تهييس الفضا

كنت أنوي أن أكتب موضوعا أشعرأنه ذات أهميه بإسم أهل وادي النيل ولظروف خاصة قررت أن أؤجل هذا الموضوع إلى أن يشاء الله

لكن اللي جه على دماغي بقى اني بقالي فترة باشتغل نفسي ... فعلا باشتغل نفسي

بدأت الاشتغالة لما أوهمت نفسي وخليتها مقتنعه تماما ان الشغل اللي كنت فيه أصبح غير ملائم ليا .... هو من البداية غير ملائم إشمعنى في اليومين اللي أوهمت نفسي بدا سبت نفسي للاقتناع بالفكرة دي

مش عارف ... بس انا ويمكن لأول مرة في حياتي بأقر وأعترف إني كنت غبي ... وبقولها لأول مرة بالفم المليان فعلا كنت غبي

ساعة مرت عليا وانا قاعد بين كلمة غبي اللي في السطر اللي فات وبين السطر اللي انا فيه دا راجعت فيه كل تاريخي الوظيفي من أول ما فكرت لأول مرة في حياتي اني اكون عضو منتج في المجتمع

قبل ما اكمل كلام ... الموضوع دا مجرد كلام لا يودي ولا يجيب ... حكاوي يمكن فارغه كمان اللي بيمل بسرعه مايكملش

اول مرة اشتغلت فيها فعليا كان عمري 16 سنة كان مع والدي في شركته ... كان ابويا لسه ماقتنعش تماما اني ممكن أكون نافع له أو لاي حد فبدأ شغلي من المخزن

عربيات التوزيع عايزة تتحمل يا احمد ... حاضر يا بابا

شيل الكراتين عدل يابن ال.....حاضر يا بابا

اجازة الصيف كلها تقريبا عدت بالشكل دا ... ما بين تحميل عربيات التوزيع ... وشتيمة حلوة من ابويا عشان اشيل الكراتين مظبوط

ورجعت للدراسه وجه الصيف ورجعت للشغل وفضل الحال بالشكل دا سنتين لحد ما أبويا وثق فيا وخلاني اكون مندوب وكان عندي 18 سنة وكنت بعد ما خلصت اولى كلية تجارة ...

بجد دي كانت بداية اثبات الذات ... جميع الفئات اللي ممكن تتخيلوها اتعاملت معاها ... من بقال بسيط لحد تاجر ممكن ينصب عليا في اي حاجه ان شالله ربع جنية المهم يحس انه كسبان

خلصت كليه ... مش على طول كده ... الكلية اللي بتخلص في 4 سنين خلصتها في 6 ... ليه بقى ... فاضيين ؟ طب كويس

نقول ليه وانا في 3 كلية كنت لسه مصدوم أول صدمة عاتشيفية ... نظام الوسادة الخالية ... وحبيبي دائما وأي حاجه تتخيلوها كنت عايشها في السنة دي وسقطت

ودخلت قسم اقتصاد وكان املي اني اخلص وادرس بعد منه ادارة اعمال ... وهانحكي دا في الاخر

وسبحان الله اذ فجأة اكتشفت اني باحب الاقتصاد جدا لاقيت نفسي بأبدع في القسم دا .. ان كان في المواد العملية او المواد النظرية .. لا والاحلى كمان اني بدأت ادي دروس وانا في 3 كلية حاجه كده على خفيف

دخلت 4 كلية ومن الترم الاول كان عندي 16 طالب كلهم في سنة اولى .... وانا اللي بشرح لهم ... شغل الاجازة موجود مع ابويا مراحش

ويصادف انه كان عندي دكتور ... الله يسهل له مطرح ماهو قاعد ... ابنه مكانش عارف يحل مسأله في التحليل الكلي وانا اعمل فيها دكتور واقوله تعالى وانا احلهالك واحل المسألة لا والاحلى اني اروح كاتب اسمي في اخر الحل

دا كان في الترم الاول من سنة 4 .... خلاص عرفتم انا سقطت في مادته ليه

بدات الترم التاني وانا املي اني انجح صافي فيزودوا درجات الرأفه على مادة الدكتور دا فانجح ... وكان موضوع الدروس دا فتح معايا وكان ليا واحد صاحبي معيد الله يستره كان بيساعدني في انه يديني ملخصات ليلة الامتحان

