مع نفسك

تحت نيران نت الموبايل اكتب الموضوع الجديد ... وربنا يستر والنت ميفصلش .... لان نت الموبايل دا احد طرق التعذيب في الارض

طبعا الغباء الإبداعي خلصنا منه وعرفناه ودخلنا دلوقتي على غباء تاني وهو الغباء الشخصي .... يعني لما يكون الانسان غبي مع نفسه ودا غباء منتشر جدا جدا في مجتمعنا العربي بالأخص

وخصوصا اننا مجتمعات لا تعمل على تقدير المحيطين بها فتصيب المحيطين بنوع من الغباء الشخصي .... ببساطة اكثر الغباء الشخصي هو عدم فهمك لذاتك وعدم تفهمك لدوافعك النفسيه تجاه البيئة المحيطة او حتى عدم تفهمك لمشاعرك ... ببساطة هو الشعور بالتوهان

تتجلى صورة الغباء الشخصي في عدم الثقة بالنفس ودي اول نقطة تجر خلفها نقاط عديدة فانعدام الثقة بالنفس هو عدم الوثوق في القدرات العقلية والشخصية على انجاز مهام معينة او اي مهمة لدرجة الخوف من النفس بان تخزل صاحبها في المواقف العادية ما بالنا بالمواقف المهيبة .

وانعدام الثقة بيسبب مشكلة اخرى عويصة هي المبالغة في التعبير على الانفعالات وخصوصا الانفعالات الحزينة فنجد في حالة الحزن ان الغبي مع نفسه قد احال حالة الحزن الى حالة سوداوية من الحزن وان هو انسان فاشل وانه خلاص انتهى وانه لا يستطيع فعل اي شيء لنفسه بل ويبالغ في حالة حزنه بترديد كلمات زي يارب اموت .... انا في عذاب مبينتهيش ... هافضل طول عمري في الهم دا ..... وكل دا دليل على انه غبي وغبي جدا كمان

الامر اللي بيخليه يجر وراه التعاسة والاحساس بالفتور الحياتي والكسل والوخم

وتصل بيه الامور الى ان حياته تقذف به حيث تشاء وهو لا يملك من امره شيء مش عشان هو مش قادر يعمل حاجه ... لا ... هو اقنع نفسه انه مش قادر يعمل حاجه فاصبح فعليا غير قادر على فعل اي شيء ويتلمس اللحظات اللي بيكون فيها وسط الناس حتى يستطيع التواري بين الشخصيات من عيون الدنيا ومحاولة التعبير عن نفسه التي يخشى خزلانها له اما لو اصبح بمفرده قليلا فتجد ان العبوس قد ارتسم على وجهه وتجد ان الحاجبين انعقدوا واصبحت الكئابه مالية المكان اللي هو قاعد فيه ( يعني تبقى ليلة طين لو عديت من جنبه هتاخد شوية كئابة في جيبك وتروح ) وبالتأكيد تلك الامور تؤدي الى عدم شعورة بالتوازن في حياته رغم انها في معظم الاحيان تكون متوازنه

اما لو اختلت موازين حياته فعليا فهذا هو الدمار الشامل بعينه ولا القنابل الفسفورية اللي رميتها اسرائيل على اهل غزة لانه ببساطة لا يستطيع اعادة التوازن الى حياته بل يكتفي بالرضوخ للنكسات والبكاء والعويل والولولة والنحاب والصويت ومش بعيد لطم الخدود كمان

كل دا اكيد بيخلينا نتاكد ان الشخص دا لا يملك من قوة الارادة شيء بل ولا يستطيع ان يصر على تغيير اي شيء في حياته الكئيبة

ونجد في المقابل ان دائما علاقاته بالاخرين مضطربة وغير متوازنة اما اتصال بالغ الذروة او تجاهل تام ودائما لا تفيد تعبيراته عن اصل مكنوناته فدائما تعبيراته مبالغ فيها

حاضر كفاية عارف اني سودت الحياة في عيون الناس بس دول الاشخاص الاغبيا مش انا دول اللي ميعرفوش انه لانشاء حياه مثل التي عاشها بنفس الظروف لانتاج شخص مثله هتتكلف الملايين يعني الواحد يساوي كتير ( حد يشتري ) ؟

ربنا يعافينا من غباء النفس وينزل علينا سكينته ويمدنا بثقة من عنده

اهم حاجه اننا ننام كويس لان النوم مفيد جدا للذكاء وهانشوف النوم مهم اد ايه الموضوع الجاي

واهو كله كلام