إزالة لغرض التطوير 7 ( بالعربي الفصيح )

لكل متابع لموضوع إزالة لغرض التطوير رجاء قراءة المواضيع السابقة من نفس العنوان اضغط على احد العناوين التالية وسوف تنتقل بك الصفحة للعنوان الذي تم الضغط عليه

إزالة لغرض التطوير 1

إزالة لغرض التطوير 2

إزالة لغرض التطوير 3

إزالة لغرض التطوير 4

إزالة لغرض التطوير 5

إزالة لغرض التطوير 6

ونبدأ موضوع اليوم

بالعربي الفصيح

موضوع هذه المدونة كاملا باللغة العربية لمن لا يحب تلك اللغة أو لا يجيد قراءتها أو لا يجيد فهم مصطلحاتها فعليه بإغلاق تلك المدونة والإتجاه فورا لأي موقع من مواقع العته اللغوي أو السفه الكتابي أو ما يسمونه في لغتنا العاميه بمواقع الهلس

في موجة التطور التي أصابت مجتمعاتنا بالإنحلال والتدهور الأخلاقي والاجتماعي وأيضا الفكري أصاب مجتمعنا أيضا موجه عارمة من التدهور في لغتنا العربية العريقة والتي إضمحلت وتحولت إلى لغة ركيكه عند معظم فئات المجتمع اللهم إلا مدرسي اللغة العربية حتى أصبح الأمر مسار سخرية وفكاهه لكل من تحدث أو تلفظ بلفظ عربي يصل الحد إلى سؤال أحد الافراد عن ذلك الشخص الذي خرج لتوه من فيلم صلاح الدين الأيوبي

ولم يصل الأمر إلى ذلك فنحن لا نريد من المجتمع أن يتحدث العربيه الفصحى ولا حتى نحث على محو الكتابات العاميه من مجتمعنا والتي أثرت فكره في عديد من النواحي بإسلوب سهل الوصول إلى كل فئات المجتمع ولكن ... وكعادة كلمة لكن التي لا بد أن يستتبعها كارثه فقد تحولت كلمات عميقة في مجتمعنا إلى كلمات ربما لا نعرفها ونسأل عن معناها بسذاجة وبلاهة أطفال المرحلة الإبتدائية وما قبلها

بدأ الأمر يستثيرني عندما بدأت في متابعة الأفلام الأجنبيه ذات الترجمة الموضوعه من قبل أفراد غير مختصين في مجال الترجمة ولهم كل الشكر على مجهودهم الرائع ولكن الأمر وصل إلى حد إسقاط حروف عديده من صلب الكلمة ثم شيئا فشيئا وجدت الكلمات تتحول إلى كلمات مبهمه لابد أن تفتح لعقلك العنان حتى تستطيع ترجمة الترجمة الموضوعه

ثم سمعت يوما قصيدة لأمير الشعراء أحمد شوقي تسمى ( مضناك جفاه مرقده ) بصوت الدافئه أنغام وعندما سألت أحد أصدقائي عن معرفته بالقصيده فقلت له

العبد لله : تعرف مضناك جفاه مرقده

هو : يعني ايه ؟؟؟

العبد لله : اسم قصيده

هو : مش فاهم اسمها يعني ايه .... انت جاي من العصر الجاهلي ولا ايه يا عم انت

فأحسست بأنني قد ارتكبت فعلة شنعاء في حق صديقي وأنني قد أهنته حينما سألته عن تلك القصيدة التافهه ... فآثرت أن أجرب حظي مع شخص آخر فوجدت رد شديد الشبه برد صديقي السابق وقررت أن أطرح سؤالي وسط جمع أكبر فكان وسط خمسة عشر متدرب من متدربي مقر العمل لدي فكانت الصاعقه أن فردين فقط من استطاعوا معرفة ما أقصد بل وشخص منهم مدرس لغتنا الجميلة .... فأحسست حقا أن لغتنا تنهار وأننا خلال 10 أعوام فقط سنصبح ناطقي لغة دولة شين بونجا التي باعت لها موبينيل شبكتها القديمة حتى تجلب لمصر أحدث وأكبر شبكه ونجد القرد الظريف أمام فصل به 15 طالب يقول لهم ( قولوا ماما ) ..... ثم يهز رأسه في أسف ويقول ( يا خساره )

والكارثة الكبرى انتقال عار اللغة التي نكتبها وننطقها إلى الانترنت فتصبح اللغة المكسحه هي الاكثر انتشارا فأجد صديق لي يقول لي في حوار مكتوب على الانتر نت ( يا لقيم ) ولم أفهم الكلمة في حينها وعندما استوضحت الكلمة قال لي ( لقيم من لوقم ) بالطبع يقصد ( لئيم ) واللفظ عربي صريح ذكر في القرآن

والأدهى والأمر من ذلك ما نراه على صفحات الانترنت بل وفي المواقع كلمات تعد من اسفاف اللغة العامية التي لها رونق خاص في كتابتها إلا أن هذا الرونق بدأ في مرحلة الإندثار بعد ما عاد عليها من اسفاف عامي وليس هذا فقط بل إننا اليوم نواجه في مجتمعنا العربي موجه عاتيه أخرى من محو اللغة في العمل فهناك شركات بمصر لا تعترف بالحديث باللغة العربية حتى في كواليس العمل بل وربما لا تجيبك القائمة بأعمال المكتب سؤالك إن وجهته لها باللغة العربيه على الرغم من أنها ( بنت ترب الغفير ولما بتروح بيتهم بتقول هاتولي بتاع اتعشى بيه )

بالنسبة لنماذج الإنترنت فلكم عينه بسيطه

انظر للكلمات المميزة باللون الأحمر أو التي وضع بجانبها علامه

وفي صفحة أخرى

ستجد أن كلمة أحاديث قد تم محو حرف الألف منها بل وكلمة آيه قرآنيه لم تعد بشكلها الصحيح هي وكلمة قرآنيه

تابع ما يشير إليه السهم لترى ماذا تعني الكلمات التي يشير إليها الموقع ( يعني ايه بتاع ) و ( سيكو بيكو )

لغتنا العربيه حقا في مأزق ويجب حقا إزالة ما بها من أمراض

وفي النهايه

أهو كله كلام

إزالة لغرض التطوير 6 ( لازم نزيل عادل امام )

لكل متابع لموضوع إزالة لغرض التطوير رجاء قراءة المواضيع السابقة من نفس العنوان اضغط على احد العناوين التالية وسوف تنتقل بك الصفحة للعنوان الذي تم الضغط عليه

إزالة لغرض التطوير 1

إزالة لغرض التطوير 2

إزالة لغرض التطوير 3

إزالة لغرض التطوير 4

إزالة لغرض التطوير 5

ونبدأ في موضوع النهاردة

لازم نزيل عادل إمام

بعد الحوار اللي دار بيني وبين صديقي واللي اتنشر في إزالة لغرض التطوير 5 وصلني على بريدي رسالتين رسالة من صديق أعرفه بكل لطف وأدب اتهمني اني متحامل على المدعو عادل امام زيادة عن اللزوم وان الامر لا يستدعي كل دا فكثير من الممثلين ما يدعون إلى ما يدعو إليه عادل امام وليه انا اختارت عادل امام دون عن باقي الاخرين ( بجد كانت رسالة محترمة ومهذبة )

ووصلتني رسالة تانيه من بريد لا اعرفه لشخص رفض ابداء اي بيانات وهاجمني هجوم رهيب وصل لحد الاتهام بالتعنت والتزمت والهبل والهطل والدروشه واني قريب هانكش شعري ( دا لو في شعر ) واربي دقني والبس جلابيه مقطعه وامشي في الشارع واصرخ واقول حي

