا أنني جالس " على مصطبة خالي في القرية " وأجد لساني قد إنفلت بكلمات من وجهة نظر الكثيرين هي سيئة

ولكي نتابع جيدا ما سأتحدث عنه فرجاءا ممن تفضل بقراءة المدونة أن يعود أولا لموضوع ماذا بقي بعد ذلك أو الجزء الأول من موضوعنا هذا إن لم يكن قد قرأه

إن أكثر ما صدمني في جريدة الدستور تجرأها الشديد على علماء أجلاء لم يفعلوا في هذه الدنيا سوى أنهم أرادوا لنا الخير وقدموا لنا النصيحة التي إما أن نقبلها أو نرفضها منهم دون الذم فيهم فكانت من وجهة نظر محرري جريدة الدستور أنهم يمررون حياتنا وينغصون علينا عيشتنا وبيكفرونا ليل ونهار

بل وذهبت جريدة الدستور ومن خفلها محرريها للسخرية من أمور كثيرة تتعلق بالدين الحنيف ومظاهره وشعائره وسننه بل وفروضه وكنت أنوي الرد على أحد كتاب جريدة الدستور والذي كتب موضوعا عن مظاهر التدين في مجتمعنا ولكن أستفزني موضوع آخر للمذيعة والصحفية بثينة كامل صاحبة برنامج اعترافات ليلية ذلك البرنامج الذي كان يذاع على إذاعة البرنامج العام الشهيرة بإذاعة هنا القاهرة

وجدت لها عمودا تحت مسمى إعترافاتي الشخصية تتحدث فيه عن إحدى رحلاتها إلى اختها في استراليا ولمن يريد قراءة الموضوع فعليه بالضغط هنا حتى يقرأ أولا ماذا كتبت مذيعة اعترافات ليلية الشهيرة قبل قراءة تعليقي عليها

بدأ الموضوع عاديا جدا في حديثها عن مظاهر العنصرية ضد المسلمين في استراليا ومعاملتهم وكأنهم منبوذين وإن ذكرت أن اختها لم تتعرض لأي نوع من أنواع العنصرية على خلاف أشخاص آخرين وربنا يستر... كما أن العنصرية في حد ذاتها أمر قد اعتدنا عليه في بلادنا والبلاد الأخرى ولكن هذا موضوع آخر .

ولكن ما أستفزني حقا أنها رمزت إلى الحجاب والصلاة كنوع من أنواع التميز الذي نقصد ونتعمد إظهاره للآخرين الأمر الذي جعلها مع كم المحجبات في عائلتها أن تظن أنها في حملة تبشير الأمر الذي جعل الست بثينة الله يهديها تشعر أننا نحن المسلمون نرمي بأنفسنا في دائرة الفصل عن الآخرين وكأننا نقول طول الوقت لهم نحن مختلفون عنكم

حاولت مرارا أن أفهم معنى كلمتها فأقرأ الموضوع نائما وجالسا وقاعدا وحتى وأنا في الحمام حتى أتوصل لمعنى الجملة السمجة فلم أفهمها

هل أرادت الست بثينة الله يهديها أن تخلع كل أنثى حجابها وتتعرى بقدر الإمكان حتى لا تعلن لمن حولها أنها منفصلة عنهم ويسهل عليها الاختلاط ولا تتعرض أمام ذلك للاضطهاد ؟؟ ( نفسي أفهم الحجاب تاعبهم في إيه )

هل معنى أن ننتقل إلى بلد غير مسلم أنه حرام علينا أن نمارس شعائر ديننا الحنيف من حيث الحجاب أو الصلاة ؟؟

هل معنى أن بقية أهلها من النساء محجبات فهي بذلك في حملة تبشير لمجرد أنهن اختاروا ما أمر الله وأقاموا شعائره ... هل فرض الله الحجاب على المرأه في بلادها المسلمة فقط أم هو مفروض عليها في كل ساعة تظهر فيها أمام رجال غرباء عنها ؟؟؟؟

لقد بدا موضوعها وكأنه سخرية من أمر الحجاب في بلد لا تعرف ما معنى الإسلام وبدا وكأنه دعوة لأن نتخلى عما يميزنا عن الآخرين حتى وإن كان ما يميزنا هذا هو ما أمر به الله عز وجل

ماذا بقي بعد ذلك لو تركنا الصلاة وخلعنا الحجاب حتى لا نصبح منبوذين أو مفصولين عن الآخرين ماذا بقي بعد ذلك من الدين ... وأيهما أبدى وأبقى نفوس العباد أم رضا رب العباد ؟؟

