أنواع الغباء

عمرك صحيت من النوم وحسيت في يوم انك غبي ؟؟؟

وان كل ما يحيط بك مبهم وانك ليس لديك القدرة على استيعابه ؟؟ اوعى تقول لا ... لان لا يوجد انسان على كون الارض لا يشعر هذا الشعور احيانا

وفي ناس تشعر به على طول الخط ... وهناك من يستسلم تماما للشعور بالغباء ويتيقن أنه ليس لديه القدرة على ان يبدع في اي مجال لانه ببساطة غبي

والكلمة بمجملها لفظا وفعلا خطأ ... لأن ببساطة لا يوجد انسان غبي مافيش انسان بمجمله غبي او لا يستطيع التصرف او التفكير لان ببساطه الذكاء اللي هو عكس الغباء أنواع .... مقسم لعدة أشكال ويستحيل يكون الانسان ذكي في كل الانواع او غبي في كل الانواع اكيد بتكون لديه مهاره في عدة انواع منها وفاقد للمهارات الاخرى الاهم من دا كله ان الذكاء او الغباء لا علاقة له بالوراثة يعني الاب والام ليس لهم دخل الا التربيه في ذكاء او غباء شخص ما ربما دخلهم في اكتساب المهارات

فالانسان قدرات عقله مقسمة لعدة انواع في ناس قالوا 7 وناس قالوا 8 وفي واحد اسمه توني بوزان قال 10 ( توني بوزان دا مبتكر فكرة خرائط العقل أو الخرائط الذهنية ) وبصراحه انا مصدقه هو ان الذكاء 10 انواع

ولكن احنا هانعرض 9 بس لان في نوع ربما يكون خاص شويتين لا يجوز عرضه بالشكل العام

والنوع الاول دا النوع الابداعي والغباء فيه يأتي في حال فقدان القدرة على تنظيم أفكارك الجديدة أو في حال عدم المرونة او القدرة على رؤية الاشياء من زوايا مختلفة ... كل شيء يحتمل اكثر من وجهة نظر وانعدام القدرة على التفكير الحر بدون حواجز فيما قد يفيد وفوق كل دا ان الناس المفتقرة لنوع الذكاء دا لا تحمل بين طيات العقل أي قدرة على الصبر والمثابرة ( ياه الصبر دا فعلا مفتاح الفرج ) شوفوا حتى العالم الامريكان بيأكدوا على أهمية الصبر والله سبحانه وتعالى قبل كل الناس دي قال وبشر الصابرين

المهم ان الشخص الغبي ابداعيا دا متناسي او متجاهل او لا يعرف شيء هام جدا ان العقل الذي بين طيات رأسه لديه قدرة رهيبه على تطوير وتوليد الافكار وبيولد أفكار اكتر عددا من ذرات الكون والاهم من ذلك انه بينظر للتصرفات التي يقوم بها كل يوم على انها امور عادية رغم انه ربما يكون ابدع فيها ابداع غير عادي دون أن يدري أو دون أن يجد كلمة تقدير من الاخرين تجعله يشعر انه لا يستحق التقدير رغم أن التقدير لابد أن يأتي من النفس أولا

الاهم من ذلك انه ينظر لكل شيء بجمود ولا ينظر للجانب المضيء مما يتعلمه من جديد ويشعر دائما ان اي جديد فهو مرفوض نفسيا ولا يدرك ان الابداع لابد ان يكون فيه نوع من انواع الخروج عن المألوف فمن وصلوا إلى اعلى مراتب الحياة قنعوا تماما أنه لابد لهم أن يخرجوا عن مألوف الحياة حتى ينجحوا ( ودي مش دعوة للتملص من أوامر الدين ) المقصود هو التحرر من قيود الطرق الاعتيادية في التعامل مع الحياة

أيضا الشخص الغبي ابداعيا لا يترك العنان لعقله لكي يحلم ولو لمرة في اليوم حلم يقظة ان احلام اليقظة الغير مرضية تعطي للعقل القدرة على التخيل الامر اللي بيخلي الانسان متوقع لاشياء ربما تحدث فلو حدثت فهو تخيلها واستعد لها اما لو لم تحدث فهي سجلت في بند الامور المتوقعه في اي موقف اخر مستقبلا