ولأني فعلا متيقن يقين تام من ضرر المدعو عادل إمام على الشعب المصري الي ولله الحمد انا منه قررت اني فعليا اكتب الموضوع النهاردة مخصوص عن عادل امام وفي إزالة لغرض التطوير لاننا فعلا محتاجين إزالته من عقولنا حتى نتطور

بداية معرفتي بحقيقة عادل امام كشخص سفيه بدأت وانا في نهاية المرحلة الثانوية فقبل تلك المرحلة بعام صدر كتاب للرائع د/نبيل فاروق ...( اكيد الكل يعرف د.نبيل فاروق الراجل اللي رغم خيال كتاباته الا انها بنت فينا وطنية لذيذه ) كان اسم الكتاب المهمة من سلسلة كوكتيل 2000 وكانت القصة بتحكي عن فارس مبعوث في مهمة من قبل الناصر صلاح الدين الأيوبي إلى مصر وفجأه يجد نفسه في مصر ولكن في عام 1995 وانتم عارفين باقي الاحداث في القصة ... القصه كانت عجباني جدا وكانت من القصص المفضلة عندي

وفجأه لاقيت اعلان عن فيلم هايقوم ببطولته السفيه بيحكي نفس القصة فقلت الكاتب نبيل فاروق عدى خلاص ودخل مجال السيما يا حلاوة يا ولاد وهانشوف ادهم صبري قريب في السيما اتاري اللي كاتب القصة واحد تاني اسمه يوسف معاطي كنت لسه ماعرفوش ... المهم عرفت بعدها ان نبيل فاروق رفع قضية لإيقاف انتاج الفيلم لكن اللي حصل ايه ان الهجوم جاله من صاحب السبوبة والليلة الكبيرة عادل امام اللي قال على نبيل فاروق حرامي ..... يا راجل يا مفتري يا ظالم قصة قراها 4 مليون شاب شاهدين انها قصة من سنة ونص قبل ما تبدا انت في فيلمك المنكوب تقول عليه حرامي

طبعا انا قريت القصة وحفظتها وكانت عجباني وكنت دخلت الجامعه وكان الفيلم لسه في اول مرحلة عرضه وكنا في رحلة إلى القاهره ( اصل انا عقبال عندكم في الاصل وبكل فخر من الزقازيق ) وقلنا ندخل السيما نشوف الفيلم وياريتنا ما دخلناه دخلنا فيلم ومعانا بنات والله العظيم من الاسفاف اللي فيه بقيت حاسس اني في ربع هدومي والبنات اللي معانا حوالينا وشكلنا زفت واحنا بنفرجهم على فيلم زي دا

واحنا طالعين من السنيما وبنحكي عن ان الفيلم دا كان ماينفعش نتفرج عليه واللي بيقولوا ترضوها لاخواتكم والكلام اللي من النوعيه دي افتكرت اني من سنه جبت فيلم بخيت وعديله واتفجرت عليه لا وضحكت وكركرت كمان وصحيت تاني يوم لاقيت اختى بتتفرج على الفيلم اختي كانت لسه صغيره وكان الفيلم لسه في اوله .... اول حاجه عملتها اني شيلت الفيلم من الفيديو ( كان ايامها الفيديو هو سيد الموقف ) وقولتلها لازم ارجعه حالا ... دا كله عشان اختي متشوفش السفالة اللي فيه

نيجي بقى للاسباب الاخرى احنا هانعمل الاسباب الاخرى على شكل مسابقة

1- اذكر فيلم لعادل امام ماشربش فيه خمرة ؟؟

2- اذكر فيلم لعادل امام لا يوجد فيه اي اسقاطات جنسية او ممارسته للجنس مع جميع نسوان الفيلم في سياق الفيلم

3- اذكر فيلم لعادل امام لم يتم فيه السخرية من الدين الاسلامي ومن الملتزمين او حتى من المأذون

للعلم أول من تحدث على أن الإرهاب له علاقه بالدين من خلال أفلامه هو عادل امام وهو صاحب علامة مميزة في الصاق الارهاب بالدين الاسلامي

نيجي بقى لحاجه تانيه ... كل الاخوة المتغربين زي حالاتي واللي اتغربوا قبل كده بالتأكيد يعرفوا الموضوع دا ان كل العالم العربي وخصوصا من لم يشرف بزيارة مصر عنده يقين تام ان مصر عبارة عن خمرة ونسوان ولما تسأله جبت المعلومة دي منبن مبيقولكش من الافلام لا بيقولك من افلام عادل امام

فوق كل دا سمعت مرة جملة في اعلانات عن حوار هاتقيمه الوليه اللي اسمها هالة سرحان معاه بصفته زعيم المسخرة فبيقولها اللي عايز يعرف تاريخ مصر يتفرج على افلامي

طب حد يقولي تاريخ ايه ؟؟؟ هو تاريخ مصر نسوان وخمرة ( وعشان محدش يعترض على لفظ نسوان اللفظ عربي صريح )

هو تاريخ مصر فيلم 5 باب ولا تاريخ مصر هو فيلم الحنش ... ولا تاريخها هو فيلم المتسول ... ولا فيلم ايه بالظبط اللي بيحكي تاريخ مصر

نيجي بقى لاحاديث المحفلط المزفلط عادل امام

افتكر حوار لعادل امام وكان اول حوار تلفزيوني له مع ممدوح مرسي المذيع اللي نص مصر مبتحبوش دا اول ما عادل امام مسك سفير نوايا سيئه .... نفسي افهم ازاي دا يبقى سفير عن بلد فيها مفكرين زي الدكتور مصطفى محمود وزي انيس منصور وزي صلاح منتصر وزي وزي وزي وزي .... لما سمعت حواره حسيت ان في واحد اهطل قاعد بيتكلم وملمحتش اي ناحية ثقافة اطلاقا باي شكل من الاشكال وكنت ايامها مش معارض له بل كنت من هواة مشاهدة افلامه

وحوار اخر لما قال ان اي حد عنده مشكلة يروح له البيت وهو يحل له المشكلة فكانت النتيجة ان راجل غلبان دخل السجن بتهمة محاولة الاعتداء على سيادة السفيه ( السفيه صح )

جملة قالها في فيلم بتنجان احمد بتنجان بتاعه لما الست ميرفت بتقوله لو رشيت ال 75 مليون مش هاتقدر ترشيني انا قالها ما انا رشيت ال 75 مليون مصري مش فاضل الا انتي

طب الله يكرمكم حد يرد على السفيه دا اللي خلى شعب مصر بأكمله مرتشي .... لو حد فيكم شايف ان هو واهله مرتشين يبقى خلاص يحيي عادل امام اللي رشاه بس الحمد لله انا عارف ان محدش في اهلي بيرتشي ولا حتى بيرشي

ولو كان ابويا بيعرف يرشي بتوع الحكومة مكانش حصلتله الافلاسه الاولى اللي جابتنا ارض ارض من 14 سنه وخلت الراجل يهج من البلد واللي فيها

واخر حاجه لما طلع في برنامج البيت بيتك يتكلم عن واحد ماعملش حاجه الا انه رفض يرد على تساؤلاته حول فيلمه حسن ومرقص لانه لا يمثل المسلمين ولان التصرف الصحيح انه لو عنده تساؤل يتفضل يروح لشيخ الازهر

