يوميات مواطن مخنوق (2)

أحب أطمن كل مواطن مخنوق في مصر المنحوسة - اللي عايز يزود نقطة تحت حرف الحاء يزود أنا سامح له - أن احنا تحت قيادة الحزب الوثني الديمو كوراتي خلاص اتضحت لنا الصورة بتاعة الأيام الجاية وان حبيب الملايين القادم ابن حبيب الملايين الحالي قالها واضحه صريحه لكل نفر في الشعب ان توزيع غير عادل للثروة أفضل بكتير من توزيع عادل للبؤس وان انتوا يا شعب يا معفن تحمدوا ربنا وتبوسوا ايد سيدكم جيمي انه هو وباباه مستحملكم في البلد وان هو اختار ناس نضيشفه من الشعب عشان يعمل ما بينهم هما توزيع عادل للثروة اما الناس اللي مش نضيشفة فدي هتاخد بالجزمة فوق دماغها لو اتكلمت أو فتحت بقها .

كمان الراجل الله يعمر بيته ويكرمه طمن كل الشباب وقالهم ان البطالة زادت في الفترة الاخيرة وهاتزيد أكتر وعلى رأي محمد صبحي اللي جاي أسود يعني كل شاب يشوف مصلحته ويطلع السبوبة اللي يقدر عليها من اي حته ومتخافوش مش هانمسك اللي بيتاجروا في البانجو او الحشيش او النشالين او حتى اللي مأجرين شقق ومدورينها للمزاج والكيف ... احنا هانمسك بس كل اللي يحترم نفسه ويصلي ويروح الجامع او يفكر بس يسيب دقنه تطول ازيد من اسبوعين لان جيمي الله يكرمه من احساسه بالمسئوليه تجاه البلد خلى اخوه يدخل شريك في مصنع أمواس ومن هذا المنطلق فلازم على كل نفر في الشعب يحلق دقنه والستات هي كمان تحلق دقنها .

ولازم يا شعب يا هلفوت تفهم حاجه مهمة ان كل اللي بيعمله عمكم جيمي دا ابن كبيرنا وتاج راسنا مش جاي من فراغ ... الراجل دا متربي على ايد العالم الامريكان وراجل دارس ومتنور في جامعتهم واشتغل في بنوكهم يعني مافيش هلفوت من هلافيت البلد هايعرف يفكر زيه ولا هايعرف يرسم للبلد دي الطريق اللي هتخرب بيه بسرعه غيره ربنا يعمر بيته

وحذاري يا هلافيت حد فيكم يفكر يعارض والا هايكون جزائه زي ايمن نور ويولعوا في قصته ويحرقولوا الشعرتين اللي بيهفوا فوق راسه

وتخلي بالك يا هلفوت منك ليه ان وزير الثقافة - اللي هو مايعرفش الفرق بين كتاب التاريخ من الورق اللي بيتعمل قراطيس ويتحط فيه كسكسي - قدم اعتذار لكل يهودي وانه لا هايحرق كتب ولا نيلة وهايشتم تاني في المحجبات ولو كلب اتكلم هانولع فيه بجاز والحكومة هاتمسك الشعب بقبضة من حديد عز عشان عز يكسب بردو

والحكومة غصب عن عين الشعب هاتدي شركات اسرائيلية حق النخورة في سينا عن البترول واللي هايفتح بقه هانحطله في بقه الجزمة القديمة واللي له شوق في حاجه يورينا نفسه

وسمعني أحلى سلام

وأهو كله كلام

يوميات مواطن مبض .... خليها مخنوق

مواطن مصري ...... كان نفسي اقول الكلمة اللي في نفسي عشان أوصفه ورغم أن الكلمة دي بقت على لسان كل الناس ولاد وبنات الا انها لازالت في عرفنا كلمة قبيحة رغم انتقالها من جهة القباحة إلى جهة الوصف الأمثل لمعظم فئات الشعب المصري بمعظم فئاته ولكن يمكن استعواضها بكلمة مخنوق رغم ان كلمة مخنوق مجرد تعبير بسيط جدا وضئيل مقارنة بالحال الذي وصل إليه المصريين من حالة توهان وضغط وخنقة وقرف واشمئزاز واستياء واشمئناط كمان

مواطن مصري بسيط من الناس اللي بتقعد عالقهوة في باب الشعرية ... او قهوة حتى في شارع البوسته في الزقازيق .... متلطم بين كلام الحكومة الوردي اللي يحسسك ان مصر ام الدنيا .... وبين كلام الناس بتوع المعارضة اللي يحسسوك ان مصر ماينفعش نقول عليها مصر المحروسة ممكن نقول عليها مصر المهروسة او المفروسة او المنحوسة واحيانا في ناس بتزود نقطة في كلمة المنحوسة تحت حرف الحاء وناس بتقول عليها مصر الموكوسة المهم انها من وجهة نظر المعارضة كل دول .... ومن وجهة نظر الحكومة هي المحروسة طيب هي مين 

دا السؤال اللي تايه فيه مواطننا الغلبان .... تايه توهان مالوش مثيل حوله إلى مواطن ..... قولنا نمشيها مخنوق 

مواطن يفتح التلفزيون يلاقي برنامج العاشرة مساءا ومنى الشاذلي جايبه له حلقه عن حفياء وجوزها الاهبل اللي دفع 20 مليون جنية في جوازته بيها  (نيله عليه وعلى ملايينه الهبله )  .... ويقلب على قناة الحياة يلاقي لبنى عسل بتكلمه عن اقباط المهجر اللي بيقولوا ان الخنازير بتندبح اضطهادا في مسيحيي مصر ( مش عارف اقباط المهجر بيعتبروا الخنازير قرايبهم ولا ايه ؟ ) 

