عايز أتجوز 3 .... عبده المفتح

الحمد لله كل يوم ناس جديده بتشوف المدونه بس اول ما بيفتحوا بيقروا الصفحة اللي في المقدمه ويبدأوا يعلقوا على الموضوع دا بعينه وبذاته حتى الان لسه المدونه قاصره على دائرة الأصدقاء بس دا في حد ذاته رائع بالنسبة ليا ولكن لأن بقت هوايتي اني اكتب المواضيع في تسلسل فعشان نفهم صفحة المقدمة ضروري نقرا المواضيع التي تمت لها بصله زي المواضيع اللي هاكتب أسمائها وبمجرد الضغط عليها هتفتحلك صفحة الموضوع

عايز أتجوز

عايز أتجوز 2

عبده المفتح

عبده المفتح دا واحد هتلاقيه في كل مكان ... في أي مقر عمل .... في أي مواصله .... في أي شلة صحاب هتلاقيه دايما وسط كل الناس .... ممكن مره تلاقيه مسلم .... وممكن تلاقيه مسيحي .... ولو عندي درايه بطباع اليهود كنت قولتلكم هايكون موجود ولا لا بس في الغالب موجود

دايما عامل نفسه عارف كل حاجه وكل المواقف والاحداث مرت عليه وعنده بيها خبره كافيه لا تضاهى لا وبيفهم أكتر من كل الناس وكل الناس عنده مبتفهمش وهو واجبه الناصح الامين اللي لازم يدل الناس على سكة الصح

عبده المفتح لما بيعرف ان واحد هايتجوز لازم يروح يدله وينصحه ويفيده ويقف جنبه .... راجل طيب يا جدعان

عبده المفتح عرف ان مصطفى سلامه هايتجوز ( مين مصطفى سلامه دا ؟؟ ) يعني هو احنا كنا عرفنا مين عبده المفتح اهو 2 من اي خيال

عبده المفتح : ايه يا درش اخبارك ايه يا برنس ؟؟؟

مصطفى : ابو عبد ازيك يا مان ... انا الحمد لله تمام انت عامل ايه

عبده : الحمد لله ... انا سمعت انك هاتتجوز صحيح ؟؟

مصطفى : الحمد لله ياعم لاقيت بنت الحلال ورايح اتقدم لها كمان يومين

عبده : طب فل أوي كويس اني لحقتك في الوقت المناسب اصل انا عديت عالموقف دا كتير ما انت عارف انا خطبت مرتين وكنت ماشي مع البت رشا وكانت عايزه تشنكل العبد لله بس انا نفدت بجلدي ولا البت سهام .... عملت اللي ميتعملش عشان تشنكل اخوك لكن على مين .... المهم يا معلم انت ضامن اللي انت رايح تخطبها دي

مصطفى : (شسشسشسب .... صوت شفطة الشاي ) اكيد ياعم اومال هاخطب اي واحده والسلام سألت واتقسطت ولفيت ودرت ... مسمعتش عليها كلمة وحشه .... الكل بيشكر فيها وفي أهلها

عبده المفتح : اهو دا اللي يقلق البت المفتحه مبتلعبش مع شباب حتتها ... فعشان كده بيقولوا عليها تمام ... لكن هي بره حتتها عامله ايه ما انت عارف بيخرجوا من باب الشارع باللبس التمام والله اعلم بيروحوا فين وبييجوا منين

مصطفى : ( وشه محمر شويه ) ياعم حرام عليك البت من البيت للجامعه ومن الجامعه للبيت

عبده : ( قرب شويه من درش ) طب فاكر الواد حسن سوكا اللي كان معانا في تجاره .... مش كان ماشي مع البت ولاء 3 سنين ؟؟ ولما جه يخطبها سأل ولف ودار في شارعها وحتتها والكل قاله تمام وبعد الخطوبة والشبكة والذي منه وبعد ما دفع دم قلبه في الشبكه عرف من وليد ابو طويله صاحبنا انها كانت ماشيه مع علاء العمده وانا اللي شوفتها وعرفت وليد ... شوفت بقى ... النسوان اليومين دول مش مضمونين يا درش وانا بنصحك عشان مصلحتك وانت عارف انا بعزك اد ايه