ولكن ازاي مايردش على زعيم جبلاية القرود ... واول ما بدا اتهامه قال ايه انا سمعت ان عنده مديرة اعمال ست ( هو دا كفر ولا حاجه ؟؟؟ ) وسمعت ان عنده سواقه ست ( طيب وانت مالك ) انت بتقول سمعت لكن هو انت شوفت ... وغير شوفت هو انت شوفت الراجل بيمثل معاهم فيلم بخيت وعديله يعني ؟؟؟؟

كونه يشغل راجل او ست فدا شيء لا يعنيك ولا يعيبه

ولما محمود سعد زنقه في الحوار و سأله عن الأسباب التي لم تدفعه إلي سؤال رجال الدين الرسميين متمثلين في علماء الأزهر الشريف خاصة وانه لجأ إلي الكنيسة لمعرفة رأي الدين المسيحي وبرر سيادة السفيه ذلك بان هناك بعض التساؤلات الهامة إلا أنها لم تكن تستدعي إجراءات الاستعانة برجال الدين لذا كان يأمل معرفتها من الدعاة الإسلاميين الذي برهنوا له أنهم يظهرون عكس ما يبطنون علي حد قوله

طب نرد على الكام سطر دول اولا التساؤلات هامه فلما حب يسأل في الدين المسيحي راح للبابا شنودة بذات نفسه ولكن في التساؤلات الهامة للدين الاسلامي لجأ للدعاه مع ان الكلمة واضحة دعاه وليسوا أهل فتوى .... وبعد كده يتهمهم كلهم بأنهم يبطنون عكس ما يظهرون .... يعني لو دا راجل عاقل مش سفيه كان قال واحد يظهر عكس ما يبطن لكن دا اتهم الكل مخلاش

عموما انا بقولها تاني وعادل امام مش منزل يعني انا بكره عادل امام وكتير بيكرهوه مش لوحدي ولو كان الامر بايدي كنت ربطته في سلسه وسحبته لحد الجبلايه في الجونينة بتاعة الحيوانات يعيش هناك مع حبايبه

وعموما بردو

أهو كله كلام

*****************************

في تعليق على إزالة لغرض التطوير 5 وددت ان اقول فقط للأخت shery ان انعدام مبادلة الرأي يعد في حد ذاته سلبية قد تؤدي لانعدام الحياه فإذا سارت حياة كل شخص وفقا لما يراه الاب والام او حتى الحكومة فهي ليست بحياة بل هي زي ما بيقول الامريكيين dead man walking يعني هو ميت بس اهو ماشي وبياكل وبيشرب

وهنا لا يوجد اختلاف بل يوجد انعدام اختلاف .... ولابد من الاختلاف في الرأي حتى نتعلم ولكن انعدامه يعني اننا آلات استقبال اوامر فقط

تحياتي

إزالة لغرض التطوير 5

أنا اختلف معك في الرأي إذن نحن أعداء

لا تحاول أن تختلف في الرأي مع أحد ( إذا كنت مصري وهو أيضا ) ففي تلك الحالة ستتحول من صديق إلى عدو وممكن ببساطة زي ما قولنا قبل كده يطلع المطواه ويغزك .... هو دا أصل الاختلاف في مصر فدائما وأبدا طالما بدأ بينك وبين الآخرين حوار ينتهي الأمر إلى كارثة نفسية بين الطرفين

كل واحد في مصر ومصر بالذات عجباه دماغه ولا يتقبل اي رأي اخر طالما الرأي دا خالف للحظات ما يؤمن به حتى وان كان يؤمن بما ليس صحيح وعلى رأي المثل كل واحد وعجباه دماغه او على رأي مثل تاني كل واحد في نفسه ملك

احنا فعلا كمصريين عجبانا دماغنا ويستحيل اننا نفكر نغير فكرة في دماغنا ببساطة وسهوله حتى مع كامل اليقين والعلم انها غير صحيحه بل وربما نؤمن بصحة اللي في دماغنا لغياب الحقائق عن اعيننا والانيل من كل دا ان غياب الحقائق في تفكير كثير من الناس يعني عدم وجودها من اساسه

هاعرض عليكم حوار دار بيني وبين صديق ليا ( الله اعلم هو لسه صديق ولا لا ) .... الحوار كان عن المخفي عادل امام واللي انا ولله الحمد من اشد الكارهين له ولسفالته ولانحطاطه

( الحوار محسن ومنقح لظروف الرقابة )

صاحبي بيمجد في فيلم حسن ومرقص كانه كتاب منزل

العبد لله : عادل امام دا ببساطة انسان سفيه وتافه وبيدعو للفساد فمستحيل يكون عامل فيلم مجيد زي ما انت بتقول كده

صاحبي : متشتموش ممكن يكون عند الله احسن منك ؟؟

العبد لله : اولا انا مبحثتش في افضليته عند الله مني ثانيا كونه بيسفه الدين والمسلمين ورموزهم فهو بذلك بيدعو للفساد في الارض ودا مش كلامي دا كلام كتير من العلماء الامر اللي يجعله انسان اقل شأنا من إنه يحترم وانا الحمد لله محدش قال فيا اني بسفه دين او بأسخر من علماء

صاحبي : انت كفرت الراجل متقولش على راجل كافر

العبد لله : يا عم هو انا كفرته ؟؟؟ الكفر حاجه واللي انا بقوله حاجه ... دا بيدعو دايما مع الله الها اخر زي الخمر والنساء يعني مشرك على ما سمعت عنه والكفر حاجه والشرك حاجه

صاحبي : ياعم الكفر هو الشرك

العبد لله : ياعم والله الكفر حاجه والشرك حاجه تانيه وتعالى اوريك مليون مقال عن الموضوع دا دا غير ان الشرك نفسه انواع اما الكفر فنوع واحد

صاحبي : انواع زي ايه ؟؟

العبد لله : في حاجه اسمها شرك أصغر ودي احيانا كتيره كلنا والعياذ بالله الا من رحم الله بيقع فيها زي لما تقول والنبي خدني معاك او والنبي اعمل كذا

صاحبي : ياعم انت كفرتنا كلنا انت معقد كده ليه انت المفاهيم عندك بايظة كده ليه

وفي ثواني معدوده تحولت من صديق له لشخص كفر الناس كلها ومعقد والمفاهيم عندي انا بايظة ومش هانكر اني قولتله والله المفاهيم عندك انت اللي بايظه ..... ولولا ولاد الحلال اللي كانوا حاضرين القاعدة دخلوا التهريج في الهزار لكانت قلبت بغم

طيب هانفترض اننا مش عايزين نختلف تاني خلاص هانبطل اختلاف يبقى لازم كلنا نمشي على رأي واحد طيب جميل احنا هاننهي الاختلاف بإننا نمشي على رأي واحد

طيب هانمشي على رأي مين ؟؟؟؟ هنا هانختلف من جديد لان كل واحد شايف انه هو الاكثر لباقة وهو الاكثر جاذبيه في الحديث وان هو الشاب الذي لا يجوز معه الاختلاف فكل واحد هيطلع يقول نمشي على رأيي انا

والنتيجه هنختلف تاني ومش بعيد حد يجيب وش التاني برقبة ازازة ولا بفرد قرن غزال

ووصل الجدال والاختلاف في الرأي والاختلاف هنا مش الاختلاف الحميد دا اختلاف خبيث بعيد عنكم عامل زي الحرحر بكسر الحاء (وهانوضح بعدين ايه هو الحرحر دا ) وصل الاختلاف في الرأي والجدال لمجادلة ومناقشة امور دينيه صرفه لا والاحلى من كده ان اي حد بيناقش يقولك انت سايب الاصل وماسك في القشور ... طيب ايه هي الاصول وايه هي القشور في الدين كل واحد تتكلم معاه عن اي حاجه في الدين يرد بالكلمة دي وهو مش فاهم معنى القشور والاصول ... وينسى تماما ان الدين في مجمله أصل ولا يوجد ما هو مهمش في الدين او ما هو قشر اصله مش شوية ترمس ناكل اللي جوه ونرمي القشر