موضوع الست بثينة بدأ بإسم قوة الآذان وظلت طوال المقال تتحدث عن الصلاة والحجاب والعنصرية في استراليا وقبل أن تنهي موضوعها بثلاثة أسطر تحدثت عن الميكروفون الغير مرخص في المسجد المجاور لبيتها والذي يقطنه أكثر من 90% من الاخوة المسيحين

فلا الموضوع يمت بصلة للعنوان ولا العنوان له علاقة بالموضوع ولم أفهم لماذا هذا العنوان وما دخل مشكلة الميكروفون الغير مرخص في المعاملة العنصرية التي تحدثت عنها فكأنها قالت في مقالها كما أقول دوما في نهاية كل ما أكتب

أهو كله كلام

ماذا بقي بعد ذلك

2009-09-03T01:44:00.006+02:00

كل عام وأنتم بخير أعاد الله عليكم الشهر بالخير واليمن والبركات ... منذ أشهربعيدة لم أفكر في شراء جريدة مطبوعة خاصة لأنني خارج البلاد وحتى وإن كنت داخل البلاد لا أفكر في ذلك نظرا لأن معظم الجرائد لا تأتي بجديد عما نراه على صفحات الإنترنت وأحيانا كلما تذكرت كلمات عمر طاهر فمع ذلك التذكر أقرر أن أدفع جنيهان ( بحالهم ) في جريدة الدستور وذلك فقط لأن عددها الاسبوعي يتأخر يومين كاملين حتى يتم نشره على موقع الجريدة الرسمي فأقرر أن أشتري دماغي بهذين الجنيهين وأن أقرأها في موعدها بحثا عما كتب عمر طاهر .

وبينما كنت أسير في وسط المدينة وجدت العدد الاسبوعي لجريدة الدستور فقمت بشراءه ودفعت المبلغ المطلوب 2 جنيه للأسف الشديد وبدأت في تصفح الجريدة سريعا للبحث عن صفحة عمر طاهر فكانت الصدمة الأولى أنني لم أجد له أي صفحة أو حتى تنويه عن أنه لن يكتب هذا الأسبوع ويبدو أنه لم يعد يكتب في العدد الأسبوعي .

ولكنني وجدت عنوانا في الصفحة رقم 6 لكاتب يدعى محمد خير ( والله ما أعرفه ولا عمري قريت له ) يقول

"لو كان الإسلام هو الصلاة والصوم واللحية والسواك والسبحة لكان المصريون هم أكثر شعوب العالم تدينا"

نبدأ بالتعليق على العنوان ثم ننتقل بعد ذلك للمقال نفسه وإن كان على رأي مثلنا البلدي أول "المقال" كفر وهو فعلا قد قارب أن يمس الكفر فالأخ الكاتب هداه الله إعتبر أن الاسلام ليس صلاة وصوما ونسي أن أركان الإسلام الخمس 3 منهم يستحيل ألا يؤديهم مسلم هم الشهادة والصوم والصلاة فالزكاة ربما لا يؤديها مسلم بإندراجه تحت من يستحقون الزكاه والحج هو لمن استطاع إليه سبيلا بينما الشهادة والصلاة والصوم فلا مناص للمسلم من تأديتهم حتى وإن لم يستطع الصوم فله الفدية

ثم بعد ذلك يدعي الأخ محمد الله يهديه أن اللحية والسواك والسبحة ليسوا من مظاهر الإسلام فخلط بحديثه خلط غريبا إن دل يدل على عدم علمه بشيء في أمر دينه يجعل حديثه عن الدين نكته بالغة التأثير لحد البكاء فاللحية يا أخ محمد الله ينور لك عقلك إختلف فيها علماء كثيرون ولم يكن إختلافهم في حلقها من عدمه بل كان إختلافهم في تهذيبها من تركها دون تهذيب فأنت أغفلت أحاديث الرسول ولأن الشرح سيطول في ذلك الأمر فقد توصلت إلى موقع يقع تحت إشراف دار الإفتاء السعودية ولم أجد مثله في موقع مصري سوى مواقع الدين المصرية والتي لا تعجبك ولا يعجبك شيوخها فوددت أن أنقل لك الموقع المختص بدار إفتاء دولة مسلمة

والموضوع بعنوان حكم الأخذ من اللحية وتقصيرها وتهذيبها يمكنك الضغط على عنوان الموضوع ليقوم بتحويلك للصفحة المطلوبة

