الخميس، 5 نوفمبر 2009

مش ناسيين ... لكن آسفين




يعيش الشعب المصري حاليا حالة من الترقب والإنتظار ليوم 14 نوفمبر أدت لأن ينسى الشعب المصري تماما إن في مؤتمر في الحزب الوطني اسمه من اجلك انت ( الله اعلم -انت- دي عايده على مين )
يوم 14 نوفمبر نساهم كمان او خلاهم ميخدوش بالهم من ال ..... اللي اسمه احمد عز اللي قال جملة غريبة اوي في المؤتمر وهي تحية لمفجر ثورة التحديث والتطوير

انا فعلا مفهمتش الجملة ... اللي اعرفه ان احمد عز بيتبلى على الشعب المصري وبيقول عليه شعب غني ... لدرجة اني بأفكر ارفع عليه قضية سب وقذف دا بيشتمنا ويقول شعب غني

وبردو مافهمتش هي ثورة التحديث والتطوير دي قامت امتى .. يمكن مقصود بيها ثورة يوليو ماهو الاتنين جمال

يوم 14 نوفمر أنسى المصريون دور ومساهمة الجزائر في حرب 73 كما كتب أحد محرري موقع مصراوي .... أحب أوضح له احنا مش ناسيين

ولكن هل تذكر الجزائر ما فعلته مصر من أجلها

وانا في السودان اتعرفت على واحد كان أحد رجال الرئيس الاسبق الراحل النميري لجمهورية السودان ... وكان الراجل دا مبعوث السودان للقمة الأفريقية المنعقدة في الجزائر وكان ذلك بعد توقيع معاهدة السلام ومقاطعة الكثير من الدول العربية لمصر

المهم ان رئيس دولة نيجيريا ( دولة إسلامية ) وصل الجزائر والسلطات الجزائرية رفضت دخوله للاراضي الجزائرية بدون جواز سفر وملقاش حد في استقباله وقامت الدنيا في المطار لحد ما سمحوا له بالدخول

وراح الراجل للقمة وهو متعصب جدا جدا واتكلم عن استقبال الرئيس السادات له في مصر وان الرئيس السادات بنفسه كان واقف مستنيه

فما كان من رئيس القمة الجزائري الا انه بدا يلعن ويشتم في الرئيس السادات اللي خان الاسلام والعروبة بتوقيع المعاهدة مع المدعوة اسرائيل

في 2 طلبوا الحديث ... رئيس البعثة المصرية واللي طبعا تم تجاهل طلبه ورئيس البعثة السودانية اللي سابوه يقول كلمته

الراجل حكى قصة ظريفة اوي وقال

(وانا صغير كان ابويا بيشتغل في اسكندرية في شركة شحن هناك وكنت انا ايامها طالب في الثانوي باخد مصروفي من ابويا وكنا ناخد المصروف ونحوش منه عشان اخر الاسبوع نروح السينما نتفرج على أفلام عبد الحليم حافظ وكانت التذكرة وقتها بقرش ونص مصري ونجيب بنص قرش لب

وفي يوم رايحين السنيما سمعنا ان تذكرة السينما غليت بقت ب 2 قرش ومبقتش عارف ادخل السينما ولا اجيب اللب ... لكن قررت أسأل ليه خلوا تذكرة السنيما ب 2 قرش فروحت لحد الشباك وسألت الراجل : ليه تذكرة السينما بقت ب 2 قرش رد عليا وقال ان قرش ونص تمن التذكرة والنص قرش لدعم الثورة الجزائرية ... وشكرا )

دي كانت كلمة الراجل ... اللي معناها ان الشعب المصري في يوم قطع من قوته وقوت عياله عشان يدعم الثورة الجزائرية .... فكان مصير الشعب المصري انه يتحرق رمز منتخب بلده وعلم بلده في شوارع الجزائر عشان ماتش كورة

وأهو كله كلام

هناك 19 تعليقًا:

غير معرف يقول...

برافووووو
اول مرة تكتب حاجة مفهاش لا الفاظ ولا حاجة و المحتوى يكون كويس
عامة مش الجزائر بس اللى مصر ساعدتها و بيتنكروا لها فى الآخر
احنا ساعدنا اللى يسوى و اللى ميسواش و محدش بيقدر
ايــــــه دنيا
بس فعلا يعنى ارفع لك القبعة

الشعب لابد له من حكومه تشكمه يقول...

هههههههههه انا يوم اى ماتش لمنتخب مصر بيكون معركه فى بيتنا اصلى عندى 3 اخوات شباب وبيجيبوا قرايبنا وبيتحول بيتنا لاستاد..
ودايما مصر لما تلعب مع تونس او المغرب او الجزاير باخد ساتر:).

فى اتوبيسات طالعه من المنصوره وتظبيطات جامده,فكان اخواتى اخدونى معاهم فى كاس الامم الافريقيه:)
المرادى بقولهم خدونى معاكو,بصولى زى مكون اجرمت قالولى لما نرجع احنا الاول بالسلامه نباه ناخدك:)
راحين يحاربوا:)

خواطر شابة يقول...