ولا يملك القدرة على ربط الافكار الجديدة مع الافكار القديمة وبالتالي لا يستطيع ان يطور في القديم او يبدع في الجديد

واخيرا فهم لا يستطيعون التعبير عن نفسهم بصورة واضحة فيفقدون قيمة نفسهم في عيون الاخرين

وتكون النتيجة غير مرغوبة بالتأكيد عكس كل ذلك يعد ذكاء ابداعيا يعطي الفرصة لتطور العقل اللي نيمناه في دماغنا وبقى عامل زي الصندوق الاسود بيسجل وبس

ونرجع ونأكد ان الذكاء او الغباء ليس وراثي ولا علاقة له بالجينات والحركات اللي بيقولوا عليها فليس كل مبدع أنجب مبدع والا كانت الحياة اصبحت قاصرة على عدة افراد هم من يبدعون

طولت عليكم مع العالم الاغبيا في مجال الابداع دول بس كل غبي ابداعيا يستطيع إذا احب ان يصبح ذكي ابداعيا

وأهو كله كلام

حوش اللي وقع منك

قبل أن أبدأ في موضوعي فقط أود الرد على رسالة وصلت عبر البريد من شخص اكيد انا أعرفه لكن هو ماحبش يفصح عن نفسه وباعت الرسالة من بريد غريب وبيتهمني في الرسالة اني بسوء سمعة مصر وباعمل على تسفيه شعبها والحط من قدره ونعتني باني سيء لاني لا أرى الا السوء

انا بشكره بالتأكيد على مشاعره الرقيقة تجاهي وبوجه ليه كلمة صغيره جدا وهي ان لو لف مصر كلها من شرقها لغربها مش هيلاقي حد في الجمهورية كلها بيحب مصر أدي والا مكنتش اهتميت اننا كمصريين نتغير ونتطور والفكره كلها اننا نتطور والا مكانش الموضوع اسمه ازالة لغرض التطوير ثانيا انا عملت عملية تقريب لصورة السلبيات في مجتمعنا مش عشان انشرها للناس لان ببساطة لا يوجد مجتمع مهما كان خالي من العيوب والسلبيات والفساد والا ما كان هناك حتى ايام الرسول ذوات الرايات الحمر في عهد أشرف المرسلين إذن فنحن لسنا في محنى عن أن يكون فينا فساد او يكون هناك أشخاص يحملون بين طياتهم الفساد لابد من تغييرهم وتعديلهم

وأوعدك ووعد الحر دين عليه أن ارد عليك أو عليكي ( حسب نوع المرسل الله اعلم ) في موضوع كامل منفصل ليك ولكن انا حبيت بس انوه تنويه صغير ليك قبل ما ابدأ موضوع عقلك في خطر

حوش اللي وقع منك

هل حسيت في يوم ان عقلك في خطر وان انت رغم كل العلم الموجود في عقلك او الخبرات المكتسبة فيه لازال عقلك خاوي ؟؟ أو يمكن حسيت ان عقلك في أوج نشاطه رغم اضمحلال كم المعلومات التي تصل لعقلك

طب اسمع الكلام اللي جاي دا لانه مهم اوي ببساطة كده حوش اللي وقع منك ومن عقلك الحق عقلك لانه في خطر كبير .... طبعا كل واحد عايز يتأكد هل عقلة في خطر صح ولا لا طب يالا جرب معايا اللي جاي

الأول هات ورقة وقلم ... ورقة فاضية متبقاش بخيل دا عقلك مش حاجه تانيه

اكتب 10 أرقام هواتف حافظهم كويس جدا غير رقمك او رقم الاسعاف والمطافي او الشرطه

اكتب 10 أسماء لاصدقاء والدك تتذكرهم اللي مشوفتهمش بقالك على الاقل 5 سنين مشوفتهمش

اكتب اسماء 10 مدرسين من مدرسين المرحلة الابتدائية اللي درسوا لك ( اكيد درست ابتدائي والا مكنتش بتعرف تقرا موضوعي دلوقتي ) او مدرسين الاعدادية

اكتب اسم 10 من جيرانك القدامى في سكنك القديم ( لو مافيش سكن قديم يبقى من جيران جدك ) طب حتى سكنك الجديد