وياخد وصلة دش ب 15 جنية في الشهر من الواد محسن دش عشان يشوف الأوربت ويلاقي عمرو دباديب بيكلمة على أغنية لازم يقف هو والاصلع المتصابي الل حاطط باروكة 

ولا 90 دقيقه اللي بيجيب موظفين نفسي افهم ازاي عايشين بمرتباتهم في مصر واللي يقول انا مدرس بقبض 300 جنية وعايش ومبسوط ومبديش دروس خصوصية 

مع ان المواطن المخنوق بيقبض 600 جنية ومبيكفيهوش عيش حاف فبيضطر يشتغل على تاكسي بعد الشغل .... ويشتري جريدة الدستور بجوز جنيهات عشان يلاقي صحفي الله اعلم ولا صحفيه باسم حميده ( والله انا قريته في الاول حميده زي علي حميده ) وبعد كده واحد صاحبي قالي دي واحده اسمها حميده وقال ايه مش عاجبها كلام الشيخ محمد حسان 

كل الدوامة دي تايه فيها المواطن المخنوق هانتفرج عليه ونشوف ايامه عاملة ازاي 

وأهو كله كلام 

على هامش الموضوع شوفوا الصور دي

أضغط تشوف الصورة

اضغط هنا كمان 

عقبال جدو

وانا عيل في ثانوي قريت مسرحية لمؤلف مسرحي اسمه كرم النجار اسمها البرواز المسرحية دي فيها شبه كبير من مسرحية سكة السلامة .... المهم المسرحية دي كان فيها جملة حلوة اوي اللي هي البرواز كانت بتتقال على لسان واحد في المسرحية اسمه شفيق أفندي كان بيقول ايه 

( كلب الباشا مات مشيت وراه كل البلد .... الباشا نفسه مات ممشيش وراه ولا كلب ) 

حاشا لله أن يكون انسان أي انسان ... شاب او راجل أو طفل كان أن يكون شبيه بالكلب بس الجملة معبره اوي .. لا والجملة كل ساعه عمالة تتأكد في دماغي بداية من امبارح لحد ما انا بكتب أهو .... قاعد لا بيا ولا عليا باتفرج على فيلم ابيض واسود من الافلام العتيقة دي ... أصل انا عقبال عندكم أجازة في أم الدنيا وإذ فجأة الارسال انقطع .... وكل القنوات مارشات عسكرية وقرآن ...مش كل القنوات هي قنوات بعينها حتى وان ظهرت في مظهر اللي بيدافع عن حقوق المصريين المهضومة لكنها في لحظة باعت القضية وبدأت مرحلة الحكاكة ... وكل قناة معلقة شريط اسود ومنزلة تتر العزاء .... والعزاء واجب 

كل دا انا معنديش عليه أي اعتراض يعزوا زي ما هما عايزين ... جه برنامج البيت عمره ما كان بيتك اللي بيجيب حاجات تحسسك انك عايش في امريكا ... المهم مذيع من مذيعي البرنامج قال جملة غريبة ... قال واحد من الأسره المصرية فقدناه لازم نتكاتف في الاحزان ... بجد ضحكت بهبل ... بقى يابن ...... واحد من الاسره المصرية راح لازم نتكاتف ولما العبارة غرقت مكانوش من الاسرة المصرية ؟؟؟

لما الصخرة وقعت على الناس في الدويقة وماتوا مكانوش من الاسرة المصرية ؟؟؟

لما القطارين دخلوا في بعض في قليوب وخلفوا وراهم اكتر من 58 قتيل و 144 جريح ودي تعد من الحوادث الاخيرة وسيبنا من اللي قبلها  اللي ماتوا دول مش من الأسره المصرية ؟؟؟

تقريبا هو بيتكلم عن أسره مافيهاش العالم دول 

أسره لا انا ولا اللي بيقرا منها .... اسره هاي لايف كده ( عقبال جدو ) لما يبقى من الهاي لايف 

أسره بتصحى من النوم والشمس بتروح أو حتى لو صحيوا بدري فهما صاحيين عشان يجروا في التراك او ياخدوا غطس في حمام السباحة 

أسره بتفطر كافيار بعيش توست وفي ملايين مش  عارفين يجيبوا الرغيف ابو خمس قروش ... وفي ناس بتقطع من جسمها عشان تجيب رغيف العيش اللي بيوصل في بعض المناطق سعره لنص جنيه مصري يعني لو واحد عنده عيلين وهو ومراته عشان يفطر بس عايز عيش ب 5 جنية 

اسره مبتاكلش لحمة عشان اللحمة بتجيب كوليسترول مش عشان كيلو اللحمة ب 45 جنية ولو كالتها بتاكلها في حفلات الباربيكيو او بتاكلها باردة كمزة للمشروبات الخاصة بهم 

أسره معندهاش مشكلة مع سعر الاسمنت ولا سعر الحديد ولا بتدور على شقة ولا بتحفى على شغل 

أسره بتتجوز وتدفع مهور بالملايين 

بينما في ناس تانيه مش لاقيه حتى تمن أوضة النوم 

الأسرة دي هي دي اللي لازم تتكاتف 

واحد صاحبي نفسه يشوف جده من الناس اللي بيتعملهم خارجة من عمر مكرم 

فعشان كده بقوله ( عقبال جدو ) 