مصطفى : (الفار بدأ يلعب في عبه ) ياعم دي جارة اختي وساكنه معاها في نفس العمارة واختي عرفاها من زمان

عبده : ماهو النسوان مبياخدوش بالهم من حركات بعض ... هي ساكنه في الحتة اللي وصلتك فيها من اسبوع ؟؟ تمام انا عندي اللي يجيبلك قرار الموضوع دا

مصطفى : مين ؟

عبده : هيثم الحوارتي .... ما انت عارفه ياعم الواد دا دايس الحته دي ويعرف بناتها موزة موزة .... مافيش حته الا وزارت العربيه بتاعته انا اديله الو وتقابله وشوف بس متقلوش انها ليك كانك بتسأل لواحد صاحبك يعني

مصطفى : ( عمال يهري وينكت جوه نفسه ) شغال يا عم عبده كلمه

عبده : (بعد ما ضرب زراير التليفون ) هيثم باشا ازيك يا برنس اخبارك ايه يا كبير .... طب تمام .... بقولك يا هيثم عايزينك في موضوع كده انا ومصطفى سلامه في واحد صاحبنا متعرفوش عايز يخطب من نواحيكم وانت ادرى الناس بناسها .... لا لا خلي الاسم والكلام دا لما نتقابل بكره يناسبك ؟؟ اشطه يا كبير سلم

مصطفى مشي وليلته كانت أطول من ليلة نتيجة الثانويه العامه طول الليل على جمر مستني الصبح يارب بعد ما سألت وعرفت واتقسطت ممكن يطلع في البنيه حاجه هو الواحد مش مكتوب له يستقر في بيت ولا ايه .... خلصت الليله وراح الشغل وعينه وارمه وخلص يوم الشغل وبعد معاناه قابل عبده المفتح اللي خده وطلع على هيثم الحوارتي وبعد السلامات والذي منه بدا الحوار

مصطفى : عبده كان قالك يا هيثم عن واحده عايزين نسأل عليها عشان واحد صاحبنا ناوي على جواز

هيثم : تمام اسمها ايه بقى ؟؟

عبده : ( كركركركر .... صوت حجر التفاح اللي بيشد منه ) اهم من اسمها ياعم هيثم تعرفنا بالتفصيل لو في حاجه متخبيش علينا

هيثم : ياعم عيب هو انا هاغشك المهم الاسم ايه

مصطفى : سناء الصاوي ... تعرفها ؟؟؟

الحوارتي : اخت علي الصاوي ؟؟ اومال ياعم عارف البيت دا كويس دا انت صاحبك حظه مع اهلها تمام انما الله يكون في عونه معاها عيله مخها تعبان لا بتكلم ولاد ولا حتى بنات

مصطفى : (الروح ردت له ) يعني اقول لصاحبي يتطمن ؟؟؟

هيثم : لا ياعم تمام ربنا يعينه على مخها القفل بس

قام مصطفى وعبده المفتح بعد الشاي والمشاريب والترحاب والسلامات والتشكرات والذي منه لكن المفتح حس انه مش عارف يعمل مفتح فقعد يعصر دماغه لحد ما لقى تفتيحه تانيه

عبده : بص بقى يا برنس البت طلعت تمام اهي هنيالك بس نصيحة من اخوك وانت عارف غلاوتك عندي خليك تقيل النسوان على قفا من يشيل ومش لاقيين جواز فلو ابوها قالك عايزين قوله مش مقدرتي اسمع كلامي ... الواد عادل الاسيوطي راح يخطب من شهرين اهل البت طلبوا كل حاجه يعيني الواد كع دم قلبه ومقالش تلت التلاته كام واهي راكبه اهي ومدلدله اوعى تعمل زيه خليك زي اخوك لو تشوفني في البيت اسد لاني مليت شروطي من يوم ما روحت دلوقتي ادخل البيت بس .... ارمي الابره اسمع رنتها