امبارح مثلا واحده اعرفها دار بيني وبينها حوار تاني وكان حوار على الايميل شوفوا لما اختلفنا وصل الحوار لايه واننا شلت اسمها ورمزت ليها بكلمة هي احتراما لخصوصيتها اما الملقب H a M a D a فدا العبد لله وبداية الحوار عن اني كنت قلت مره اني ارغب الزواج من منتقبه فهي كانت بتسأل

هي : مش لقيت المنقبة اللي كنت هتتجوزها؟
H a M a D a: لا لسه
H a M a D a: بس ربنا يكرم
هي : حد يتجوز منقبة الايام دي!
H a M a D a: انا
H a M a D a: اومال اتجوز واحده مصر كلها اتفرجت عليها ؟؟؟
H a M a D a: اومال سابولي ايه يبقى خاص بيا
هي : خاص بيك؟ هو انت بتشتري معزة؟ وايه مصر كلها اتفرجت عليها دي؟ لأ اتجوز شيخ غفر يا عم انا مالي انت حر
H a M a D a: بصي عايز اقولك حاجه
H a M a D a: انا ببساطة راجل رجعي ومتخلف جدا في مسألة الستات دي
H a M a D a: يعني ببساطة اكتر
H a M a D a: عامل زي الناس بتوع سنة 30
H a M a D a: اللي هما بتوع الست ملهاش الا بيتها والست متتكشفش على رجالة والحراملك
H a M a D a: فدا تفكيري
H a M a D a: وعاجبني جدا
H a M a D a: والانيل بقى اني مصر عليه
H a M a D a: وانا مبشتريش معزة
هي : وليه تعيش في سنة ٣٠
H a M a D a: انا عايز واحده تشاركني حياتي
H a M a D a: بس اللي هتشاركني حياتي دي تشاركني حياتي على ما هي عليها
H a M a D a: لان فكر سنة 2000 مشوفتش فيه حاجه عدله
هي : ماشي بس مش للدرجة دي امال انت رحت مدارس وجامعة علشان تفضل برده متخلف!
H a M a D a: رحت مدارس عشان اتعلم مش عشان انحل
هي : هو انا قلت انحل؟ بس لازم تفكيرك يكون مطابق للعصر اللي عايش فيه مش عايش في عصر محمد علي
H a M a D a: اكيد طبعا
H a M a D a: وعشان كده انا بواكب العصر
H a M a D a: بس عن طريق ديني
H a M a D a: ديني بيقول ان النقاب فريضة
H a M a D a: زيه زي الصلاة والصوم
H a M a D a: والرسول بيأمرنا بالزواج من ذات الدين
H a M a D a: مش اروح اتجوز واحده كاسيه عاريه
H a M a D a: لابسه ايشارب وبادي وشورت
H a M a D a: وتقوليلي حجاب
H a M a D a: حجاب سنية الطرية المنتشر اليومين دول مش حجاب
هي : اولا مش فريضة ثانيا مش هتكلم في الدين دلوقتي لأنه عايز قعدة
H a M a D a: لا فريضة
H a M a D a: واسألي بس وانتي تعرفي
H a M a D a: بس ابعدي عن شيوخ الازهر
H a M a D a: لانهم بسم الله ما شاء الله بيحللوا الحرام ويحرموا الحلال
هي : وابعد انت عن قناة الناس وبتوع السعودية لأنهم متشددين وبيحرموا كل حاجة
H a M a D a: بتوع ؟؟؟؟
H a M a D a: يابنتي لحم العلماء مسموم حرام علينا اغتيابه او اهانته
H a M a D a: قال بتوع قال
H a M a D a: بقولك ايه انا دماغي مريحاني كده هي تعباكي في ايه ؟؟؟
هي : خليها مريحاك خليكم دققوا في اللحية والنقاب وانسوا جوهر الدين براحتك هو انا اللي هتجوز
H a M a D a: ههههههههههههههههه
H a M a D a: لعلمك انا لا بلحيه ولا بلبس بناطيل قصيرة وياريتني من الناس دول
H a M a D a: بس الحاجات دي من جوهر الدين مش من قشوره
H a M a D a: ستر عورة المرأه من جوهر الدين

H a M a D a: ستر المرأه عفه ليها واامن للمجتمع
هي : انا كمان هريح دماغي واقوم انام
H a M a D a: احسن بردو
H a M a D a: نوم العافية ان شاء الله

شوفتوا الحوار انتهى لإيه لان كل واحد فينا هاجم التاني عشان يثبت ان رايه صح وافيش مانع من اننا نهاجم غيرنا كمان ونلعن ابو اللي جابوهم لانهم هما اللي خلوا فكرنا كده

وامبارح بردو كنت باتمشى بين المواقع فلاقيت واحد عاقد مقارنه والراجل الله يبارك له كاتب فوق مقارنة من وجهة نظر الكاتب وعاقد المقارنة بين بنك مصر والبنك الأهلي من حيث التعاملات

ولاقيت رد من ضمن الردود او التعليقات صاحب التعليق بيحاول جاهدا انه ميخرجش عن شعوره ولكن كلماته بتنم على انه بيكتب وهو متعصب جدا ولو كان طال صاحب الموضوع كان خنقه وشنقه وحرقه وولع في اللي جابوه كمان

واول كلمه في حواره ( مين اللي قال لسيادتك الكلام دا يا بيه .... اللي انت متعرفوش ......... ) طبعا البداية واضحه انه داخل يتخانق وبيزعق وكويس اننا بنكتب فتعبيراتنا مبتبانش كلها في الكتابة وبيبان جزء بسيط منها

قبل أن نفكر أن نختلف فعلينا أولا ان نعرف كيف نختلف

ضروري اوي نفهم ونعرف ان كل واحد احنا هانتكلم معاه ونتناقش معاه عنده مرجعيه علميه ولو بسيطة جدا عن اي حاجه في الدنيا الا اذا هو اعلن غير ذلك ومعنى انه عنده مرجعيه يبقى هو هيناقش من خلالها وبالتأكيد كلامه قابل للصحة والخطأ وكلامي بردو قابل للصحة والخطأ ولازم نفهم ان تمسكنا برأينا لا يعطينا قوه لا دا تمسكنا برأينا دون أدله او اسانيد يعني هوة عقليه سحيقة

الانيل من كل دا ان انت لما تتكلم وتيجي ترد على سؤال تلاقي ان انت وانت في نص ردك على السؤال تلاقي اللي سألك بيقاطعك ويقولك قوله اه او لا وافق او انفي لكن متحاولش تسرد .... زي بالظبط واحده سمعتها بتسأل شيخ على احدى القنوات فوائد البنوك حلال ولا حرام وياريت اجابة واضحه قول حلال ولا حرام فالشيخ ضحك وقال لها مينفعش اقولك حلال ولا حرام صرف كده لازم اوضح ومينفعش نقول اجابات مبهمة من غير توضيح

نفس الكلام في النقاش مينفعش اقول لواحد اه او لا جازمه مبهمة كده بالتأكيد كل امر محتاج توضيح ومحتاج اسانيد فيها ايه لو سمعت اسانيده ولا هو مجرد حوار لاثبات اني صح وبس