واهو كله كلام

عالم وعالمة (3)

استكمالا لدور العلم في بلدنا قررت وزارة التعليم الواطي ... اسف التعليم العالي انشاء معهد للرقص الشرقي اللي هو الهشك بشك لا وزيادة على ذلك قررت الوزارة ادراج المعهد بحيث يصبح تابع لكليات الفنون يعني ببساطة داخل ضمن التنسيق بتاع الثانوية العايمة وأعذروني شكل لساني هايبقى طويل اوي المرة دي

احنا هانعقد مقارنة ظريفة بين الكليات اللي بتخرج شباب وشابات بيحملوا درجة بكالريوس وليسانس وبين المعهد العظيم اللي قررت الوزارة تنشأه بادئ ذي بدء أنا اقتنعت ان البكالريوس اللي معايا يادوبك أمسح بيه ........ ايدي بعد الحمام .... بعد سنين المرمطة والمحاضرات والجلوس قدام دكتور يسوى ودكتور ميسواش عشان نفهم اللي مش عارفين نفهمه

ومشروع معهد الرقص يعد مشروع رائد ومتفرد وجديد فمصر بهذا المعهد ستعد من الدول الرائده في تخريج فتيات الليل والراقصات حاملات ..... شهادات جامعيه

ومن أهم مزايا معهد الرقص الشرقي انه مع ارتفاع الاقبال عليه وارتفاع طلبه لنسبة مئوية عاليه في الثانوية العايمة سيكون هناك مقياس آخر للقبول فيه فمع سهر الليالي .... في المذاكرة اكيد عشان يوصلوا لدرجاته لازم كل طالبه تكون من النوع المتين اللي متنقي على الفرازة

واكيد هايكون فيه كشف هيئة مماثل تماما للكشف الصحي في كلية الشرطة يعني لازم يكون يادوب بالاندر ورور ... وتكون اللجنة مكونة من 4 رجالة حلوين وشداد كده يعرفوا يختبروا البنية واهم حاجه ان اللجنة مايكونش فيها نسوان لانكم عارفين النسوان وغيرتهم من بعض وبيحقدوا على بعض أد ايه .... الامر اللي معناه ان الواسطه هتتلغي في بلدنا انطلاقا من معهد هز يا وز لأن المعهد لن يقبل بأقل من المواصفات القياسية للتظبيط

ورغم ان اللجنة هاتكون في البداية من الرجال فقط ولكن اللجنة دي بس للتظبيط .... اسف للترشيح يعني هايرشحوا اللي هاتقبل وبس لكن المعهد بالكامل مش هايدخله رجالة وبكده يقدر الاخوان المسلمين وكل دعاة عدم الاختلاط انهم يفرحوا ويعتبروا معهد هزة ونص هو أول من أقر ما دعوا اليه من عدم اختلاط بين الشباب والشابات

كمان كده ننام واحنا متطمنين ان في جيل صاعد واعد هيشتغل بعد ما يتخرج على طول .... مش بعيد الجيل المتظبط دا يشتغل من قبل ما يتخرج

لان اكيد كل الخبرات المطلوبة في العمل متوافرة من ليونة وميوعه ودلع الامر اللي هايخلي البنات دي من غير ما تلف على كعوب رجليها زي حملة ورق الحمام اقصد بكالريوسات التجارة وليسانس الحقوق لا دا الشغل هايجيلها لحد عندها دا مش بعيد تلاقي الشغل واقف بالعربية على باب المعهد

كمان مش هانسمع عن دكتور جامعه بيتحرش بطالبة لاننا اتفقنا من الاول ان مافيش رجالة دا هيئة التدريس هتكون هيئة رفيعة المستوى فالدكتورة دينا أعربت عن رغبتها الشديدة في التدريس في هذا المعهد

وانتوا عارفين ان دينا خبرة مش هاتعلمهم الهز في الكباريهات وبس لا دي هاتعلمهم كمان الهز في احضان ابو الفتوح وأمثاله وازاي تهزه صح وتطلع منه احلى سبوبة

وفيفي عبده هاتعلمهم ازاي يحفظوا نفسهم من العين ويوزوعوا لبان سحري وفياجرا على الغلابة من الشباب المترمي على نواصي الحياة من غير شغل ولا جواز

كمان مش هانسمع عن حد باع الامتحان لان الامتحانات هاتبقى عملي وعلى عينك يا تاجر وهايكون شعار المعهد وسطي بيوجعني من هز امبارح

كمان المعهد هايفتح بيوت كتير .... اتقفلت في شارع محمد علي وهانسمع تاني عن الدكتورة سنية الكلوباتيه ... والمعيدة ألوظ وكتير من الشباب اللي مش باين له نوع ذكر من أنثى هيلاقي شغل وسط حاملات الشهادة الجامعية من معهد رقصني على واحده ونص وخصوصا ان النوع دا كبيره ينظم المرور مافيش خوف منه .... يعني مش هانسمع عن حد منهم حاول يعتدي على سته وتاج راسه وهي نايمه في سريرها .... وكمان هانتطمن على الشباب دول لانهم بيعرفوا يمسكوا الفوطة كويس