تليفون عبده المفتح يرن ومكتوب على شاشته الحكومه وبينه وبين نفسه استر يارب

عبده : الو ايوه يا حياتي

الحكومه : انت فين يا سبع البرمبه

عبده : مشوار بس مع واحد صاحبي كده وجاي على طول تحبي اجيب حاجه معايا وانا جاي

الحكومه : هو انت كنت عايز متجيبش ؟؟ لو جيت وايدك فاضيه تبات عند امك انا مش الخدامه اللي جبهالك ابوك كل يوم طبيخ طبيخ انا زهئت .... وبعدين انا نازله رايحه لسوسو اختي عشان عيانه هاسيبلك الواد صبحي تخلي بالك منه وتجيب اكل ليك وليه

عبده : اوامرك يا حبيبتي ... حاجه تانيه ؟؟؟

الحكومه : متتأخرش بره وبطل قاعدة القهاوي وفر القرشين للبيت بالسلامه ( قفلت السكه )

عبده : ( وكأنه لسه بيتكلم ) بقولك ايه انتي طلباتك كترت اوي ما تقصري وتخلي ليلتك تعدي ..... دا انتي ماتربتيش صحيح .... طيب على الله ارجع الاقيكي ومتجيش من بيت اختك الا لما اجي اخدك ( قال يعني قفل السكه) شوفت يا درش نسوان متجيش الا بالعين الحمرا خليك زي اخوك كده حمش


هو دا بقى عبده المفتح اللي بينط في كل جوازه ..... كل راجل يخلي باله من عبده المفتح ... واللي عجبه الموضوع يسمعنا رأيه

وأهو كله كلام

عايز أتجوز 2 .... حبيبي دائما

الأخوه الاعزاء من يشرفني قدومهم لمدونتي ... لمتابعة تسلسل موضوع عايز أتجوز يرجى قراءة الصفحة الأولى منه بالضغط على الكلمة التاليه عايز أتجوز

حبيبي دائما

أكيد مش هاحكي الفيلم .... لأن الفيلم ببساطه كلنا عيشناه وعاصرناه مع نفسنا راجل وست .... بالتأكيد كلنا لما كنا طلبه في الجامعه أو الغالبيه اتعرف على بنت ظريفه او اتعرفت على شاب ظريف والاتنين كان بينهم زهرة الحب اللي بتطلع في الاول دي اللي احنا كلنا بنسميها الحب الأول وكل واحد فينا ياما سمع أغاني عبد الحليم حافظ للعالم العواجيز اللي زي حالاتي وشباب اليومين دول اللي بيسمعوا الواد ابو شعر كتير في صدره دا

وسهرنا ورسمنا قلوب على كل كتاب وكل دفتر وقعدنا نحلم ونرتب .... وعلى ايامي كان الموبايل لسه اختراع في امريكا موصلش مصر ومكانش في وسيلة اتصال الا التليفون العادي ... وكل ما اتصل الاقي ابوها بيرد فاقفل السكه كاني سمعت صوت علي الشريف الله يرحمه واللي ميعرفش الممثل علي الشريف صورته اهي





وطول الليل مستني الفرج ولا اللي مستني اتوبيس 968 اللي بيروح شبرا لحد ما تحن الكتكوته على العبد لله بمكالمه وييجي صوتها بهمس نواعمي يرجع للعجوز عمره اللي راح وهي بتقول وحشتني .... يالهوي على وحشتني ايامها كان ليها طعم تاني احلى من طعم عصير القصب البايت عند فرج اللي عند محطة مصر

ونظل طول الليل الكلام اللي قولناه امبارح هو اللي هانقوله بكره .... هو نفس الكلام اللي بنحكي فيه النهارده وأول ما حد يقرب مني وانا باتكلم على طول صوتي يرجع خناشيري تاني بعد ما كان بيهمس من شويه وأقول طيب يا زناتي اشوفك بكره في الكليه ولا لما حد من عندها يقرب منها وهي بتتكلم في ثانيه اتقلب شيماء او دعاء او حتى تفيده المهم لازم يكون اسم انثى عشان المستور ماينكشفش