لايجب خلط الامور وادخال السياسة والتاريخ في كرة القدم هده مجرد مباراة 90 دقيقة وينتهي كل شئ.
لايمكننا التعميم هناك قلة من المتعصبين ساهم الاعلام في كلا البلدين في شحنهم.
على العموم ان شاء الله يمر هدا اليوم على خير ويكون الفوز للافضل ولمن يستحق ولمن يقدر على تمتيل العرب ثمثيل مشرف في المونديال
مع تحياتي

بياع كلام يقول...

حاجة غريبة فعلا
وانا مش هتكلم عن الجزائر ولا المباراة
عامة مش عارف ليه الشعب المصرى مش محبوب بين الشعوب العربية وكمان حقه فيها بيضيع غير الاهانة
رغم ان المصريين بيحبوا كل العرب
ورغم ان حكومتنا بتاخد لأى عربى أو أجنبى حقه من المواطن المصرى
يعنى المواطن المصرى حقه ضايع جوه وبره
لنا الله .
تحياتى ليك أخى أحمد

عاشق الجنة من الإخوان صلى على النبى يقول...

بصراحة موقف في غاية الروعة والمسلمون أمة واحدة
ونسأل الله أن يوحد العرب والمسلمين
بجد مدونة رائعة
اول زيارة ومش الاخيرة إن شاء الله
في انتظار زيارتك عشان تنور مدونتي
صلي علي النبي

البروفيسير يقول...

عندما نفتح المجال لتعبير عن حرية الراى
يفعل ما فعله الشعب الجزائرى وهذا يدل على قلة استيعابهم لمجريات الامور وليس هذا فقط وانما يدل ايضا عدم اكتمال النضج الفكرى لدى الاخوه الذين فعلوا هذا بالعلم المصرى
طيب ما احنا كمصرين بامكانا ان نفعل بالعلم الجزائرى ما نريد ولن يمنعنا احد ولكن هنا الفرق بيننا ؟
وياريت يا اخوانا فى كل مجال نعبر يعنى فى الكوره نعبر ونقول راينا قى الكوره مندخلش لا سياسه ولا ديند
تحياتى

Remas يقول...

بصراحة انا معاك مليون في الميه

ومش موافقة على انه لا يجب ادخال الكورة في المواقف السياسية والتاريخ

لانهم فعلا هما اللى تناسو مصر عملت معاهم ايه وفي اى موقف بسيط بيتعمدو اهانة مصر والمصريين

مش عارفه مالى اتنرفزت كدا ليه

المهم اننا ان شاء الله نرد بالفعل في الملعب

تحياتى ليك

فشكووول يقول...

السلام عليكم احمد

تحياتى

شوف يا احمد ..احنا عرب ورعاع .. وانت عارف العربى وبما انك من الشرقيه بتعرف يعنى ايه الزلم .. والناس دول كلهم زلم رعاع .. يعنى بينسوا اللى فات وما يفتكروش غير اللى هما فيه .. طول عمرهم يسرحوا بغنم .. وبعدين لما ربنا يكرمهم ويبنون بيت ويبقى عندهم قرشين ينسوا اى حد وقف جنبهم واى حد ساعدهم ..واحنا برضه يا احمد حالنا يغم برضه .. مين يعمل للمصريين ولا لمصر حساب وهى مفلسه ولا معاهاش قرش احمر .. العيب علينا احنا .. مش عليهم

العرب جرب

Mona يقول...

الصراحة ياأحمد أنا لسة شايفة فيديو الجزائرين عاملينوه فيه قلة أدب وسفالة عننا جامدة أوى فمش قادرة أفكر غير فى أنهم شعب جاحد ومجنون

Mona يقول...

http://www.youtube.com/watch?v=rOzhW9B96b4

ده ردعلى فيديو الجزائر بالادب

Atef Shahin يقول...

تحياتي
أحسن رد على كل اللي ببيعملوه هو ان اللعيبة تبقى رجالة في الملعب وان الجمهور يكون سند للعيبة وليس اداة ضغط عليهم

غير معرف يقول...

الصراحة اول مرة بختلف معاك يا احمد
الموضوع اخد اكبر من حجمه دى مجرد مسابقة رياضية فيها فائز وخاسر وبعدين الى بيحصل من الطرفين بيحصل فى كل ماتشات كرة القدم يعنى مثلا انا فاكرة لما حسنى عبد ربه انتقل للاهلى ووصل لاهله تهديد من مشجعى الاسماعيلى وخرجوا فى مسيرات شايلين نعش عبد ربه كان تعصب اعمى ضد فريق مصرى من محافظة مصرية وبعدين هنستفاد ايه لما كل واحد يعاير التانى بمواقف سياسية بين اخوة

الموضع بيكبروه بعض المرتزقة لاجل هدف معين الهاء الناس عن التفكير فى القادم الى ممكن بكرة نفاجأ بيه واظن كتير فاهمين الازمات الكتير الى حاصلة اليومين دول اولها شوبير والمريض العميل مرتضى منصور وثانيها رجب حميدة والعائد بعد فترة سجن لقى فيها التاديب على ما فعل وخرج ليصلح ماأفسد اثناء ترشيحه لمنصب الرئاسة هو ايمن نور
والثالثة ماتش الجزائر الذى لا يتعدى كونه مسابقة رياضية اصبحت ازمة لماذا ومن المستفيد
لو اننا فعلنا باسرائيل ما نريد فعله بالجزائرين لخافونا وعملوا لنا الف حساب

توتة الشقية يقول...