فوق كل دا هانتطمن أكتر لما وزارة التربية والتعليم تستعين بواحدة من خريجات هذا المعهد في فرفشة الشباب التعبان في المدارس الخاصة وبكده هانكسر عين المحامي اللمض اللي عمال ينط لكل عالمة من دول ويرفع عليها قضية وبكده مش هايقدر يرفع قضايا تاني لان الموضوع تحت اشراف وزارات التربيه والتعليم واشراف التعليم العالي

كمان هايبقى في نقابة لاصحاب تلك المهنة الشاقة اللي بيشقوا طول الليل يا عيني على لقمة عيشهم وبيجيبوها من عرق .... جبينهم عشان تطالب بحقوقهم المهضومة ويطالبوا بزيادة أجر الليلة ولازم تحدد النقابة أن قدرة العالمة في الليلة 150 زبون في الصالة وزبونين 2 بس في مكان تاني

كمان هانكون متطمنين ان العلم الجديد دا هانقدر نصدره لدول المنطقة اللي مبيعرفوش يرقصوا بلدي ولا حتى افرنجي وهانعلمهم وننورهم

كل المزايا دي موجوده في معهد الرقص ... وييجي عضو مجلس شعب يعترض

ياعم حرام عليك سيب النسوان تسترزق

وأهو كله كلام

وان كنت ناسي .... أفكرك

بالتأكيد مش هاتكلم عن أغنية ام كلثوم أو حتى هاتكلم على الاغاني عموما .. الموضوع برمته ان في ناس كتير نسيت حاجات أكتر فمن باب التذكير المهذب الخالي من أي سب أو بجاحه أو طولة لسان هانفكرهم ونذكرهم 

وقبل ما نذكرهم هانقول مثل ونحكي قصه ... أما المثل فالمثل دا اتردد فترة طويلة على لسان شخص ما ايام ما كنت في الكلية وهو ان الانسان دائما يرى الآخرين بعين طبعه وبمعنى آخر عشان الناس اللي مبتحبش العربي يعني البني آدم دايما بيشوف الناس بناءا على طباعه الشخصية هو

 

اما القصة فهي قصة حصلت لي فعليا ايام ما كنت في السودان وان وجدت بعدها انها قصة متداولة يستشهد بها من أجل مواضيع كثيره 

فأيام العمل بالسودان ( وللعلم شعب السودان شعب مثقف فوق العادة ) اتعرفت على جار لي عجوز طيب الملامح والحديث تشعر معه بسرور الدنيا لمجرد المحادثة كان اسمه الحاج ابراهيم الميرغني ... المهم في يوم روحت اسلم عليه قبل ما ارجع بلدنا واسيب السودان

 

الراجل سلم واستقبلني بحفاوة وكرم وطيبة السودان وأهلها وقالي ( عندنا ونسة الليلة ناس بتيجي انت ماتعرفهم ما تتكلم معاهم وما تعترض على حديثى لمن أنتهي منه ) الكلام محتاج ترجمة ؟؟؟ طيب كويس بقيتوا بتفهموا لغات أهو

  

جت الناس كان فيهم مجموعة شباب راجعين طازة من أم الدنيا وسأل واحد فيهم ( مصر كيف ؟ ) الكلمة بمعناها احكيلنا عن مصر الأولاني بدأ يقول عن مصر ما في الخمر ( مانكرش اني  بيني وبين نفسي معترف ان اللي قاله موجود فعلا بس مش هي دي بلدنا)

  

ياخي مصر دي والله بلد عجيبة كيف ما تعرف خمرة تنباع حتى في المطار ونسوان عرايا ... ياخي والله مصر دي اللي يدخلها وما يرتكب معاصي كأنه جاهد في سبيل الله 

 

الشيخ ابراهيم قاله صح والله مصحوبة بحركة مشهورة شبه الكلمة اللي كان عايز يكتبها اسماعيل ياسين وعبد الفتاح القصري والخواجه بيجو بس بتطلق مرة واحده معناها كلامك تمام - قبل ما نكمل القصة معلومة صغيرة السودانيين محاورين رائعين وعندهم فن الاستماع بشكل يبهر

 

 والتفت الشيخ ابراهيم لواحد تاني وسأل نفس السؤال ( مصر كيف ؟ ) وايده بتحط كوباية الشاي أبو قرنفل الجبار

 

الشخص التاني اول ما بدأ قال : والله يا شيخنا مصر دي بلد مبالغة لمن بهناي ( ننزل بالترجمه ... أي انها بلد فوق الوصف من روعتها ) ما لقيت شارع إلا وفيهو مسجد ( حرف الواو مش خطأ مطبعي اللفظ مكتوب كما ينطق ) ولمن تدخل مسجد تحس أن مصر كلها تصلي ولمن تخرج منه تحس ان مصر كلها ما بتصلي

  

يازول بلد الامام الغزالي وشيوخ لا حصر لهم بلد تتعبد ليل ونهار والله بلد مبالغة لمن بهناي ( ترجمناها قبل كده )

  

نفس الرد بالظبط رد بيه الشيخ ابراهيم وقاله صح والله

  

انا طبعا قاعد بهري عايز ارد على بتاع الخمرة دا اللي ساب من مصر كل حاجه ومسك في الخمرة اللي في السوق الحرة اللي في المطار

  

وخلاص مش قادر عايز ادافع يا خلق عن بلدي فسألت الشيخ ابراهيم ازاي صح والله على كلام الاتنين ؟ دا كلام ميركبش عقل يا شيخنا

  