في الأيام دي بيبدأ حلم الزواج يتكون عند الرجل ويبدأ يقول انه عايز يتجوز بالتأكيد بيقول الكلام لنفسه ويبتدي يفكر ويقرر انه ميقدرش يعيش من غير الحلم اللي عاش طول عمره مستنيه ( على اساس ان عمره 100 سنه ) أما الكتكوته فكل تفكيرها في الحب والحياه الحلوه اللي هي عيشاها مبتفكرش معاه في موضوع الزواج مش عشان هي مش عايزه لا لانها متأكده انها مش مشكلتها هي قاعده في بيت أبوها وهو اللي هاييجي هو والعائلة الكريمه يقولوا عايزين بنتكم

بعد كده يبدأ التصريح للأهل ... مش للأهل للأم اولا وطبعا الام دي الصدر الحنين اللي بتاخد الكلام بقلبها مش بعقلها وبتقول وماله يابني دا يوم المنى لما اشوفك عريس وكأن الواد خد الموافقه خلاص تلاقي الدنيا زهزهت في عينه ويجري على الكتكوته يبلغها لكن ميلاقيش من الكتكوته غير الصدمه العصبيه اللي بتربيها له انا اتقدم لي عريس ؟؟.... ويعني هو العريس دا ماتقدمش غير النهاردة .... لا دا كان متقدم من زمان وانا مش عايزه اقولك ( خايفه على مشاعره البت )...

وبالتأكيد لاننا كنا لا زلنا طلبه فصعب بل ويمكن مستحيل في أب يوافق يجوز بنته لطالب زيها حتى لو أبوه مليونير وتخلص القصه وقبل ما تخلص السنه الدراسيه تلاقي الكتكوته اتخطبت .... وتبدأ السنه الجديده وهي متجوزه وتدخل الامتحانات وابنها او بنتها في بطنها

وانت يا ولداه قاعد حزين تعدد على اللي راح وتتمنى تسمع بس خبر عنها أو تسمع عبد الحليم وهو بيقول ... تخونوه وعمره ما خانكم

قصه يمكن تقريبا مافيش شاب في مصر لم يعش تلك الحاله ولا بنت في مصر لم تنغمس في هذيان الحب الأول اللي بتظهر أعراضه على أعتاب وداع المراهقه وبداية الدخول في العالم الجديد

زي بالظبط روميو وجولييت او قيس ابن المجانين وليلى .... كل شاب فاكر نفسه هو قيس وكل واحده فاكره نفسها ليلى دا غير ان في اللي بيسرح بخياله زياده ويبدا يكتب كلام يقول عليه شعر من عينة طلعت فوق السطوح انده على طيري ... لاقيت طيري بيشرب من قنى غيري

تخيلوا لو الشاب دا ربنا كرمه ...( أو انتقم منه الله اعلم ) واتجوز اللي كان بيحبها في الجامعه واللي سهر يرسم لها في قلوب في دفتر محاضراته بدل ما يذاكر له كلمتين ينفعوه كان حصل ايه

كان ممكن تلاقي حوار زي اللي كتبه الساخر احمد رجب في تخيله عن زواج روميو وجولييت من حوالي 15 سنه

جولييت : كل سنه وانت طيب يا حبيبي

روميو : وانتي طيبه بمناسبة ايه

جولييت : اخص عليك نسيت عيد جوازنا الخامس

روميو : معلش يا حبيبتي عندي مشكله في الشغل قرفاني

جوليت : الشغل بردو ولا الننوسه اللي معاك في المكتب منسياك نفسك

روميو : بقولك ايه اتمسي انا مش ناقص وجع دماغ

جوليت : هو كلامي بقى وجع دماغ

روميو : وجع دماغ وصداع كمان

جوليت : صداع ؟ ... وربنا ما انا بايتالك فيها

روميو : بالسلامه ومتنسيش تاخدي ابنك معاكي جتك الغم

أو قيس ابن الملوح كان بدل ما يكتب

امر على الديار ديار ليلى ...... اقبل ذا الجداروذا الجدار

وماحب الديار شغفن قلبى ........ ولكن حب من سكن الديار

كان كتب كلام تاني من عينة اغنية ريكو زهئان طهئان متضايق ... خنقتني وسدت نفسي

ولأن ذلك الزواج لا يحدث فإن ذكريات حلاوة ذلك الحب التي تكون كل محتوياته تقع تحت شعار أول مره .... تظل تلك المحتويات سكينة النفس يصاحبها ابتسامه في حالة التذكر ونتمنى ان نعيش نفس الشعور والحاله مع ذكريات حبيبي دائما