وأهو كله كلام

إزالة لغرض التطوير 4

استكمالا لإزاله لغرض التطوير 3

ماذا تفعل المرأه عندما تتحرر ؟؟

تتحرر من كل شيء حتى من ملابسها ... بل هي تبدأ أولا بمرحلة التحرر من الملابس ثم تفكر بعد ذلك في التحرر من أشياء أخرى أو لا تفكر ... أول فيلم ظهر عن فكرة تحرير المرأه بعد ظهور المجحوم بعون الله قاسم أمين كان فيلم اسمه الافوكاتو مديحة ... فاكر انا الفيلم دا لانه استفزني جدا لما شوفته اول مرة وانا في ثانوي وعشان الناس اللي مبتحبش الافلام العربي الفيلم دا تاريخ انتاجه في 1950 .... الفيلم كانت قصته عن مديحة بنت ناظر عزبة راجعه من فرنسا بعد ما اتعلمت القانون وجايه بفكر بنات فرنسا .... اول حاجه عملتها لما رجعت من فرنسا لبست لبس التنس ونزلت تلعب رياضة في الجونينه ( حلوة الجونينه دي ) لا ونزلت قدام الفلاحين رجالة وستات ... ولما ابوها قالها عيب قالتله سيبك من افكار الناس المتخلفين دول احنا ناس متعلمين

ومن هنا ظهرت اول افكار التقدم والتنوير وهنا التنوير بالخلع كل ما تتنور الست تخلع اكتر ... تتعلم القانون تلبس قصير وتلعب رياضة قدام الناس ... اومال لو اتعلمت الطب هيحصل ايه .... مش هاتخبي حاجه عن الشعب

طبعا البنات هتقول عليا رجعي ومتخلف وحتى لو رجعي ومتخلف انا فعلا عجباني دماغي كده ولكن تعالوا نتفرج ... ايه اللي بيحصل للبنت المتحرره .. من ملابسها ومن البنت الي ارتضت سجن الملابس عن طيب خاطر

واحد واقف في الشارع مولع سيجارته وواقف على ناصيه .... عدت واحده لابسه اللبس بتاع الناس النضيشفه ومننساش الشين ... اللي هما عقلهم متنور دول

انت يا عسل .. انت يا جميل ... طب عبرنا بكلمة ... طب انا رقمي 3 اصفار صفرين زيرو

بجد شاب محترم لانه ممدش ايده عليها غيره بيعمل حاجات تانيه

خلي نفس البنت تركب اتوبيس ... بعد دقيقين من ركوب الاتوبيس هانسمع صويت وكلمة يا قليل الادب وصوت الم ظريف نزل على وش واحد جعان ... والمشكلة ان الناس مش هاتخدم البنية بضرب الواد عشان هو قليل الادب .... لا دا طمعا في كلمة من الموزة

طب لو تخيلنا نفس البنت بس المرة دي لابسه لبس تاني خالص .... اللبس اللي يصونها ويعفها من الأعين الجائعه ... فعلا زي ما انا سامع بنت بتقول ... ولا واحد هيعبرها او يبص عليها ... ولو ركبت الاتوبيس هنلاقي راجل ( بجد راجل ) هيقوم من مكانه ويقولها اتفضلي ولا هانسمع كلمة يا قليل الادب ولا هانسمع صوت الم بيرن

طيب نفس البنت بس باللبس الاولاني لكن هي تربية مدارس كوالا لمبوري وابوها صاحب منصب كبير ( فراش في سفارة موزمبيق ) وعندها عربيه ومبتتمرمطش في الاتوبيسات .... اللي زي دي مبتضربش بالالم لا دي بتتمسك ملفوفة في ملايه

كتير هايقولولي لا انت نظرتك سودا عن المجتمع طيب نعرض حاله

من حوالي 5 سنوات عرض الساخر محمود السعدني في مقالة يوم السبت في جريدة الاهرام قصة فتاه هي اللي حكت له انها كانت بتحيا حياه متحرره ( على حد قولها ) إلى ان وصلت لمرحلة الجامعه ودخلت الجامعه الامريكيه وهناك اتعرفت على ابن واحد مهم في الدولة واحد من الناس اللي بنسمع عنهم في الجرايد دول والواد جنتل جدا على حد تعبيرها بردو وعرف يشنكل الامورة في حباله والنتيجة انها كانت حامل من الجدع لكن هي لحقت نفسها وعملت زي شامبو برت بلاس 2 × 1 .... سقطت نفسها وقامت بعمل عملية ترقيع واتجوزت واحد تاني ... اسف ... مغفل تاني ... على عماه يا عيني وشال الشيله وخلصت الليله ... وباعترافه رغم ان محمود السعدني عمره ما اتكلم عن الالتزام قال .... ادي اخرة ولاد الكلب بتوع تحرير المرأه

سامع حد بيقولي دي حالة فردية ؟؟ طب راجع نفسك ... راجع نفسك وماتقوليش .... سمعت عن كام حالة زواج عرفي ... بلاش زواج عرفي سمعت عن كام واحده راحت مكان خاص جدا مع واحد هي ماشيه معاه ( لفظ ماشيه معاه لفظ دارج في مجتمعنا اي نعم قديم بس انضف الوحشين )

صادفت كام مرة حاجه زي كده ؟؟

وقارن بين دا وبين واحده هربت من دعوى تحرير القرود من القفص إلى سجن عبودية الالتزام ( والله احلى سجن )

في شباب مع تأخر سن الزواج بيساعدوا بتوع تحرير القرود دول اسف تحرير المرأه ... ليه لان المرأه كل ما هتتحرر هو هيبحلق اكتر ويتفرج وفي الاخر واحد غيره هيتجوزها بس يا ولداه اللي هيتجوز دا هياخد بضاعه socned hand قولوا thired او fouth hand كل اللي رايح واللي جاي جربها ومعادش ناقص حاجه مشافهاش ولا ملى عينه منها

ولو استعرضنا عينه عشوائيه من شلة عيال مابين صايع وملتزم وسألناه نفسك تتجوز واحده شكلها ايه اول كلمة هيقولها ملتزمة ... مع انه كان من كام شهر ماشي في مظاهرة تحرير القرود ... يووووه اسف تحرير النسوان

وتطلع علينا في الاخر العجوز الشمطاء نوال السعداوي عايزة تعمل الجبهة الشعبية لتحرير النسوان ... على غرار الجبهه الشعبية لتحرير السودان

وكل اللي بينادوا بتحرير المرأه اول حاجه بيتكلموا عليها الحجاب والزي ... هو ماينفعش تحرير من غير قلع ولا ايه ...واهي افكار محتاجة ازاله لغرض التطوير بس ازالة من عقول النساء

واهو كله كلام

إزاله لغرض التطوير 3

من ضمن الحاجات اللي محتاجه إزاله لغرض التطوير في مفاهيمنا كمجتمع مصري وأؤكد إني بأخص المجتمع المصري مفهومنا عن المجتمع الأنثوي ومفهوم المجتمع الأنثوي نفسه

ببساطة المشكلة من ناحيتين .... ناحية مفهوم الراجل عن المجتمع الأنثوي وناحية مفهوم الأنثى عن حقوقها وواجبتها وأحب ااكد ان مفهوم الراجل عن المجتمع الأنثوي مفهوم يخلو تماما عند معظم الرجال من النظرة الدينية وانا مش هاقدر اتكلم من الناحية الدينية بمفهومي انا لإني مش شيخ ولكن هاقدر أستقي محاضرات ومواضيع من الناحية دي