ابتسم ابتسامه تظهر اسنان تشع بياض ونضافة وهو بيقولي يا ولدي كل واحد بيشوف طبع نفسه واللي داير يشوفه ( داير = عايز ) بالتأكيد وبكل تأكيد بعد الكلمتين دول مبقاش عندي رد أنا قعدت وحطيت رجل على رجل وانجعصت وشديت شفطة من الشاي مليانة شماته في بتاع خمرة المطار دا

  

خلصنا القصة

 

نبدأ بقى مرحلة التذكير للناس اللي نسيت بدون تجريح أو اهانات....  التذكير في بالي من زمان لكن تأكد  في بالي واني لازم اكتبه من بعد اغنية سمعتها من مجموعة شباب خليجي وان كنت عارف الجنسية بتاعتهم وهما بيسبوا في مصر وشعبها هو مكانش سب ...  هو كان قذف وبأشنع التهم لدرجة أني والله العظيم وقتها لو كنت شفت حد فيهم والله ما كنت سبته الا وهو متقطع

 

وأعتبرت كلامهم لعب عيال صغيرة لأن بالتأكيد بلدهم فيها من المحترمين كتير ولكن السلسلة كانت كبيرة من التذكر لكل الاهانات التي توجه للمصرين في مختلف أنحاء الوطن العربي ونخلي بالنا من كلمة الوطن العربي دي  ... يعني مافيش اهانات الا في الوطن العربي لأن اهانات الغرب موجهه ضد العرب بكل صورهم اما اهانات العرب فهي موجهه بالأخص للمصريين وبقول بالبنط العريض

مش كل العرب

 

ولكن تذكرت أمر مهم جدا .... أيام ما كنا بندرس الدين واحنا صغيرين وندرس  أسباب هجرة الرسول صلوات الله عليه كان من ضمن الأسباب ازدياد إيذاء المشركين له صلوات الله عليه وخصوصا بعد وفاة السيدة خديجة رضي الله عنها وعم الرسول واللذان كانا يعدان السند له أمام طغيان قريش وكانا سندا له بناءا على قوة نسبهم بين قريش كما أن الرسول صلوات الله عليه أمر صحابته من المستضعفين بالهجرة إلى الحبشة لأنهم مستضعفين ليس لهم من يقوي شوكتهم بين سادة قريش بينما من كانوا ذوو مكانة بينهم فلم يهاجروا الا بعد هجرة الرسول

والرسول منزه عن أي تشبيه أو مقارنة ولكن فقط فكرة السند هي ما سأستشهد بها

نتخيل كده تخيل بس - أؤكد لكم انه مجرد تخيل – نتخيل لو أن حكومتنا مثلا مثل حكومة الولايات المتحده الأمريكة من حيث الدفاع عن حقوق مواطنيها داخل وخارج البلاد فماذا كان سيحدث

مكانتش دولة عربية أو غير عربية فكرت للحظة في انها تهين طبيب مصري أو عامل مصري أو مدرس مصري أو مهندس مصري

هو  كل الوظايف دي بيعمل فيها المصريين خارج بلادهم ؟؟؟ اكيد ... طب واهل البلد فين ؟؟؟

أهل هذه البلاد أصحاب مرض العنطزة ... العنطزة الفارغه لا يجيدون إلا الاهانة والتعالي والنظر لباقي الشعوب على انهم شعوب درجة تانيه وبالأخص المصري الملعون لأنه هو اللي علمهم وبنى لهم وعالجهم ولأنه عمل كل دا فعقد النقص الطافحة المستفحلة ظهرت عند مجموعة من هؤلاء المرضى الذين يعانون من عقدة النقص والفراغ بل واستبدلوا كل شيء في عقولهم وأفرغوها حتى أصبحت مثل سلة المهملات الفارغة وملئوها بتعفنات الحقد والكراهيه والنقص ضد المصريين  ... وبرجع أأكد وأقول مجموعة وليس الكل

أهل هذه البلاد نسوا أن الله من على المسلمين بفتح مصر وتناسوا أن أهلها خير أجناد الأرض

إنه كلما وجهت اهانة لمصري شعرت أمامها بفخر لا مثيل له فالبشر لا يهينون من هو أقل منهم شأنا فنحن لا نلتفت إلى من هم أقل منا ولكننا دوما نحاول التقليل من شأن من هو أعلى منا شأن

بس نرجع ونقول اللي يهين مراته قدام الناس العيال يلعبوا بيها الكورة ... واحنا  حكومتنا والله ما قصرت فبدون الدخول في السياسه كل ما يحدث لنا على يد حكومتنا مالي الفضائيات وملعلع فيها

عايزين الناس دي تعمل معانا ايه تضرب لنا تعظيم سلام ... بالتأكيد مش هايبقوا أحن علينا من حكومتنا

إلى  كل عربي رجاءا افصل الحكومة عن الشعب وانظر للشعب وانت تعرف معدن الشعوب

وأهو كله كلام

كل واحد يشوف مصلحته

النهاردة يا جماعة عيد ميلاد الرئيس محمد حسني مبارك ثاني أكثر قادة العرب تعميرا في الحكم ... باعتبار الحكم حجر معسل ... ورئيسنا أيضا هو الثاني في أطول فترة حكم في تاريخ مصر الحديث بعد محمد علي مؤسس الدولة المصرية الحديثة ويعد الرابع في إجمالي تاريخ مصر بعد أثنين من العصر الفرعوني ومحمد علي