أكتب اسم 10 من اصدقاء الطفولة – مدرسة – او الشارع

مجموع المعلومات 50 معلومة ادي لنفسك درجة على كل معلومة صحيحة مكتوبة واحسب درجتك اذا عديت 30 فبالتالي عقلك مازال في حالة مقبولة يمكنك أن تقوم بتدريبه ليستعيد قدراته الاصلية اما لو كانت اقل من كده فإسمح لي أقولك حوش اللي وقع منك

الحق عقلك اللي هايروح في شربة مية عارف هايروح في شربة مية ليه ؟؟ انا اقولك

تعالوا نجيب القصة من الاول .... الصورة اللي في خيالنا عن الانسان القديم انه انسان الغاب طويل الناب لا عقل له الا في ساعده

والصورة خطأ تماما تماما

فرجل الكهوف هذا استطاع ان يستخدم عقله كثيرا كثيرا ليقاوم البيئة ويتعايش معها لكن احنا ؟؟؟
نحن نحيا على ما صنع السابقون .... في ايامنا

بنستخدم الهاتف المحمول كدفتر تليفونات فمبنحفظش اي ارقام .... الشخص اللي بيعدي من حياتنا بنعمل له حذف نهائي من الذاكرة فمنفتكروش الا بعد صراع مرير مع العقل مع العلم ان ما يمر على الانسان يستحيل ان يمحى من الذاكرة بدليل ان حتى اللي بيفقد الذاكرة فقدان تام بيظل يتحدث بلغته الأصليه مبيرجعش طفل مولود بيقول ماما وبابا ولا أمبو ولا إئح

ربما ننسى اصلا احنا اتغدينا ايه من اسبوع نتيجة للحجة العظيمة ان الدنيا تلاهي او الواحد هيفكر في ايه ولا ايه ولا ايه احنا عندنا مسئوليات اكبر

حتى تستطيع ان تواجه المسئوليات الاكبر لا بد ان يعمل عقلك اكثر

طب تسمع معلومات جديدة عن عقلك ؟؟؟

اسمع

اولا عدد خلايا مخ الانسان ماشة مليار خليه عصبية او كما يطلقون عليها عصبون طبعا الرقم دا مش موجود حتى على وجه الارض كبشر موجود في مخ الانسان بس

الخلايا دي مقسمة بين نصفين فص أيمن وفص أيسر وكل فص فيهم مسئول عن الأعضاء العكسية له بمعنى ان الفص الأيسر مسئول عن الأعضاء اليمينيه في جسم الانسان

اما الفص الأيمن بقى فهو مسئول عن الأعضاء اليسارية في جسم الانسان

انا سامع واحد بيقولي وانا مالي اصبر ياعم انت مستعجل ليه هو انت لاقي عقلك في الشارع هاقولك اهو

الفص الأيمن مختص بالتالي عن التفكير الإبداعي والتخيل والألوان

أما الفص الأيسر مسئول عن الحقائق والأرقام والكلمات والعمليات الحسابية

وكل فص فيهم ينشط حسب اعتمادك على الاعضاء المتحكم فيها هو .... الحجة الاساسية بتاعة كل واحد وانا انشط الاتنين ازاي انا بكتب باليمين او بكتب باليسار

طب خد عندك معلومة ثبت انك تستطيع ان تستخدم جميع أعضاء جسمك بنفس الكفاءة ولكن الامر محتاج منك التدريب وربما التدريب الشاق

طيب ولو اتدربنا تدريب عادي غير شاق ايه اللي يحصل ؟؟ هينشط الفص المتحكم في تلك الاعضاء فينشط معه الامور المسئول عنها يعني مش لازم تدرب مخك تدريب قاسي

تحب تسمع معلومة جديدة ؟؟

انت مبتستخدمش من مخك الا 3.5 % من قدراته .... والانسان المثالي في استخدام مخه بيستخدم 4%... اينشتين بكل قدراته العبقرية ونظرياته اللي قلبت دماغ البشر استخدم بس 4.5% من قدراته العقلية

لا وفي نظريات جديدة بتؤكد انك بتستخدم بس 1% من قدرات مخك ( اومال الحمار بيستخدم كام ؟؟ )

