عالزراعية ياما نفسي أقابل حبيبي

السلام عليكم ورحمة الله وبركاته



الأعزاء اللي سألوا عني في فترة غيابي والأعزاء اللي مسألوش لإنشغالهم .... والله كل الناس وحشتني ... اللي سأل واللي مسألش واللي سأل مرة وقال عملت الواجب ... واللي سأل مرتين وقال كفاية كده .... واللي سأل كتير لحد ما زهق مني ومن عدم ردي



انا كنت في غيبوبة الزمكان زي ما بيقولوا يعني غايب عن الزمان اللي انا فيه وحتى المكان كمان غيبوبة غيبوبة بجد حبه نفسيه على حبة عوامل عمل على حبة عوامل تانيه

وكل ما اجي اكتب الاقي الضرب على غزة زاد ( لدرجة اني حسيت ان اللي باكتبه نحس ) ولاني مش هاتكلم في السياسة فكنت باستحي اتكلم في اي حاجه تانيه وخصوصا اننا حاليا المصريين متهمين بأننا ساعدنا العالم اليهود ولاد ..... على أخواننا في غزة وأي كلام مني ( دا باعتبار ان كلامي مهم ) هيعني اني غير مهتم مع اني والله كنت مهتم بس عندنا حكومة جابت لنا العار وما علينا محدش يتكلم في السياسه

غير ان في ناس افتكرت اني اتجوزت من بعد ما قولت إني عايز اتجوز ( بأطمن كل بنات شارعنا والشوارع المجاورة إني لسه ماتجوزتش وجاري قبول طلبات البنات اللي عندهم أمل فيا )

كمان النت عندي مكانش مساعد اطلاقا ( أو انا كنت بتحجج بالنت ) بس اجاركم الله ولا أوراكم ما هو نت شبكات الموبايل اول ما انتقلت للمدينة الجديدة اللي انا فيها في العمل مكانش عندي انترنت فلجأت لخاصية انترنت الهواتف المحموله ودايما اول ما ببدأ ببدأ بموقع من مواقع الاخبار ابص بصه كده على بلدنا وفتحت موقع عادي جدا جدا بيفتح بمجرد الضغط على مفتاح الادخال اللي هو ( enter ) دا في حالة النت العادي لكن الانتظار طال

طال

طال

طال

وقلت احضر قهوة ورجعت بعد ما شربت نص القهوة لاقيت الموقع مفتحش الا جزء منه بدأت احس بالاحباط قلت افتح الماسينجر الاحباط زاد اكتر والكلمة اللي بكتبها دلوقتي بتوصل بعد ربع ساعه يكون اللي بيكلمني لعن اليوم اللي عرفني فيه وسابني ومشي

وبدأت اتحين اوقات الدخول السريع اللي كانت من الواحده بعد منتصف الليل وحتى الثامنة صباحا وطبعا في الاوقات دي اما اني نايم او بجهز حالي عشان اروح الشغل فيئست من الانترنت واصبحت استخدم الجهاز كأنه play station واحيانا بدفي رجلي بسخونة البروسيسور لما احط الجهاز على رجلي

وتدور الايام والاقي عندي فرصة انترنت ربنا مديله الصحة لمدة أسبوع فقلت استغل الاسبوع دا باني ابص عالمدونة الغلبانة اللي بقت عاملة زي البيت الوقف لا منها فيها حاجه جديدة ولا منها مقفولة

وأصبح عليكم وأقولكم هاهريكم رسايل لمدة اسبوع ( دا بافتراض ان لسه في حد مهتم بالموضوع معايا )

تحياتي لكل اللي سأل وكل اللي مسألش

ويارب اتطمن عليكم

اما بالنسبة للعنوان بتاع الزراعية دا حلم اني انزل اجازتي المتأخرة بقالها شهرين واشوف بلدنا واقابل حبيبي عالزراعية

بعيد عنكم محبوس في الشغل ومش عارف انزل اجازتي السنوية نفسي انزل مصر عشان امشي في شوارعها الزحمة واشوف كل قرف وكل مر وكل حاجه حلوة محروم منها

وعلى رأي فيروز فزعان يا قلبي أكبر بها الغربة ما تعرفني بلادي ( قال يعني هي عرفاني وانا مش في الغربة )

ما علينا

طولت عليكم بعد الغيبة ونلتقي بعد الفاصل ويارب ما يطول