ورغم ان رئيسنا لم يكن هو الأول في كونه أكثر الحكام بقاءا على كرسي الرياسة أو حكم البلاد إلا انه قرب لها متقلقوش محمد علي حكم 40 سنة بس يعني هانت كلها 10 سنين ربنا يديله طولة العمر ويمده بالصحة على حساب اللي جابونا

واحنا مش هانتكلم عن طول فترة حكم الرئيس فرمسيس الثاني حكم مصر حوالي 76 سنة وكانت مصر في عهدة أقوى دول المنطقة وأمتد سلطانها على نصف طول ساحل المتوسط غربا وحتى سوريا شرقا وجنوبا وصلت إلى منابع النيل فطول الحكم من قصره مش مهم

لكن احنا هانتكلم عن من يعملون في الحكومة تحت ايد الريس وخصوصا بتوع اليومين دول

السادة الوزرا المتظبطين ... اللي ظبطوا المصريين ومخلوش مصري بره البلد أو جوه البلد الا وعلى افاه وافا اللي جابوه ادوه

هانبدا بخبر قديم حبتين مش قديم أوي هو خبر من يوم 24 أبريل ... خرجت علينا عجوز شمطاء تسمى وزيرة الدولة لشئون الأسرة والسكان تقول انها بتؤيد منع تعدد الزوجات .... يا ست ربنا يبارك في اللي آنيكي ( معنى آنيكي يعني اللي هي في بيته ) يستاهل الحرق بالجاز لأنه معرفش يلم لسانك

أصبحت تلك الشمطاء تؤيد ولا تؤيد أحكام الله سبحانه وتعالى في دولة كانت ... وحطوا خطين تحت كانت دي ... كانت رسميا هي منارة الاسلام لكل العرب واليوم هي المنارة الغير رسمية بما فيها من علماء أجلاء أستحي حقا ذكر اسمائهم بين أسماء هؤلاء ال ...... وحطوا اللي تحبيه

فالست مشيرة خطاب أم شعر كاريه بتقول ان القرآن قال ولن تعدلوا وذلك لصعوبة الجمع بين زوجتين في آن واحد

انا بس هاعرض عليها مشكلة واحده بما انها الست الوزيرة وهي تحلها

يا ست الوزيرة ربنا كرمك وبقيتي وزيرة السكان في دولة أم ترتر ودي دولة شقيقة جنبنا هنا وعندك في دولة أم ترتر 100 راجل و 250 أنثى وهانقول ان مافيش تعدد والراجل غصب عن عين اللي جابوه يتجوز واحده بس

اصبح عندك 150 انثى بدون زواج وبدون مكابرة النساء الفارغه فالأنثى في حاجة لرجل مهما قالت عكس ذلك

طيب ال 150 دول قدامهم 3 حلول

1- انهم يعتصموا في منازلهن حتى فرج قريب برجاله من دولة أم حرحر اللي جنب دولة أم ترتر ومش لاقيين نسوان في بلادهم فييجوا يشيلوا الفايض في دولة ام ترتر مع العلم ان كل دول العالم بداية بماما أميركا وحتى دولتي أم ترتر وأم حرحر فيهم فائض نسائي رهيب

2- ال 150 حرمة يقلبوها مردغة وكل واحده تهبط على اي راجل وتعيش حياتها معاه لاشباع ما في نفسها من رغبات خلقها بها الله من غير جواز ولا نيلة وتبقى العملية سداح مداح

3- ان الرجالة اللي في البلد دول يهتدوا بالله عز وجل ويتجوزوا اكتر من واحده فميبقاش في عنوسة في البلد

أي الحلول أسلم وأسمى وأرقى وأطهر يا ست الوزيرة

بالتأكيد الست مشيرة خطاب هي عينة من عينة النسوان المهاريش أمثال نوال السعدواي في مصر وأمال موسى في تونس وفاطمة سعد الدين في السودان وغيرهن من أنصار الحركة الشعبية لتحرير النسوان في مختلف أنحاء الوطن العربي ... بالله عليكم كيف يكون لنا وزيرة تجادل الدين

أما الوزير الثاني فهو وزير التنمية الإدارية واخدين بالكم من اسم وزارته ... التنمية الإدارية ... يعني تنمية في مجال الإدارة

نتخيل مثلا مدير طلع الصبح على الموظفين بتوعه وقالهم مافيش مرتبات وكل واحد يشوف مصلحته .... زي ما الوزير أحمد درويش قال ... هما بيقولوا عليه دكتور ... شكله دكتور في حتى .... حتى مطلع الفجر

لما هو كل عامل متعين بعقد مؤقت يشوف مصلحته ... فبالتأكيد مصلحته انه يلحق ياخد اي حاجه ويجري قبل ما الفتة تخلص والمولد ينفض

كيف لمصدر مسطول .... اسف كيف لمصدر مسئول يخرج على مجتمع به من البطالة والعطاله ما يكفيه ليقول له كل واحد يشوف مصلحته ... اذا كان اللي بره البلد ومتغربين متلطمين ومتبهدلين طب حتى الحقوا اللي جوه لان البلاد التانيه زهئت مننا ... البلاد التانيه اتخنقت خلاص من كترنا فيها الحقوا الحبة اللي فاضلين

نيجي بقى لوزير خارجيتنا حبيبنا الحاج احمد ابو الغيط اللي جاعد على بوابة بلدنا يسلم على اللي رايح واللي جاي .. وعيال بلده متبهديلن في كل حته