فماذا بقي بعد الصوم والصلاة من الدين حتى لا تعدهم من مظاهر الاسلام وقد شهد الرسول لمن جاء إلى المسجد أو راح بالإيمان ماذا بقي بعد ذلك ؟؟؟؟

ثم قرنت مع اللحية السواك فأصبح فرض اللحية من الرسول صلوات الله عليه الذي لا ينطق عن الهوى مصحوبا بالسنة التي يمكن تركها ثم أرغيت وهرطقت بعد ذلك بقولك السبحة مع أن جميع علماء المسلمين متشددهم ومتساهلهم أجمعوا على كونها بدعة

هذا تحليلي فقط لعنوان موضوعك وكم الأخطاء التي فيه وسنكمل معا موضوعك الذي يعد موضوع إنشاء لطفل فاشل في الصف الثالث الإيتدائي الذي صحبته برسم كاريكاتيري سافر وليس ساخر يسخر من أمر الحجاب ولا أدري لماذا يضيركم ويتعبكم الحجاب هكذا وكأن سفور المرأه فيه متعة لأعينكم

المهم كون المصريون متدينون فهذا لا شك فيه حتى وإن كان هناك نصف المصريون يعيشون في فسق وضلال فالمصريون خير أجناد الارض ... يا أخ محمد كما أنك تناسيت تماما أن مالا يدرك كله لا يترك كله فليس معنى ألا تصلي فتاه أن تمشي في الشوارع يتناثر خلفها جسدها فارا من ملابسها التي لا تتسع له فلقد قارنت بين كم الفتيات المحجبات وبين كم الفتيات المحجبات اللائي يصلين

فلماذا لم تقارن بالله عليك بين الفتيات السافرات وبين السافرات اللائي يصلين أم أن السفور يعد علامة صريحة لعدم الصلاة وإذا كان السفور يعد علامة صريحة لعدم الصلاة فمن باب أولى أن تحتجب المرأه حتى لا تصبح لا تصلي وأيضا تثير الغرائز في نفوس الشباب .

أما مكارم الأخلاق التي تحدثت عنها والتي أتى الرسول صلوات الله عليه لإيجادها في مجتمع ضاعت منه الأخلاق هذا إن كنت تقرأ التاريخ فعد إلى ما كان عليه العرب آن ذاك لتعلم أن كثيرا من الأخلاق قد ماتت وأختفت ومن أحياها فقد أحيا الأخلاق كلها وأخترعها وأوجدها من جديد ثم بعد أن أوجدها تممها بالإسلام وهي إذا كانت موجودة فعلا فلا داعي لدين ليتمها إذن فهي تكفي ... فمن أصول الدين هو منع الفساد في الأرض وإن كان الدين المعاملة كما تقول والمعاملة متوافره في الأرض ولن يزيد الرسول إلا تمامها فلا داعي للدين فالمعاملة متوفره

ولا أدري هل لابد ولزاما على من يخطئ أن يترك الصلاة والصوم حتى يكون شخصا غير متظاهرا من وجهة نظرك الكريمة الخاطئة ؟؟ ألا تعلم أنه لابد أن تجعل الباب مواربا بينك وبين ربك وأن ربك غفور رحيم

ألا تدري أن الأصل هو الدين وأن من حاد عنه بالاستغفار والتوبة قد عاد إليه أي أن ما تعتبر أنه مجرد مظاهر مثل الصلاة والصوم هو الأصل وإن حدت عن الأصل للحظة من اللحظات التي تعتبرها هي الأصل فعلينا العودة إلى الدين

أما حفر زبيبة الصلاة يا أخ محمد فزبيبة الصلاة لا تحفر على جبين المصلين فالمصلون سيماهم في وجوههم من أثر السجود ولا أدري من أين أتيت بفكرة حفر زبيبة الصلاة في مصر فأنا لم أسمع عن أي حفر سوى حفر آبار الغاز المصدر لإسرائيل أما حفر زبيبة الصلاه فهي نكتة جديدة فيها الكثير من الإفتراء .... ورغم ذلك فهي ليست مظهر من مظاهر الدين فكثيرا من المصلين ليست لهم علامة السجود

الأخ محمد عندما تنوي أن تنتقد مظهرا من مظاهر الدين فعليك أن تعرف ما هو عمق الدين حتى تستطيع التفرقة بين المظهر والجوهر لا أن تخلط الحابل بالنابل وأنت لا تدري ولا تعلم ماهو المظهر من الجوهر

نصيحة من أخ لك يمكنك اعتباره لا يفقه شيء .... اكتب في السياسة وسيبك من الدين مش كل من هب ودب بقى بيتكلم في الدين كأنه هو ولي الله في الأرض