وبقى عندي بدل 16 طالب 32 طالب .... بقيت زيي زي المعيدين بالظبط

وهووووووووب عندكم مادة سياسات نقدية ياولاد في الترم التاني كان هيدرسها الدكتور جمعه لكن الدكتور جمعه اعتذر واللي هيدرسها الدكتور عارف ..... تمام كده انا شلت المادة دي كمان

ما علينا عشان منطولش في الجامعه شيلني مادته ومادة دكتورة كمان وعدت السنة

وانا بأعيد السنة بطلت موضوع الدروس دا لاني اشتغلت في مركز دورات كمبيوتر وكنت انا اللي بشرح فيه ويندوز وانترنت ... عجبني موضوع الشرح دا اوي وكنت سبت الشغل مع والدي لظروف كتير

اول ما نجحت في الكلية سبت المركز دا على طول بعد سنة ونص شغل فيه ... سبت الشغل وانا كنت لسه ماستقرتش في شغل تاني بس عشان اعرف ادور بمزاج وانا كنت متخيل ان مافيش جيش ولا هم

واشتغلت في شركة تانيه كانت شركة رايه للانترنت اللي هي فودافون دلوقتي بس كنت في فرع الشرقية ... ودخلت الجيش

وبعد الجيش سنتين في السودان وبعد السودان شركة صغننة انا واخويا وبعد الشركة 3 سنين في ليبيا

الخلاصة اني تقريبا بقالي 15 سنة باشتغل ... مريت على وظايف يمكن ملهاش دعوة ببعض ... الخلاصة 10 سنين خبرة في المبيعات

منقسمين بين المواد الغذائية ومابين الكمبيوتر ومشتقاته ومابين التدريس كمان

ولما سبت الشغل وقررت اني ادور على شغل ماعرفش ايه اللي حصل

اول انترفيو ليا كان مع شركة سعودية عايزة مدير مبيعات خبرة في المبيعات 6 سنين .... ساعه ونص انترفيو ... اللي اعرفه ان الانترفيو الناجح بيعدي مدة النص ساعه ومبيزيدش عن الساعه ... ليه ساعه ونص الله اعلم المهم اني قمت وانا مطمئن اني تقريبا من ضمن اللي هايعملوا الانترفيو التاني

ولا عبروني ... ولا حتى ايميل اعتذار

مكنتش واقف عندهم شركة تانيه عايزة بردو مدير مبيعات وبردو في السعودية .... الانترفيو بالظبط كان 25 دقيقة واللي كانوا قبلي كلهم 10 دقايق ... قالولي هانتصل بيك خلال يومين .... ان حد يتصل ولا عبروني

مش مهم ... انا قريت اعلان عن شركة كمبيوتر في المملكة عايزين مدير مبيعات خبرة في مجال الكمبيوتر 4 سنين ... لا مش ممكن دي شغلانة متفصلة

ابعت ياعم ... الو استاذ احمد ... مع حضرتك اامر ... عندك انتر فيو بكرة الساعه 5 ان شاء الله

انترفيو ساعتين مع صاحب الشركة نفسه ... وصل الامر في الانترفيو لانه سألني عن كل حاجه ممكن يسألوا فيها وممكن ميسألوش

مخلاش ... وقالي انا نازل من السعودية مخصوص عشان اعمل انترفيو مع شخصين ... انت وواحد تاني ... وهاستنى منك تبعت لي تصور عن شكل مخطط المبيعات

ابعت يا عم احمد ... استنى التليفون يابو حميد

انه يتصل ماتصلش ... قلت لا انا هاتصل ... اسفين والله الشركة اختارت واحد تاني ... عنده خبرة في المملكة ... شكرا

بعد كل المدة دي وكل الانترفيوهات اللي وصلت ل 8 انترفيو في شهرين بمعدل انترفيو كل اسبوع .... اكتشفت اني كنت باشتغل نفسي

وان الموضوع لا ليه دعوة بخبرة ولا ليه دعوة بشهادات ولا ليه دعوة بكورسات معايا شهادتها

الموضوع كله من اوله لآخره رزق ربنا محدده في مكان وزمان معينين وغير كده اونطة ممكن يكون عامل مساعد .... لكن مش هو الاساس

كل سنة وانتوا طيبين واهو كله كلام