لما طلع القضاء السعودي بالحكم بتاع 1000 جلده لكل طبيب مصري دا كان أحمد ابو الغيط بيقول انه هايهد الدنيا من أجل هؤلاء الاطباء وانه متابع الموضوع هو ووزيرة القوى العامية ... اسف القوى العاملة

وفي يوم وليلة كل الجرائد والمواقع الرسمية والغير رسمية المصرية والغير مصرية توقفت عن نشر أي خبر عن ذلك الموضوع ... النهاردة لمجرد ان في واحد سعودي شهد وحده انه رأى عامل مصري وعامل هندي في نفس المكان مع عاملة اندونيسية الامر الذي يجعلهم في حالة خلوة غير شرعيه فاتحكم على المصري ب 350 جلدة و7 شهور سجن

بعيدا عن كون الموضوع لا يمت بصلة للشرع ودا موضوع تاني نتكلم فيه بعدين .... فين وزيرنا اللي واخد كرسيه وقاعد على باب بلدنا يكلم الناس اللي جنبنا دول ان الحكم دا فيه من الاجحاف ما ليس في دين

بلاش بتوع السعودية عشان السعوديين دول متعنطزين شويتين وهو وزيرنا نفسه عزيزه مبيبحبش حد يكلمه من طراطيف مناخيره .... طب والكويت ... دويلة لو الصعايده اللي فيها قرروا يحتلوها في يوم بشوية تنظيم هايحتلوها في ساعتين ويطلع علينا صحفي حقير كويتي من فترة يقول ان دية المصري لا تعادل ثمن غسالة كورية الصنع .... الله يرحم ايام ما كنت حافي .... والله يرحم أيام ما صدام علم اللي جابوكوا الادب وجريتوا على مصر تتحاموا فيها وكانت النتيجة ان المصري فعلا ديته لا تعادل ثمن غسالة كورية الصنع

وزير خارجيتنا بايع القضية من زمان وبيكتفي بانه متابع الموضوع شكله متابعه من موقع مصراوي

رجاءا يا سيادة الرئيس في عيد ميلادك اي كان الثمانين او التسعين ربنا يديك الصحة والعافية ... رجاءا حس بينا الله يكرمك

وأهو كله كلام

عالم وعالمة 2

يبدو أن موضوع عالم وعالمة الأول قد أثار حفيظة ناس كتير الأمر الذي أدى إلى نوع من الهجوم مصحوب بالتلطيش الكلامي وطبعا انا مش صح في كل الاحوال ولا هما صح فرأيي دائما خطأ يحتمل الصواب ورأيهم صواب يحتمل الخطأ ولكن هاستأذنكم أرد وبنفس الاسم اللي استفز الناس في موضوع الأول عالم وعالمة  والناس اللي متابعتش الموضوع ممكن تضغط على اسم الموضوع اللي باللون الأحمر وتتابع 

بادئ ذي بدء أقدم جل اعتذاري لخطأي الفادح في أن قلت أن الدكتور أحمد زويل عالم فيزياء  وهو ليس عالم فيزياء بل عالم كيمياء سقط مني الأمر سهوا أو نسيانا أو نقصا في العلم وأعتبر أن هذا هو الخطأ الفادح لي في ذلك الموضوع أجي بقى وأرد على الأخ العزيز والصديق الصدوق الأستاذ أحمد رضوان وفي نفس الوقت سيشمل الرد على الاستاذ محمد ذكي لتشابه أوجه المناقشة في الرد 

أولا : موضوعي لم يكن يهدف لشيء إلا للتعليق على خبر قرأته بأحد مواقع الأخبار التي نعتاد أنا وأنت قرائتها وتبادل الرأي في ما ينشر ذلك الموقع وأسم الموقع ليس بسر فهو الموقع الذي كان محترما في ما ينشر من قبل مصراوي وبالتالي فلم يكن الموضوع موضوعا ذو هدف إلا تعقيبا وتعليقا على الخبر وربما كان من الأفضل من وجهة نظر الآخرين أن أعلق على الخبر في الموقع نفسه ولكنني أنأى بنفسي على التعليق في مصراوي نتيجة لما ارى من إهدار كرامة اللغة العربية والدين الإسلامي في ردود كل من منّ الله عليه بوصلة نت عشان يقرفنا احنا بردود ساذجة وأحاديث تتحول إلى قرآن كريم وقرآن تسقط من آياته كلمات وسور تكتب صور وحروف متآكله ... طب أعلق فين غير في مدونتي حبيبتي اللي مبيقرهاش غير أنا وانت وكام واحد من حبايبنا هذا هو الهدف من الموضوع مجرد تعليق

ثانيا : لكل مقام مقال .... لا يجوز الحديث عن الساقطات والراقصات بأسلوب الحديث عن العلماء .. فالعالمة ليها .. زغردي ياللي مانتيش غرمانة .... بينما الحديث عن العلماء لابد أن يكون مهذب وان كان انفعالي جعلني أتحدث بالعامية في معظم الأحوال كما أن ما كتبت يقال بيننا في معظم أحوال المجتمع ان كان في ما يظهر في اعلامنا او غيره كما انني لما اتجاوز الخط الأحمر في الحديث عن العوالم بالبلدي كده مافيش حد في مصر من الناس اللي كانت عايشة ومدركة في الفترة من 1999 و 2000 و 2001 و2002 الا وتعرف قضية حسام ابو الفتوح مع الراقصة دينا بل كانت حديث الصحف القومية والغير قومية أو حتى طبيب الأسنان المشهور 