وبالتبعية ايضا ولأن المرأه في مجتمعنا المصري كانت ولا تزال تابع فهي كمان بدأت تغير في فكرها كنوع من التضاد مع الرجل او الدفاع عن النفس

الفكرة جت في دماغي لما كان في برنامج بيسأل واحده لو بقيتي وزيرة الشئون الاجتماعيه هتعملي ايه ... قالت وبكل بساطة هطالب بحقوق المرأه ... رد اللي كان بيذيع البرنامج هو ناقص ايه مخادتهوش الستات ؟؟؟

يعني هي بفكرها لسه في حقوق لم تأخذها المرأه وهو بفكره معادش ناقص حاجه المرأه مخادتهاش

طيب نتفرج على فكر الرجل أولا .... الرجل بنظرته العاديه او التي تطورت إلى خلل مع الزمن أصبح ينظرللأنثى لحالتين لا ثالث لهما الأولى نظرة الفراش والثانيه نظرة الطعام

وليس في نظرتيه أي حرمانيه والله اعلم إلا ان الانثى ليست لهذا فقط ولم تخلق فقط لذلك فالإسلام كرم الأنثى أو المرأه تكريم مافيش بعد منه من الآخر حفظ لها كرامة كانت منعدمة وأعطاها حقوق لم تكن لها قبل ذلك فأعطاها حقوقها إن كانت أما بالبر من ولديها والإحسان ولها حق أن ينفق عليها اولادها طالما أحياء يرزقون

غير التكريم مع الزوج وأمر الله تعالى لمعاشرة المرأه بالمعروف فيكفي قول أشرف الخلق صلوات الله عليه ( أستوصوا بالنساء خيرا)

غير أن الله كرمها وهي بنتا في القرآن والرسول صلوات الله عليه كرمها في أحاديثه وهي طفلة

كل دا يخلينا نوقن ونتيقن أن المرأه ليست فقط لفراش وطعام فهي السند وهي المعين للرجل على نوائب الحياه

اما الأنثى بقى فهي تبحث عن كرامة في غير دارها .... عايزة تشتغل وعايزة يكون ليها صوت ( على افتراض ان ملهاش ) وكل دا بإدعاء انها مسلوبة الحقوق وان ملهاش حقوق

او بدعوى تحرير المرأه ... طب الله يكرمكم حد يجاوبني تحرير من ايه .... هي قرد في قفص عشان نحررها ؟؟ طيب هانفترض انها قرد في قفص وعايزة تتحرر ( دول مدعيات التحرر ) طالما هي قرد وفي قفص يبقى لما تتحرر هتطلع لغابة ولما تطلع لغابة ايه اللي يحصل ؟؟؟ الاسد هياكلها .... وترجع الانثى تشتكي من ان الرجل بيتحرش بيها في الميادين .... طيب ماهي دي نتيجة التحرر

المرأه محفوظة الحقوق ولها حقوق عديدة ولكن للاسف الشديد غير موجوده في مفهوم الرجل فأدى الامر للدخلاء انهم يطالبوا بحقوق المرأه فخدت أكتر من حقها ...... لا خدت مالا يحق لها أن تأخذه وبالتالي أصبح في فجوة كمان في مجتمعنا

والموضوع مش قاصر على كده وبس لسه الموضوع فيه كلام كتير

وأهو كله كلام

تنويه : كل سنة وانتم طيبين العشر الأواخر من رمضان قربوا جدا ربنا يجعلنا ممن غفر لنا فيهم نحن وإياكم يارب ... أرجو من كل اللي بيقرا المدونة الخاصة بيا لو لقى اي تغييرات اليومين دول يستحمل ... بعمل إزالة فيها لغرض التطوير وفي رسايل من اللي كتبتها ضاعت بس بعون الله كله محفوظ وموجود

إزالة لغرض التطوير 2

لسه مع موضوع الازالة لغرض التطوير ... وردا على تساؤل لصديق ليا قال لي بعد الفطار هو يعني عشان المجتمع فيه بوظان نزيل كل الناس ؟؟؟ هيبقى طورنا ايه لو ازالنا كل الناس المباني ؟؟؟ مش هيكون ليها لازمة اكيد

اولا صديقي المعترض شخصية في قمة الاحترام والأخلاق واعتراضاته دايما في الصميم ولكن هو مافهمش المقصود من كلامي والخطأ بالتأكيد خطأي انا لان معنى عدم فهم معنى كلامي فدا قصور في قدرتي على اني اوصل فكرتي للاخرين وما علينا اوضح فكرتي لصديقي ولأي حد مافهمش معنى كلامي

بالطبع قبل طرح الحل لابد من طرح المشكلة والمشكلة طرحناها امبارح بالتأكيد وهي ان في عندنا مليون فكرة عن نفسنا لازم نغيرها لاننا اصبحنا مجتمع مهلهل افكاره كلها متضاربه ودا فعلا موجود في مجتمعنا حتى لا يدعي من يدعي ان مصر المدينة الفاضلة غير ذلك وابسط مثال اتفرج يا سلام على المسلسلات والافلام وانت تعرف ( مش دي الدراما الواقعيه بتاعتنا )

مسلسل اسمه جدار القلب ( بجد مش فاهم اسم المسلسل دا ) دكتورة كانت معارضة بشده ان خطيبها ياخد رشوه لا وبلغت عنه رئيستها في العمل ولما اخوها وقع في نفس المشكلة قالت لخطيبها اديني فرصة احمي اخويا

يا سلام يا سلام وهو اخوكي مش مرتشي ؟؟؟

دا يثبت تضارب الفكر خطيبها مرتشي لكن اخوها يستحق الحماية

نيجي للشارع بعد الدراما

مصر كلها بتمجد في نفسها وتلاقي اي مصري في مصر او بره مصر بيحكي لك تاريخه وانجازاته وكأنه جاب الديب من ديل اللي جابوه وكأن محدش غيره بيفهم ثم يستدرك ويبدأ حديثه عن آخرين ( مع التأكيد أن الاخرين اكثر منه علما ) ويبدأ في عملية التحليل والتمحيص والانتقاد وكأنه أكثر منهم علما وهو قاعد ماسك سيجارته في ايده

الموظفين عنده كلهم مرتشين الا ابن عمه اللي شغال في الجمرك وعنده عربيه ب كام الف جنيه وشقة في مدينة نصر ( طب جابهم منين ؟؟ .... اصل اخوه كان بيشتغل في الخليج وهو اللي باعت له .... هو اخوه كان بيشتغل له وللزمن )

اي بنت عندها 21 سنة تلاقيها تقولك لا انا ضد فكرة الزواج المبكر والبنت لما تتجوز.. تتجوز وهي عندها 25 سنة وعند اول عريس هيخبط في حالة العنوسة المزمنة حاليا هتوافق عليه حتى لو عندها 19 سنة

كل دي تناقضات واكتر في مجتمعنا وفي اكتر منها

طب ايه اللي محتاج ازاله لغرض التطوير مش الناس اللي محتاجين ازالة لغرض التطوير لا .... عقول الناس هي اللي محتاجة ازاله لغرض التطوير نفوس الناس هي اللي محتاجه تطوير وتهذيب

فكر الناس هو اللي محتاج اعادة تهيئة او زي ما بنعمل في الكمبيوتر FORMAT وبعد كده ننزل نظام التشغيل الجديد وبعد ما ينزل نظام التشغيل الجديد ؟؟؟

لازم يكون عندك ANTI VIRUS ومش كده وبس لا لازم يكون عندك ANTI SPYWARE

احنا فعلا محتاجين اعادة تهيئة لعقولنا واعادة ترتيب لكل افكارنا ... محتاجين نتكلم بالحق من غير جدال ( وانا اولكم عشان صديقي ميزعلش )