اما انواع الذكاء فدا الموضوع التاني ان شاء الله

وأهو كله كلام

عالزراعية ياما نفسي أقابل حبيبي

السلام عليكم ورحمة الله وبركاته



الأعزاء اللي سألوا عني في فترة غيابي والأعزاء اللي مسألوش لإنشغالهم .... والله كل الناس وحشتني ... اللي سأل واللي مسألش واللي سأل مرة وقال عملت الواجب ... واللي سأل مرتين وقال كفاية كده .... واللي سأل كتير لحد ما زهق مني ومن عدم ردي



انا كنت في غيبوبة الزمكان زي ما بيقولوا يعني غايب عن الزمان اللي انا فيه وحتى المكان كمان غيبوبة غيبوبة بجد حبه نفسيه على حبة عوامل عمل على حبة عوامل تانيه

وكل ما اجي اكتب الاقي الضرب على غزة زاد ( لدرجة اني حسيت ان اللي باكتبه نحس ) ولاني مش هاتكلم في السياسة فكنت باستحي اتكلم في اي حاجه تانيه وخصوصا اننا حاليا المصريين متهمين بأننا ساعدنا العالم اليهود ولاد ..... على أخواننا في غزة وأي كلام مني ( دا باعتبار ان كلامي مهم ) هيعني اني غير مهتم مع اني والله كنت مهتم بس عندنا حكومة جابت لنا العار وما علينا محدش يتكلم في السياسه

غير ان في ناس افتكرت اني اتجوزت من بعد ما قولت إني عايز اتجوز ( بأطمن كل بنات شارعنا والشوارع المجاورة إني لسه ماتجوزتش وجاري قبول طلبات البنات اللي عندهم أمل فيا )

كمان النت عندي مكانش مساعد اطلاقا ( أو انا كنت بتحجج بالنت ) بس اجاركم الله ولا أوراكم ما هو نت شبكات الموبايل اول ما انتقلت للمدينة الجديدة اللي انا فيها في العمل مكانش عندي انترنت فلجأت لخاصية انترنت الهواتف المحموله ودايما اول ما ببدأ ببدأ بموقع من مواقع الاخبار ابص بصه كده على بلدنا وفتحت موقع عادي جدا جدا بيفتح بمجرد الضغط على مفتاح الادخال اللي هو ( enter ) دا في حالة النت العادي لكن الانتظار طال

طال

طال

طال

وقلت احضر قهوة ورجعت بعد ما شربت نص القهوة لاقيت الموقع مفتحش الا جزء منه بدأت احس بالاحباط قلت افتح الماسينجر الاحباط زاد اكتر والكلمة اللي بكتبها دلوقتي بتوصل بعد ربع ساعه يكون اللي بيكلمني لعن اليوم اللي عرفني فيه وسابني ومشي

وبدأت اتحين اوقات الدخول السريع اللي كانت من الواحده بعد منتصف الليل وحتى الثامنة صباحا وطبعا في الاوقات دي اما اني نايم او بجهز حالي عشان اروح الشغل فيئست من الانترنت واصبحت استخدم الجهاز كأنه play station واحيانا بدفي رجلي بسخونة البروسيسور لما احط الجهاز على رجلي

وتدور الايام والاقي عندي فرصة انترنت ربنا مديله الصحة لمدة أسبوع فقلت استغل الاسبوع دا باني ابص عالمدونة الغلبانة اللي بقت عاملة زي البيت الوقف لا منها فيها حاجه جديدة ولا منها مقفولة

وأصبح عليكم وأقولكم هاهريكم رسايل لمدة اسبوع ( دا بافتراض ان لسه في حد مهتم بالموضوع معايا )

تحياتي لكل اللي سأل وكل اللي مسألش

ويارب اتطمن عليكم

اما بالنسبة للعنوان بتاع الزراعية دا حلم اني انزل اجازتي المتأخرة بقالها شهرين واشوف بلدنا واقابل حبيبي عالزراعية

بعيد عنكم محبوس في الشغل ومش عارف انزل اجازتي السنوية نفسي انزل مصر عشان امشي في شوارعها الزحمة واشوف كل قرف وكل مر وكل حاجه حلوة محروم منها

وعلى رأي فيروز فزعان يا قلبي أكبر بها الغربة ما تعرفني بلادي ( قال يعني هي عرفاني وانا مش في الغربة )

ما علينا

طولت عليكم بعد الغيبة ونلتقي بعد الفاصل ويارب ما يطول