وأهو كله كلام

.......... يا مصر

2009-08-19T23:28:00.004+03:00

النقط اللي في العنوان تشير إلى كلمة من 3 حروف يعد أشهر لفظ اعتراض مصري احيانا بيكون مصحوب بصوت اخر ولكن انا بقولها بعزم حسي لا وبافكر جديا اني احول الاسم نفسه لمدونة مخصوص لاوضاع البلد اللي متستحقش غير قولة ..... ام 3 حروف دي

خبر بيقول إشتعال 11 خيمة بمولد مارى جرجس بالدقهلية دون اصابات ... الحمد لله انها جت سليمة ودون اصابات وان كانوا بيقولوا ان سبب الحريق عقب سيجارة زي العادة

والله ما مشكلتي في الخيمة ولا مشكلتي في عقب السيجارة لا وكمان انا معترض على فكرة الموالد اصلا وتقديس شخص اي كان حتى لو كان مين لانه لو عبد ربنا فهو عبد لنفسه وذريته وفقط والناس التانيه دي ولا ليها دخل ولا هو بقى بركة ولا اي كلام فارغ من الكلام دا

مشكلتي كلها في مولد السيدة زينب الذي تم إلغاؤه خوفا من انتشار مرض انفلونزا الخنازير ومش مولد السيدة زينب بس ... لا.... اكتر من مولد في نفس المحافظة التي اقيم فيها مولد ماري جرجس فماذا تقصد حكومتنا الوسخة من هذا يعني العاقل يفكر براحة كده يوصل ل 3 نتايج واللي يوصل لاكتر يقولي

1- تريد حكومة عزبة مصر اثبات للعالم أجمع انها تعامل الأخوة المسيحين افضل معاملة ومافيش بعد كده بدليل اننا لاغينا مولد السيدة زينب لكن مولد ماري جرجس لا ازاي ماينفعش وبالتالي فهي بتأكد فكرة التفرقة بين المسلمين والمسيحين دون ان تدري حتى عند الشعب

2- او ان حكومتنا تقصد اظهار التفرقة في المعاملة بين المسلمين والمسيحين حتى يظل كلاهما مشغول بازاي يقرف التاني في عيشته وينسى خالص ان الحكومة بتظبط لكارثة التوريث في 2011

3- او ان حكومتنا بدأت تزهق من اخواننا المسيحين وتحولت حكومتنا إلى ارهاب من نوع آخر وقالت خليهم يتجمعوا في مكان واحد عل وعسى يكون واحد فيهم عنده انفلونزا الخنازير فيعدي باقي الناس فيموتوا كلهم مرة واحده ونبقى خلصنا من عدد محترم من المسيحين اللي قارفين الحكومة بمطالبهم وحقوقهم المهضومة من وجهة نظرهم

طيب الحكومة تقصد مين في دول .... شكل حكومتنا خبيثة وتقصد الاختيار الرابع الغير مكتوب واللي هو بيقول كل ما سبق صحيح

واهو كله كلام

أحسن ناس

2009-08-14T16:14:00.013+03:00

ليس هناك من لا يجيد الحديث عن نفسه فكلنا بلا استثناء نجيد بروزة شخصياتنا في أحلى وأبهى الصور لتصل إلى رسم صور تضاهي صور فان جوخ او صور توماس كنكيد ولست أستثني نفسي ممن يجيدون بروزة نفسهم فكلنا هكذا نجيد تلك البروزة والتباهي بالصولات والجولات إلا من رحم الله ومن عليه بالتواضع

اليوم قررت أن أتحدث عن قوم عشت بينهم عامين ونصف العام وعندما قررت الرحيل عنهم لم أكن أعلم أن بين جنبات نفسي شوق لهم سيؤرق نومي ويقض مضجعي ويجعلني تائها دونهم

انهم قوما يؤثرون على أنفسهم ولو كان بهم خصاصة ... حقا كانت أحلى أيام عمري ولم أكن أدري أنها كذلك

