مذكرات انسان عادي

متفقين من البداية ان احنا في مدونة كله كلام واتفقنا بردو ان المدونة زي اسمها كلام

واتفقنا بردو ان الكلام اما يكون مفيد او يكون فاضي والكلام اما يكسبك حسنة او يكب وجهك في النار

وانا قررت امتنع عن الحديث في السياسة

وقررت الغي كل الكلام اللي عن السياسة او اللي بيلمح للسياسة او اللي ممكن ياخد الانسان لسكة السياسة باي شكل

لأن كلامي إما اكون زي ما بنصح الناس انها تتكلم اتكلم واما ما اتكلمش وانا بره بلدي وبقول للناس تتكلم طيب ما بدل دا ارجع بلدي انا واتكلم

آسف للمقدمة الطويلة دي وهانرجع للكلام تاني بس الكلام بشكل مختلف

انا بصراحة من وانا عيل صغير من كتر الحاجات الغريبة اللي كنت بقراها - ومبتدعيش ثقافة عشان ميجيش حد من صحابي اللمضين يقولي انت هتعمل علينا مثقف - من كتر الحاجات اللي كنت بقراها زمان ولغاية دلوقتي بدأت احس ان مخي شطح من الحاجات دي وان انا بدات اراقب تصرفات نفسي لحد ما وصلت لدرجة تكاد تكون مرضية من مراقبة النفس والمراقبة حاجه والتقويم حاجه تانيه

الأول كنت عايش دور عبد الحليم حافظ في فيلم الوسادة الخالية وعايش دور الشاب الرومانسي ( مع ان شكلي ميديش على رومانسي خالص )
وفضلت في الحالة دي لحد 3 كلية ويا سلام لو قريت كتاب رومانسي حلو الاقي عيوني مسهتنة وماشي افكر في المطر والشجر والشعر بكسر الشين


وبعدين وبدون مقدمات تحولت لإنسان مادي من وانا في 4 كلية بشتغل وبكسب بعيدا عن أهلي اي نعم ماتخلتش تماما عن كل مساعدتهم بس عرفت ازاي اوصل للأشياء اللي كانت من وجهة نظر والدي محرمات على الشباب اللي في سني ( والحمد لله مروحتش لمحرمات )

وبردو وبدون مقدمات تحولت لإنسان عملي ازاي انجح في شغلي دون النظر للكسب المادي ومانكرش ان الفترة دي على اد ما نجحت فيها على اد ما خسرت فيها وقت كبير قد يتجاوز ال 3 سنين لحد ما ربنا كرمني وقدرت احقق المعادلة اللي مش صعبة نهائي اني اكون ناجح وفي نفس الوقت بكسب اللي يرضيني ويعود عليا بالنفع المادي والمستوى الميسر ولله الحمد

ووصلت للمفترق ...... مظبوط مفترق الطرق .... نقطة السؤال المهم انا مين وبحقق ايه وبحققه لمين وبحققه ليه

مجموع أسئله كل واحد فيهم أصعب من التاني عشان تقعد تكتب بالورقة والقلم اجابتهم ربما تحتاج مدونة كاملة بالشكل دا

انا قررت اكتب كل اللي يخطر ببالي ربما ميكونش مفيد لأي انسان وربما يكون مفيد المهم اني بكتب اللي في نفسي

وأهو كله كلام

أكتب ايه ؟؟؟

زمان ( وكلمة زمان دي هتتكرر كتير لأني بحكي دايما من الاول ) قريت جملة عجبتني جدا كان كاتبها بيقول فيها ان من حق أي ان سان ان يكتب تاريخ حياته اللي احنا سميناها مذكراته لانها مهما كانت قصيرة او صغيرة او مهمشة فلابد أنه يوجد فيها ما يستحق ان يكتب

ولما كنت بفكر هاكتب ايه

اعمل فيها أبو العريف الداري بأمور قصر الرئاسة واتكلم عن السياسة وتكون نهايتنا الطبيعية اما مستشفى المجانين او سجن ابو زعبل وممكن يلفقولي تهمة ازدراء الاديان

او اكتب عن ارهاصاتي في الحياة البشرية ( حلوة ارهاصاتي دي )

او اتهبل في دماغي واكتب في الحب ( على اساس اني نزار قباني يعني )

او اتهطل واكتب عن الرجل والمرأه وتكون النتيجة قضية مرفوعة من واحده مهروشه في دماغها زي نوال السعداوي تتهمني فيها اني عدو المرأه والاقي امريكا جايه تضربني بصواريخ باتريوت لاني عاديت حقوق الانسان وانتهكت حقوق البشر

معجبنيش كل دا وخبطت فكرة في دماغي اني اكتب عن نفسي ... اه نفسي ... ايه المشكلة ماهو انا مش هاكتب اني شاب وسيم وحليوه وطول بعرض وعديت السبع بحور واكتشفت سر شويبس الخافي عن عيون الناس

انا هاكتب اللي شوفته في حياتي وحسيت انه غير فيا وأثر في تفكيري وحياتي وربما حياة آخرين وربما وجهة نظري في كل المحيطين بيا ربما كلام يستحق المناقشة وربما يدخل في دايرة الكلام الفاضي اللي لا يودي ولا يجيب

وفي كلا الحالتين انا بكتب لنفسي ولمزاجي المهم مأحرمش نفسي طالما مش هاعمل حاجه حرام

وبردو في الاخر هيكون كله كلام

بسم الله نبدأ الكلام

أول مرة أعمل مدونة

اه والله بجد أول مرة أعملها ومش عارف ليه وانا بعملها حسيت اني بعمل جريمة وخصوصا ان عالم المدونات اليومين دول أصبح عالم مشبوه بس ما علينا هي في الأول والآخر زي اسمها بالظبط كله كلام والسلام

بس المشكلة ان الكلام أنواع

في كلام في الهوا

وفي كلام الليل مدهون بزبدة يطلع عليه النهار يسيح

وفي كلام في المليان

وفي كلام فاضي

وفي كلام معسول

وفي كلام يا عبد السلام

مين عبد السلام دا ؟؟؟

ما علينا نرجع لموضوعنا اللي هو الكلام

طبعا ممكن واحد من أصحابي الحلوين يسألني عملت مدونة ليه ؟؟؟

بجد سؤال وجيه ( أشيك من وجيه أباظة ) عارفينه ؟؟

ارد انا واقول عملت المدونة عشان اعرف اقول رأيي براحتي وخصوصا ان الاماكن اللي ممكن تقول رأيك فيها في الوقت دا بقت قليلة يعني مثلا لو فكرت تقول رأيك في منتدى كل المنتديات بقت اغاني وبرامج ومعادش في حد بيدخل منتدى عشان يكتب كلمة عدله وفي الشغل هتقول رأيك لمين يا حسرة ... زمايلك اما بيفكروا في ال(موزز) وهي جمع كلمة (موزة) بشد الزين وتعني البنات الحلوين - وطبعا انا منهم انا مش سيدنا يوسف - او ناس تانيين عاملين زي عبده روتين بيلملم في ورق وخلاص

اتخنقت قلت لازم اعمل مدونة

وعشان ماطولش عليكم ( قولوا طول ) قررت اني اخد راحتي هنا لوحدي اللي عايز يقرا لي اهلا وسهلا بيه واللي مش عايز يقفل الصفحة ولا كانه شاف حاجه

واهو كله كلام والسلام