ثالثا : بما أنك تعرفني حق معرفة كما ذكرت يا أخي العزيز فأنت أعلم الناس أنني لست من هواة متابعة أخبار الغواني والساقطات وأني في الحاجات دي عامل زي الأطرش في الزفة أكيد هاتقولي وازاي عرفت خبر لوسي هارد عليك وأستشهد بيوم ما قولتلك اول ما هاتدخل مصراوي هتلاقي خبر في وشك بيقول عن لوسي انها بتعلن انها هاترقص لحد أخر يوم في عمرها الله يقصف عمرها أي انه خبر في صدر الصفحة بيقول للأعمى اتفرج يا سلام على لوسي اللي هاترقص لحد ما في القبر تنام أي أنني غير متتبع جيد ولا تستهويني هذه الأمور والقراءة بتكون قراءة عناوين وعليك أن تستنتج ما تبقى في الاخبار التافهه اللي اشتهر بيها مصراوي في فترتة الاخيرة 

كمان انت عارف ان هنا مافيش أي أخبار مطبوعه كل الاخبار اللي هنا اليكترونية افتكر كده اخر مرة شوفت فيها جريدة مطبوعه كانت امتى اكيد قبل ما ترجع من الاجازة 

اذن فان كان في تعقيبك على ما كتبت الكثير من الصحة فلا تنكر اخي العزيز ان هناك جزء ولو ضئيل من التحامل او الظلم ليا .... ومقدرش أقولك الا ... يا ظالمني 

تحياتي ليك يا صديقي الصدوق

اما العزيز محمد زكي شاهين فحسسني اني نطقت كفرا وبيقولي انه حس انه بيقرأ جريدة صفراء .... اكيد يا محمد تعرف كتاب شكلها باظت اللي ألفه عمر طاهر .... تقريبا انا سرت في أضيق حدود العامية الصريحة .... فكلمة اللي بدل ما يخلع ضروس بيخلع حاجه تانيه تحتمل ألف تفسير وألف تأويل ثانيا بالنسبة لهدف الموضوع فالموضوع كما قلت في ردي على أحمد رضوان هو مجرد تعقيب في مساحة أملكها خيرا من أن أعقب وسط معاتيه اللغة العربية أو مجانين التعليم ابو بلاش 

تاني حاجه انا مبلومش حد انا بلوم نفسي اني زيي زي كل واحد مصري حاطط لسانة جوا بقه انا او انت او اي حد وساكت واول ما نسمع حد غير مصري بيجيب سيرة مصر بنبقى عايزين نقطع لسانه وسايبين كل حرامي ونصاب وأفاق في الحكومة او براها شغال نهب واحنا عمالين نندب حظنا على الزمن اللي خلانا نتغرب في بلاد لا تعرف من المصريين الا شارع الهرم وفيفي ولوسي .... ودينا عشان منظلمش البنية .. دي بتتعب 

ولو فكرنا في اننا نعمل حاجه مبنفكرش في اننا نطور بل بندعوا الله العلي القدير انه يمنّ علينا بحكومة تنصفنا لكن ماحدش فينا بيفكر ازاي يساعد ويغير اتمنى تكون فهمت قصدي 

اما حزن فانا مش عارف ايه الوضع الجيد اللي ممكن أتكلم عنه هاتكلم عن ايه جيد انا مش شايف أي جيد بصراحة لانه بيتوه وسط زحام الغير جيد كوني متفائل ومبتسم دايما فدا موضوع تاني لكن اتكلم عن الجيد ماظنش 

وبما أننا بنتكلم عن تجاهل العلم عمدا في بلدنا المصون واننا نسير في سكة اللي يروح مايرجعش فانا عايز اذكر حاجه بسيطة كده على هامش الموضوع من يومين كان في الردود على خبر الدكتور أحمد زويل .... واحد حب يرد رد منمق فاتطور واتهور وأضاف الآية رقم 17 من سورة الرعد فحول كلمة جفاء إلى كلمة هباء يبدو ان الكلمة مش على مزاج اهله فعدل بمزاجه لا واللي يفقع المرارة اني كل ما ادخل اروح ابص الاقي التعليق زي ما هو ورديت على الخبر وردي أنا اللي وقف في الزور وماتنشرش مع اني والله التزمت بكل القواعد لكن يبدو ان اللي قاعد على الكنترول لا يحبذ تعديل الآيه هو كمان وعشان متقولوش عليا باتكلم بدون دليل 

الدليل اهو  أضغط تشوف الصورة 

والناس زعلانه لكوني سخرت من ساقطات مصر بصورة لا تليق ياترى هي لا تليق بيهم ولا لا تليق في حال الحديث عليهم 

كان في مسرحية قديمة لمؤلف يسمى كرم النجار كان بيتكلم فيها عن قرية قامت فيها مظاهره كانت المظاهره بيهتفوا فيها ويقولوا 

آه يا بلد هلافيت وغوازي .... بالتأكيد هو مكانش يقصد القرية أكيد كان بيقصد حاجه تانيه 

ناس مش عارفة تكتب عربي وناس مبتكلفش نفسها حتى تتأكد من صحة آيه في كتاب الله وأهم الأخبار عندنا خبر تامر أبو شعر غوريلا وهيفا بنت الهيفا وفريق المكسحين بتاع الكورة 

وعصام اللي هرب ومارجعش والأهلي اللي بيمارس كل أساليب وزارة الداخلية ضد لاعبيه أو حتى ضد اللي يفكر يقول كلمة عليه 

وكله محصل بعضه 

أو كله كلام