وأهو كله كلام

عايز أتجوز

بالتأكيد عايز اتجوز دي رغبة ملحه جوايا وبقولها بعد طول مشاورات نفسيه وعقليه بيني وبين نفسي وخصوصا ان كتير من المجتمع الذكوري في مجتمعاتنا العربيه عامة ومجتمعنا المصري بالأخص بينظر لكلمة عايز أتجوز كأنه نوع من الضعف وإظهار رغبه وحاجه لا يجوز إظهارها ومش معنى كده ان الرغبه دي لسه وليدة الايام دي لا .... الاعلان عنها هو اللي وليد الايام دي

بالظبط زي ما هاجموا صاحبة كتاب ومدونة عايزه أتجوز (غاده عبد العال) واللي عرضت ببساطة وبوضوح حاجة الفتيات للزواج دون اسفاف أو تفاهه أو اي اسقاط يحسب عليها بل وأبدعت في سخريتها لهذا العرض

واكتشفت اننا نحن المجتمع الذكوري المصون لا يعلن تلك الكلمة الا في أضيق النطاقات لعدة أسباب جاري سردها بعون الله بينما البنات كانت لا تعلنها نهائي لأن موضوع انها تقول عايزه اتجوز في مجتمعاتنا يخليها تستاهل الدبح يابوي

ورغم ان الزواج وما فيه بكل مشتملاته يعد رغبة اساسيه ( مش الفيلم بتاع شارون ستون لا ) وغريزة تهفو إليها كل النفوس ورغم ذلك حولناها لرغبة عيب ذكرها بالنسبه للذكر وكارثه لو اتذكرت بالنسبة للبنت

ببساطة كده هاتوا مخلوق على وجه الأرض لا يرغب في التزاوج والزواج غير الاميبا طبعا لانها مخلوق احادي الخليه بيتكاثر مع نفسه (ياريت الواحد كان اميبا مكانش دا بقى حاله ) مافيش

كلنا عايزين نتجوز ولد وبنت وراجل وست .... الموضوع في حد ذاته عامل لي صداع مع اهلي وخصوصا ابويا لانه عريس جديد لسه متجوز لثالث مره من يومين ( ربنا يديه الصحه )

اما امي ربنا يبارك لي فيها فهي كل مكالمه من الغربة اللي انا فيها ليها مبسمعش غير 3 دعوات ربنا يوسع في رزقك ويحبب فيك خلقه ويرزقك ببنت الحلال اللي تصونك وتحفظك ( لما اتجوز ان شاء الله هتنقرض الدعوات وتقتصر على اول 2 )

ورغم ان موضوع الزواج اتهرى واتقتل كتابه وبحث بكل شعابه إلا ان الموضوع مازال يحتمل الكتابه كل يوم وخصوصا ان الزواج له تعريف عند كل واحد براحته

في اللي عايز يتجوز عشان يلاقي زوجه حلوه يعفها وتعفه وفي اللي عايز يتجوز عشان يخلف .... واللي عايز يتجوز عشان يروح البيت يلاقي أكله حلوه مستنياه وفي اللي عايز يتجوز عشان هدومه تتغسل وفي واحد عايز كل دا

ورغم كل دا الزواج مازال مشكلة كبيره ايضا لدى الطرفين الراجل والست والست والراجل بل ومعضله بل واحيانا هو المحطة الاخيره في حياة كثير من الرجال اللي بعد منها بتنطفي شمعة حياته جنب الزوجة الننوسه او بيولع في بيته ومراته وخصوصا لو كانت من اتباع مهروشة الفكر والعقل نوال السعداوي

قصص كتير سمعناها عن الجواز اللي ماتمش اكتر من الجواز اللي تم لدرجة اني بقيت اتخيل انه متى تم الزواج وكل واحد وواحده راحوا بيتهم كده خلصت الحكايه اللي جاي كله بتاعهم هما يحلوه سوا لكن اللي قبل كل دا هو اللي فيه المعضله وعلى رأي غادة عبد العال ان احنا وصلنا لمرحلة الخطوبة بس نسينا ان في مرحلة تاليه تسمى زواج