محتاجين نقول الحق بقمة الهدوء والقوة

محتاجين نعرف الصح ايه والغلط ايه من جديد بعد اختلاط المفاهيم وتدني مستويات التفكير

محتاجين نرتقي بحياتنا كلها

واهو كله كلام ( يمكن يكون كلام فعال )

إزالة لغرض التطوير

في البلد اللي فيها عملي قررت الحكومة تطوير العاصمة وخصوصا من عند خط الساحل وقررت ازالة بعض المنازل والمباني لتطوير الاماكن وللتنبيه كتبت الدولة على كل منزل وكل مبنى إزاله لغرض التطوير وبدأت فعلا عمليات الازالة وبدا التطوير اما المتضررين من تهدم منازلهم فقبل الازالة ب 6 أشهر على الاقل سيحصلون على مباني واراضي في مدن جديدة مقسمه تقسيم رائع ومباني اكثر روعه مما تهدم


كل دا ميهمناش اللي يهمني كلمة إزاله لغرض التطوير تخيلت تخيل ظريف جدا ايه في مصر محتاج ازالة لغرض التطوير لاقيت أول حاجه القاهره كلها


مثلا لو صحينا الصبح لاقينا خريطة القاهره مكتوب عليها كلمة ازالة لغرض التطوير


واكتشفت ان اللي عايز يتعمل له ازاله فعلا مش القاهره لا سكان القاهره وغير القاهره ببساطة سكان المحروسة من البحر الى اقاصي الصعيد فعلا عايزين ازالة لغرض التطوير

كتير أوي مننا ويمكن أنا واحد منهم ضروري جدا يتختم على ضهرنا إزالة لغرض التطوير حاجات كتير جدا في مجتمعنا عايزة إزالة وتغيير وتصليح وتهذيب ونسف كمان

مثلا احنا المصريين اصبح الشك في كل كلمة بيقولها غيرنا من المصريين بردو محمل شك تام ولا يجوز تصديقها او اعتمادها الا بعد فحص وتمحيص تام وربما يستمر الشك ( لكن بنقول بكل فخر الخواجه قال )

ركزوا في كلامنا كمصريين هنلاقي دايما كلمة مهمة جدا واحنا بننقل حوار عن آخر ( هو بيقول بس الله اعلم ) يعني ببساطة هو بيقول بس انا بقولك انه كداب

ومش معنى كده ان مافيش كدابين .... لا دا احنا نسبة الكدب عندنا عالية جدا احنا يمكن اللي اخترعناه ما بينا بداية من افلام السنيما الصامتة وايام افلام صدقيني يا نعمت بالتشديد على حرف الصاد والأخلاق الغير حميدة اللي دستها في مجتمعنا سينما اليهود وتوجو مزراحي وحتى يومنا هذا ونحن نتتبع خطوات الاخلاق الغير حميدة

البياع = نصاب في مجتمعنا ..... اكيد عايز يلزق لي البضاعه البايظة

التاجر = حرامي ياعم دا عايز يكسب من ورايا ( كأنه المفروض بيشتغل لوجه الله والوطن )

الدكتور = دول جزارين

ضابط الشرطة = حاميها حراميها

الحرامي = ماهو من الظلم اللي بيشوفه وحال البلد بقى حرامي

المهندس = دول بياخدوا رشوه

الفنانين = دا مجتمع منحط

هي دي الافكار السائدة في نفوس المصريين عن نفسهم كل مهنه اصبحت ذات صيت سيء وشك وتربص للشر وتحفذ للهجوم ... امشي مثلا في شارع من شوارع وسط البلد في اي محافظة ونخلينا في القاهره وخلي مثلا واحده ( وتكون حلوة شوية ) تسأل عن شارع تلاقي 100 راجل وقفوا يدلوها

طب خلي راجل يسأل 100 واحد كلهم هيقولوا له ماعرفش انا مش من هنا ... رغم انهم عارفين ويمكن واحد ساكن في الشارع اللي الراجل بيسأل عليه

المجتمع بصفه عامة أصبح مجتمع مهلهل ممزق سادت فيه أفكار غير منطقية وفكر مثلا تدخل في نقاش مع واحد ويكون مصري زي حالاتك هتلاقي التالي

1- بيحاول يثبت انه هو الصح بأي شكل

2- لا تستبعد ان يهاجمك في الحوار

3- محاوراتك مهما كانت مستندة لوقائع لكن غلط لان مش دا اللي هو مقتنع بيه

4- كل الناس مبيفهموش الا واحد بس اما سيادتك او اللي انت بتحاوره

5- لو غلب واحد فيكم هيحول الموضوع لتهريج عشان يخرج من الحوار وكانه مش مهزوم

وكل يوم مجتمعنا يسير من سيء لأسوء والاحلى من كده ان كلنا مش عاجبنا حال مجتمعنا وكلنا شايفين مجتمعنا ماشي غلط رغم ان كلنا غلط زي حالاتي كده بأتكلم عن المجتمع وانا منه واكيد باعمل زيه

وأهو كله كلام

افتكرت قصة

من يومين تقريبا افتكرت قصة ماعرفش ايه اللي جابها على بالي وما انكرش ان القصة دي فضلت كتير اوي على بالي وقت ما قريتها لكن اختفت مع عوامل الزمن لكن وانا قاعد من يومين افتكرتها ومن احساسي بصدقها افتكرت كل تفاصيلها تقريبا

هي مش رواية ولا مؤلفة على العكس قصة واقعيه حقيقية حصلت فعلا

تفتكر عبد الوهاب مطاوع ؟؟ متعرفوش ؟؟

عبد الوهاب مطاوع يعد من أشهر الكتاب المصريين واللي اشتهروا بكتابتهم الاجتماعيه المتميزة وفي نفس الوقت كان رئيس تحرير مجلة الشباب وفي نفس الوقت كمان كان هو اللي بيرد على بريد الجمعه اللي كان بييجي في جريدة الاهرام كل يوم جمعه واللي كان الناس بيبعتوا له مشاكلهم وهو يحاول ان يدلي بدلوه في الحل ولو تفتكروا فيلم زوجة رجل مهم كان هو اللي كاتب القصة من واقع قصة حقيقية وصلت لبريده

المهم القصة اللي انا افتكرتها كانت قصة لشاب اتوفى والده وهو في العام الثالث من كلية الهندسه وساب له امه وولدين وبنتين اللي لسه في بداية مرحلة الجامعه واللي لسه صغير

فاضطر الاخ الاكبر اللي في العام الثالث من هندسة واللي هنسميه مصطفى انه يسيب كليته ويبدا يدور على عمل عشان يأكل امه واخواته وبدات الرحلة بتاعته مع الحياة واشتغل عامل بوفيه في مصلحة حكومية بالنهار ونفس الوظيفة في مكتب هندسي مساءا اما اخواته

فالبنتين في التعليم المتوسط او زي ما بنطلق عليه في مصر ( الدبلوم ) والولدين واحد في اولى كلية تجارة والثاني لسه في اعدادي

وبدا مصطفى رحلة رعاية الاهل واصبح هو بين عشية وضحاها هو راجل البيت ( على فكرة كلمة راجل البيت مش حلوة اوي زي ما ناس كتير متخيلة )