ترتيب ظهور الشخصيات هايكون حسب معرفتي بيهم شخص شخص واحد واحد

الأول

الاسم : أحمد عبد الحميد

اسم الشهره : بيدو

الصورة

هو دا بيدو كما نسميه والصورة دي اتصورها وهو مش دريان وهو قاعد في المكتب بيخلص ورق الامتحانات الخاصة بالشركة اللي بنشتغل فيها طب انا وهو اتعرفنا ازاي ... قصة بسيطة جدا بدأت كالتالي أخويا كان بيعمل في الشركة اللي انا وأحمد عبد الحميد ( بيدو ) فيها والشركة طلبت موظفين جدد فأخويا طلب مني أبعت ورقي بعت الورق وربنا كرمني وقبلت أما أحمد عبد الحميد فكان له قريب بنفس الشركة بردو طلب الورق احمد قبل أيامها كان الطريق البري بين مصر وليبيا مفتوح والشركة في حالة استقدام موظفين جدد فبتشترط انهم ييجوا اول مرة بري

قالي اخويا في واحد اسمه أحمد عبد الحميد جاي خد رقمة وكلمه واتقابلنا في الازهر ... بعيدا عن احمد عبد الحميد نفسه ... ربنا رزق صاحبي دا بأب فعلا فعلا تربيته بانت في أحمد

الناس بتتعرف في السفر لأنه فعلا بيسفر عن مكنوناتهم ... اول ما دخلنا ليبيا واحنا مشوارنا لحد طرابلس مكانش معايا ولا دينار ليبي ولا حتى أي حاجه من حاجة الطريق غير الميه والسجاير وجينا في نص الطريق الجوع اشتد الناس نزلت تاكل في مطعم وانا فضلت في الميكروباص ... وفجأه لاقيت سندوتش وموزة بين ايديا ... ايه دا يا حاج قالي ياعم اكل واحد يكفي اتنين اتكل على الله كل

أكل بيتي معتبر أكل احمد عبد الحميد ... اتقسم على 3 انا وهو وواحد مصري تالت كان معانا منعرفوش بس قعد زينا لانه ممعاهوش فلوس ليبي

بالتأكيد مش الموقف دا بس اللي أسفر عن الشخصية دي في مواقف كتير دول سنتين ونص يا خلق

أشطة عليك يا بيدو

الثاني

الأسم : أحمد السيد طه ( أحمد طه )

الشهرة : توتا ( الشهرة الخاص بيا انا توتي )

الصورة

دا توتي رفيق المشوار من يوم ما جه واتعرفت عليه عن طريق أحمد عبد الحميد هو صديق أحمد عبد الحميد بيدو واتعين في الشركة عن طريق أحمد عبد الحميد بردو

بس انا وهو اللي بندخن فبقينا انا وهو بندخن في طفاية واحده فبقى بينا عيش ودخان .... 4 شهور في منطقة اسمها غريان الحلو والمر كله شوفناه سوا اكل شرب ... حتى المية لما تقطع اللي معاه مية يتوضا منها بيقسمها بالنص بينه وبين التاني .... توتي فاكر يوم لما كان في لجنة .... اكيد فاكر .... واحشني يا رفيق الغرفة

الثالث

الأسم : أحمد محمد رضوان

الشهرة : رادو

الصورة :

انا عاليمين ورضوان عالشمال

اللي شاف فيلم رمضان مبروك أبو العلمين يقدر يتخيل شخصية أحمد رضوان بسهولة من ناحية الحرص على العلم ولا يخاف في الله لومة لائم .... بجد الحق يقال ولو كان هايترفد من الشركة ... ولو قولتله كده يا رضوان تقول الكلام دا يقولك اقولهالك انا احسن ما حد تاني يقولهالك .... بسيط لأبعد الحدود .... طيب جدا فوق ما حد يتخيل .... لكن مابيسيبش حقه لو حصل ايه .... اول ما عرفته ماكنتش فاهم شخصيته اطلاقا ودا كان غباء مني لاني ببساطة كان معايا كنز وكنت ملهي عنه .... وبداية من رمضان اللي فات يشاء المولى عز وجل ان ربنا يقربنا من بعض فأعرف على ايده يعني ايه ويؤثرون على أنفسهم واعرف كمان يعني ايه تكون حقاني حتى لو الناس هاتزعل من الحق وبردو تكون طيب وخلوق مع الناس

دا ماينكرش ان احمد رضوان ملك التثبيت في الشركة واستاذ في تثبيت المتدربين قبل المدربين ... وعلى العموم السمك في البحر بيعوم ( مش كده يا رادو )

والله واحشني يا رضوان ... رضوان انا نسيت علبة النعناع اللي اخدته منك .... عينها لحد ما ارجع

أصدقائي وأخواتي وحبايبي والله العظيم وحشتوني جدا جدا جدا فوق ما تتخيلوا

ربنا ما يحرمني منكم

الناس دي مش هي بس اللي احسن ناس في ناس تانيه بردو بس دول المرة الجاية

والكلام دا مش زي اي كلام