والمشكله ان اللي قبل كده كتير اوي مسئولين عنه الاب والام والراجل والبنت نفسها في ابهات عايزه العباسيه وفي رجاله تستاهل الحرق وفي بنات عايزه المين يفوقوها

وعلى الوتيره دي والمنوال دا وبعد ما قعدت كام مره مع نفسي في الفترة اللي فاتت اكتب وارتب قصص الزواج اللي تم واللي ماتمش في كل ما هو محيط بيا وصلت لنتيجة انه لازم كل واحد وواحده يقولوا عايزين نتجوز .... اهم حاجه نسيب النعرة الكدابه بتاعة الرجاله اللي بيقولوا انا كده حلو وبتاعة البنات اللي بتقول الجواز مش في تفكيري خالص ..... كلهم عالم كلامنجيه بيألفوا وخلاص والجواز في دماغهم ليل ونهار زيهم زي أي كائن حي الله سبحانه وتعالى خلقه برغبته الجنسيه للطرف الآخر من نفس نوعه

طيب وليه هانقول عايزين نتجوز ؟؟؟ لان الزواج أصبح مشكله في الوقت الحالي وعرض المشكله بكلمة عايزين نتجوز يمكن في حالة عرض المشكله نقدر نوصل لحل للمشكلة المعضله

وأهو كله كلام

آخر الكلام في الإزاله

كل سنه وانتم طيبين بمناسبة العيد أولا اللي خلص وفات

وكل سنة وانتم طيبين بمناسبة ذكرى اكتوبر .... ورحم الله صاحب نصر أكتوبر .... رحم الله الرجل الذي خطط ودقق ودبر ورسم .... رحم الله ذلك الرجل الذي نسيناه .... أو تناسيناه

حقا إنه هو الرجل من أشد الرجال وطنية وإخلاصا وذكاءا ودهاءا

الرجل الذي لم يأخذ حقه وانتقصنا من قدر كل شيء فعله واتهمناه بالكفر .... واتهمناه بأنه خائن وعميل .... ولربما أتهمه الكثير بأبشع من ذلك وأشنع

ولكنه حقا رجل بحث عن عزة وكرامة المصريين كأنها عزته وكرامته

سمعت أغنيه عن سينا كانت كلماتها بتقول

سينا ... ابن راح ومجاش ... مضاعش حقه بلاش .... يوم ما كان في حرب ماستناش

واحنا ضيعنا حق الراجل دا في كل ما فعله من أجلنا ومن أجل مصر

هاسئل سؤال ... حد يعرف مين قائد القوات الجويه حاليا ؟؟

طيب قائد المدفعيه ؟؟

طيب قائد المشاه ؟؟

يمكن تقريبا في ناس متعرفش اسم وزير الدفاع

وبردو وقتها مكانوش يعرفوا غير الريس وئيس الوزرا ووزير الدفاع وشوية وزرا كل واحد حسب الوزارة اللي تهمه

مش عيب ولا حرام مش مهم نعرفهم لكن اللي عيب وحرام نكران الجميل ؟؟؟ لما ألاقي صحفي بيكتب عن الرئيس حسني مبارك كأنه هو صاحب النصر وصاحب كل حاجه في حرب اكتوبر متجاهل دور القائد اللي خطط ودبر ورسم واستلم الجيش مهلهل عباره عن مجموعة مرتزقة بدون سلاح اكتر من الكليشنكوف وشوية قنابل يدويه وعمل منه جيش وضرب وحارب ..... تجاهل كل دا كأنه لم يكن وقعد يطبل ويزمر للرئيس حسني مبارك كأن هو اللي قام بالواجب كله وهو اللي حرر

ياعم الصحفي عايز تزمر وتطبل لحد ماختلفناش مش غريبه على الصحفيين لكن عيب اوي لما تمحي تاريخ بلد بحاله وتخلي مقاليد التاريخ كلها في ايد واحد بس

انا لا بذم في الريس حسني مبارك ولا ليا دعوة بالسياسه ومش خوف والله بس لاني مش هاعدلها يعني لكن بيحز في نفسية الواحد نكران الجميل ونسب الفضل لغير أصحابه