اشكرك على موضوعك وفى تقدم مستمر ان شاء الله

و يقول تعالى:{ إِنَّمَا الْمُؤْمِنُونَ إِخْوَةٌ } (الحجرات 10)

قال الله تعالى : { و اعتصموا بحبل الله جميعا و لا تفرقوا } (آل عمران 103)

فمنذ بداية التصفيات و الطرفان (المصري و الجزائري) يتبادلان التهم و الإهانات و العبارات الجارحة وصلت إلى حد لا يعقل و السبب تافه حقير.

ولعل الذي يتحمل المسؤولية الأكبر في البلدين هو الإعلام لأنه يؤثر بنسبة كبيرة لكن أيضا الخلل في عقلية البعض فلو كان عندهم قليل من سمو الأخلاق لرفضوا ما يساق في الإعلام و لما ألقوا له بالا.

و يبقى الإعلام سبب الكثير من الفساد للأسف بسبب سوء استعماله

فنحن إخوة و سنبقى،دوما إخوة عروبة وإسلاما
لنتعلم الأخلاق من قدوتنا محمد صلى الله عليه و سلم

mimi يقول...

"أنت" دي غلطة مطبعية الأصل من أجلي أنا

الباشا أحمد عز هيعمل سكك حديد بين أسوان ـ الدخيلة
لخدمة مصانع عز الدخيلة

إحنا فعلا شعب غني بيقوللك كام ألف أسرة مصرية عندها سيارات احدث موديل ( بس نسي إننا كام مليون )

وثورة التحديث قامت امبارح بعد صلاة الفجر بالظبط

ويجعله عامر

تقعد بالخير

العوافي

Tamer Nabil Moussa يقول...

السلام عليكم

بوست مميز ياعم احمد

محدش حس باجتماع الحزب الوطنى عشان مفيش حد مهتم او تقدر تقول الاغلبية عارفة اللى فية واللى هيتقال

وكلمتين زى بتوع عز شوف قلبوا دماغك ازى والناس فيها اللى مكفيها


الماتش دة بقى عامل زى اللى مستنى موقعة حربية ونقدر نقول سلم لى على الروح الرياضية

ربنا يهدى الحال

مع خالص تحياتى

القلم السكندري يقول...

أصدق ما يقال في عصبيات الكرة والقوميات والوطنيات هو حديثه صلي الله عليه وسلم: (أبدعوي الجاهلية وأنا بين أظهركم؟! .. دعــــوهــــــــا فإنها منــــــــــــتــــــــــنـــــــة)


وأينما ذُكر اسم الله في بلدٍ///عددتُ ذاك الحمي من صلب أوطاني


أما ما يبعثُ علي الغثيان ويضرب بالحسرة في أعماق القلوب .. فهو أن تري القطعان الغفيرة تهيج وتموج وتثور وتنافح علي مباراة كرة.. ويسخر لها الإعلام والأموال والشرطة ومرافقُ الدولة .. تلك الجموعُ التي لم تتحرك نصف ولا ربع ولا عشر معشار هذا التحرك دفاعاً عن قدس المسلمين ولا عن أفغانهم وشيشانهم ولاتجاه قضايا المسلمين المستضعفين في مشارق الأرض ومغاربها.. تنتهكُ أعراضهم وتداس مقدساتهم ويُلعنُ دينهم.. وهم في مستنقع اللهو واللعب..

ومن أصدق من الله قيلا: (قل إن كان آباؤكم وأبناؤكم وإخوانكم وأزواجكم وعشيرتكم وأموال اقترفتموها وتجارة تخشون كسادها ومساكن ترضونها أحب إليكم من الله ورسوله وجهادٍ في سبيله فتربصوا حتي يأتي الله بأمره.. والله لا يهدي القوم الفاسقين)!


دمت بخير أخي الكريم

رحلتنا في الحياة يقول...

السلام عليكم ازيك يااستاذ احمد اخبار حضرتك ايه
معلش انا مقرتش البوست كله انا بس جيت اسلم واشكر حضرتك على المرور على المدونة

غير معرف يقول...

حبيبي ، مبروك مصر

Remas يقول...

انت فين يا استاذ احمد ؟

قلقنا عليك

مبروك الماتش وعقبال يوم الاربع ان شاء الله

ياريت نطمن عليك