البنتين ربنا رزقهم وخلصوا واتجوزوا واللي في كلية تجارة خلص واشتغل اما اللي كان في اعدادي فدا اللي حاول مصطفى يحقق حلم نفسه فيه فدخل كلية هندسة واغراه الحلم الامريكي زي ما بيغري العالم كله وسافر امريكا واشتغل هناك وهو لسه طالب في كلية هندسة وفي نص الرحلة دي كانت الام ماتت

المهم مصطفى حس انه اتطمن على كل اخواته ماعدا طالب كلية هندسة اللي سافر امريكا واللي عشان يطمن اخوه اكتر التحق بكلية الهندسة في احدى الجامعات الامريكية عشان يكمل تعليمه بناءا على رغبة اخوه

وبدأ الاخوه يتكلموا على ان مصطفى خلاص لازم يتجوز لانهم كلهم استقروا في حياتهم وكان مصطفى بلغ من عمره 47 عام واختاروا له عروسة بنت حلال واخوه اللي في امريكا قاله انا هانزل احضر الفرح وهاجيب معايا البدلة والفستان وهما بيجهزوا للفرح

مات مصطفى توفاه الله

واللي كان بيحكي القصة اخوه المهندس اللي في امريكا وبيقول ان مصطفى عمره ما فرح في حياته الا لفرح اخواته

وخلصت القصة

فعلا قصة عجيبة لما قريتها وانا في ثانوي افتكرت حديث لرسول الله صلوات الله عليه ( كل ميسر لما خلق له )

مصطفى الله يرحمه خلق من اجل مهمة واضحه جدا في القصة ومش هو بس كلنا كده

كل انسان فينا له في الحياه دي مهمه .... مهمة محدده من قبل الخالق عز وجل اتخلق عشانها لازم يأديها عشان ينتهي دوره في الحياه او ميأديهاش عشان يكون فرط فيما خلق من اجله

يعني ببساطة محدش فينا مخلوق على الهامش او صفر على الشمال

كلنا لنا قيمة وكلنا ذو نفع في المجتمع مينفعش اقول على نفسي انا صفر على الشمال

ممكن اكون صفر فعلا بس لو صفر هاكون على اليمين يعني صفر ذو قيمة

اتمنى تكون المعلومة وصلت

واهو كله كلام

قطارات السكه الحديد

كل سنة وانتم طيبين

موضوع واحنا في الشهر الكريم ربنا يجعل كلامها خالي من السيئات

كل سنة وأنا طيب لان عيد ميلادي قرب كلها كام يوم وأكون تميت 30 سنة والرقم بالنسبة لي عادي جدا انا حاسس اني شاب عندي 20 سنة ولازلت باتصرف كاني لسه صغير عايش حياتي يعني وفي وسط هوجة الحياة العادية دي كنت بأكلم اهلي وفي وسط السلامات امي قالت لي كل سنة وانت طيب يابني وعقبال 100 سنة في طاعة ربنا ( دعوة حلوة والله )

وربنا يرزقك ببنت الحلال عشان تلحق قطر الجواز .... انت كبرت ولازم تتجوز قبل ما قطر الجواز يفوتك

الجواز مش موضوعنا خالص موضوعنا النهاردة قصة القطارات اللي بتفوت الواحد واللي خلاني اخد بالي من الموضوع دا جملة سمعتها في فيلم آسف على الازعاج وقالها محمد شرف لما كان بيقول قطر الشغل اللي لازم تلحقة وهو كان فاكر انه قطر الناس بتركبه بتشتغل عشان عايزين كمساريه لحد ما فهموه الحكاية وقال تركب قطر الشغل يادوب تعمل لك قرشين تلاقي قطر الجواز فاتك تحاول تلحقة تلاقي قطر العمر اتقلب بيك في قليوب

كلنا رابطين حياتنا بمراحل كل مرحلة ورا التانيه لازم الاول نلحق قطر الشغل عشان نلحق قطر الجواز مع الاعتبار ان في قطر العمر اللي لازم يوصلنا لمحطات قطرات الشغل والجواز في الاعمار المناسبة

ليه دايما رابطين مراحل حياتنا بمواعيد وتوقيتات معينه ان فاتت فات معاها اللي بنتمناه واصبح الضياع هو مصيرنا

ليه الجواز له سن معين ومرحلة معينة لازم نلحقها (ودا مش تناقض مع فكرة الزواج المبكر اللي اتكلمت عنها وان كنت من اشد الناس ايمانا بيها )

وليه قطار الشغل في بلدنا بالذات او وطننا العربي مربوط بعمر معين قبل منه يبقى كدب او غير محسوب من خبرة الانسان و بعد منه يبقى متأخر في حياتك العملية والخبرة بتاعتك

وليه قطار التعليم له سن معين بعد منه انت متأخر واكتر منه يبقى انت بتضيع وقتك

في وسط قصة القطارات اللي لازم نلحقها دي افتكرت واحد اعرفه كويس جدا ربما مفاتوش ولا قطر وربما مركبش ولا قطر منهم اولا هو خريج كلية السن قسم لغة ايطاليه اشتغل في شركة وعشان يلحق قطر الزواج اتجوز بناءا على اختيار اهله وفضل متزوج 20 سنة وقرر السفر للولايات المتحده ومكانش سعيد في زواجه لأسباب تخصه هو بالاضافه إلى انه لم ينجب وكان بدأ يحضر ماجيستير ودكتوراه في تخصص لا يمسه من قريب او بعيد وهو الاقتصاد فبقى دكتور في الاقتصاد وهو في عمر 46 سنة تزوج من اجنبية انجبت له ولد وبنت واسلمت وعمره حاليا 52 سنة ولكن لما نشوفه نشعر انه شاب في الثلاثين من عمره لان حياته في عربية ملاكي ملهاش دعوة بسكة القطارات نهائي وطبعا مش عشان هو غني فاشترى عربية ملاكي او خصوصي لا عشان هو قرر ان حياته تكون خالية من القطارات زي الاشخاص اللي بيقرروا ان حياتهم تكون خالية من الكوليسترول

افتكر قصة ظريفة حصلت لي قريت اعلان في الاهرام عن شركة عايزة باحث تسويقي تكون خبرته في حدود ال 3 سنوات بعت السيرة الذاتيه بتاعتي وانا خبرتي فيها 6 سنوات 3 سنوات قبل ما انهي تعليمي و3 بعد ما انهيت تعليمي

لاقيت اللي بيعمل معايا المقابلة بيقولي لا خلينا في السنين بعد التخرج فسألته وسنين قبل التخرج لا ليه هي مش خبرة قال لي لا احنا في مصر مبنعترفش بسنوات قبل التخرج قولتله هي السنوات دي كنت بلعب فيها ؟؟؟ انا كنت باشتغل وكسبت فيها خبرة ربما غيري ماكتسبهاش وعموما لو على السنوات المطلوبه للخبره انا مستوفيها وطبعا انا نهيت الحوار لاني عارف انه جدل ربما منوصلش فيه الا لانه يقولي هانتصل بيك بعدين

وطبعا دي نظرة قطارات السكة الحديد اللي خلت مدير موارد بشرية يفكر بالاسلوب دا ولاننا محصورين في قطارات السكة الحديد فبنركب القطر واحنا محشورين وسط كل البشر اللي قرروا يلحقوا القطر يقفوا او يركبوا عالشبكة مش مهم المهم انهم يلحقوا القطر ولما يلحقوا القطر يكتشفوا انهم في رحلة الوصول للقطر فات عليهم 100 قطر ومحاولوش يوصلوا ليه بس عشان يلحقوا قطر بعينه

ودا شكل الناس اللي عايزين يلحقوا القطارات

يا ترى نبقى معاهم ولا نشوف عربية ملاكي

واهو كله كلام