زي بالظبط يسري الجندي اللي كتب مسلسل ناصر .... غير وحرف وألف وطور بمزاج اللي جابوه عن مصر وتاريخها وصور لنا عبد الناصر كأنه القديس والنبي المنزل لإنقاذ الشعب من الهلاك

ونسي انه يوم 3 يونيو سنه 1967 كان عبد الناصر واقف يخطب وكله حماس بيقول نحن نستطيع أن نلقي اسرائيل ومن وراء اسرائيل في ماء القناه ..... على رأي المثل غشيم ومتعافي وصاحبه يقوله الطيارات برقبتي ياريس وساعة الجد يقول للجيش انسحبوا

ونيجي نتفرج عن جريدة الاهرام النهاردة في يوم 6 اكتوبر نتفرج على العجب العجاب ..... حتى مربع صغير عن السادات مافيش مع ان النهارده ذكرى استشهاده لكن لا ماينفعش في ناس هتزعل ونزعل الناس مننا ليه

وييجي انيس منصور كاتب عن المصريين اللي بيسرقوا البط في النمسا .... ياراجل خلي في عينك ذره ملح واكتب عن الراجل اللي فتح لك الطريق في عالم الصحافه

وواحد تاني يقولك يوم لن ينساه التاريخ طب ايه هو اليوم ياعم الحج يقولك كنت نايم وصحيت على خبر الحرب ..... طب الحرب كانت الساعه 2 الضهر ومعنى انك صحيت على خبر الحرب يعني مش قبل الساعه 3 ونص العصر يعني كنت عواطلي .... بقيت صحفي امتى الله اعلم اكيد كنت بتطبل كتير وتزمر زي اللي كان بيزمر

حبيت بس افكر الناس بالراجل اللي قال الكلمه الحكمه في الوقت المناسب

الرئيس اللي مش هاييجي على مصر زيه أنور السادات

حد فاكر قصة قطز .... درسناها في 2 ثانوي للي فاكرها

من ابن ملوك لعبد يتباع في سوق النخاسه لفارس من المماليك لحد ما بقى سلطان مصر وبعد ما هزم التتار اتقتل على ايد بيبرس .... اللي جه وجوع شعبها بردو

قارنوا بس القصتين وشوفوا

وعلى رأي واحد أعرفه الله يرحمك يا سادات هو دا اخر راجل مات ومات بردو في اكتوبر لان الرجاله كلهم ماتوا في حرب اكتوبر

وأهو كله كلام

إزاله لغرض التطوير 8

لمتابعي المدونة الكرام حتى تتضح فكرة هذا الموضوع فضلا وليس أمرا الرجاء متابعة المواضيع السابقة بنفس المسمى إزاله لغرض التطوير

إزاله لغرض التطوير 1

إزاله لغرض التطوير 2

إزاله لغرض التطوير 3

إزاله لغرض التطوير 4

إزاله لغرض التطوير 5

إزاله لغرض التطوير 6

إزاله لغرض التطوير 7

يا حلاوتك يا برتقالي

دايما كنت باحس ان اللون البرتقالي دا لون مايع لاهو محصل اللون الاحمر ولا هو محصل اللون الاصفر لون واقف في النص وكنت ساعات بشوفه أصفر أو لو غامق حبتين أشوفه أحمر ( عمى ألوان بعيد عنكم ) وزيه زي ألوان كتير مايعه زي التركواز والجانجا والالوان الغريبه دي

بس مانكرش اني بحب اللون دا وخصوصه انه بيليق جدا مع اللون الأزرق واللون الأزرق دا حبيب قلبي لوني المفضل لدرجة ان في 2 من اصدقائي مسميني الرجل الأزرق

لكن ماعرفش وانا باتفرج على اعلان موبينيل وهو بيقول فرحه فرحه فرحه ياحلاوتك يا برتقالي ... مش عارف ليه حسيت انه عامل زي لون الشعب المصري شعب متفهملوش حاجه ولا حاله وكل يوم في حال وكل واحد برأي وكل انسان وعجباه دماغه

وعلى رأي الشاعر مصر أم الدنيا وفرنسا أم اللمبي

الغربة بتخلي مخ الناس تلسع كنا في سوبر ماركت انا واصحابي بنشتري شوية طلبات وانا بشتري عصير والعصير كان فيتراك مصري اكيد .... الراجل اللي بيحاسب بيسأل دا تمنه في مصر نص تمنه هنا ؟؟؟ قولتله لا هي نفس القيمه بعد التحويل من دينار ليبي لجنيه مصري ... اللي واقف معاه عالكاشير مصري قال مصر ارخص من هنا ياعم .... قولتله خليك انت عايش في الوهم وهي نفس القيمه مافيش فرق ..... وبيني وبين نفسي بقول يمكن ارخص كمان لان هنا مافيش ضريبة مبيعات

رامي واحد صاحبي اللي كان بيجادلني في موضوع عادل امام طلع قالي لا مصر ارخص من هنا .... رد اللي بيحاسب وهو ليبي قال اه والعيش في كل حته .... جمله مليانه سخريه وتحزن والله .... خرجنا من المحل وصاحبي بيقولي انت بتقول كده بتدي انطباع سيء عن بلدك قولتله انطباع سيء عشان علبة العصير هنا هي نفس التمن في مصر ؟؟؟ تاني حاجه مصر مش جنه يعني زي ما انت متخيل قالي لا جنه قولتله ولما هي جنه سيبتها واتغربت ليه هي لو جنه مش هتلاقي في دولة زي ليبيا عدد المصريين اكتر من السكان الاصليين ( ليبيا تعدادها 5 مليون ونص والمصريين تعدادهم هنا 6 مليون و200 الف )

طلع أبو طه ( صاحبنا معانا ) يقول لا انا طالع اتفسح ... قولتلهم خلاص انا اللي كنت شحات في بلدنا وطالع ادور على لقمة العيش بره .... ولأن ليا باع طويل في الغربة والمرمطه بره مصر افتكرت ايام السودان وايام الغربه فيها وافتكرت المصريين هناك لما كانوا بردو بيقولوا نفس الكلام ... وانا مكنتش بجادلهم كده انا كنت بقول نفس الكلام بتاعهم ان مصر جنة الله في الأرض

طلع رامي يقولي اهم من ان بلدنا زفت اننا مننشرش غسيلنا الوسخ ... قولتله ومين قالك انه مش منشور احنا اكتر دوله عربيه طالع منها قنوات فضائيه والبرامج بتاعتها بسم الله ما شاء الله فضحانا ليل ونهار قالي ماحنا لازم نسكت ومنقولش كده .... ضحكت وقولتله انت بالظبط زي اللي يعرف واحد عنده سرطان وبتقوله اوعى تقول اه عشان الناس متعرفش بدل ما تكتم الآه بتاعته وديه مستشفى للسرطان

الكل ضحك وبدأنا نتكلم عن الشغل اللي هيبدأ وانا بافتكر نكته ظريفه اوي

3 دخلوا كهف مصري وامريكي وصومالي ناموا 300 سنه وصحيوا الامريكي راح بلده فتح التلفزيون لقى المذيعه بتقول ستقاوم القوات الامريكيه القوات الصوماليه المحتله حتى اخر جندي لديها

والصومالي فتح التلفزيون لقى المذيع بيقول اجتاحت القوات الصوماليه ولاية نيو جيرسي واحتلت كل نقاطها الحصينه

اما المصري فتح التلفزيون فلقى اوبريت اخترناه وبيعناه علشان كده احنا اخترناه

عين في الجنه وعين في النار يا مصريين .... عين في حب مصر وعين في كره وضعها .... وبين دا ودا الحب كده على رأي ام كلثوم .... مش عايزين تتكلموا عشان لو اتكلمتوا هيبان حال بلدكم فبتقبلوا بالوضع الحالي حتى تتفاخروا بما ليس فيكم

وعندكم قدرة رائعه على نسيان اي حد يسيء لكم وصبورين اوي على كل قرف موجود ما بينكم ( ايام ما كنت في السودان واحد سوداني بيقولي الشعب المصري شعب مسالم بطبعه 500 سنه صابرين على العثمانيين والاتراك )

وأهو كله كلام